01-សីហា-2024 - ម៉ោង 10:50:AM
តាកែវ៖ នាយឧត្តមសេនីយ៍ ស ថេត អគ្គស្នងការនគបាលជាតិ បានធ្វើការណែនាំដល់ស្នងការខេត្តតាកែវថ្មី ត្រូវធ្វើការពង្រឹងសន្តិសុខនៅក្នុងខេត្តអោយបានល្អ ព្រោះសន្តិសុខសណ្ដាប់ធ្នាប់សាធារណៈគឺជាគ្រិះនិងជាមូលដ្ឋាននៃការអភិវឌ្ឍន៍ខេត្តតាកែវអោយកាន់តែរីកចម្រើនថែមទៀត។
ថ្លែងនៅក្នុងពិធីប្រកាស់តែងតាំងស្នងការនរបាលខេត្តតាកែវថ្មី នៅព្រឹកថ្ងៃ ពុធ ទី ៣១ ខែ កក្ដដា ឆ្នាំ ២០២៤នេះ នាយឧត្តម ស ថេត បានលើកឡើងថា ការថែរក្សាសន្តិសុខសណ្ដាប់ធ្នាប់សាធារណៈគឺជាសសរស្ដម និងជាកិច្ចការដ៍សំខាន់មួយរបស់សមត្ថកិច្ចយើង ដូច្នោះស្នងការខេត្តថ្មីត្រូវប្រើគ្រប់មធ្យោបាយបាយដែលមាន ទាំងកម្លាំងសរុប មធ្យោបាយសរុប ដើម្បីធ្វើកិច្ចការនេះអោយសម្រេចបានជោគជ័យ។
លោក ស ថេត បានមានប្រសាសន៍បន្តថា កាលណាខេត្តមានសន្តិសុខសុវត្ថិភាពល្អ វានឹងនាំអោយមានអ្នកវិនិយោគចូលមកបណ្ដាក់ទុនរកស៊ី មានភ្ញៀវទេសចរណ៍មកលេងកម្សាន្តក្នុងខេត្តតាកែវកាន់តែច្រើនឡើង ដែលវានិងនាំអោយជីវភាពរបស់បងប្អូនប្រជាពលរដ្ឋមានការកើនឡើងជាក់ជាពុំខាន ជាពិសេសទៅទៀតនោះ ការថែរក្សាសន្តិសុខសណ្ដាប់ធ្នាប់បានល្អ វានឹងនាំអោយបងប្អូនប្រជាពលរដ្ឋកាន់តែមានជំនឿទុកចឹត្តទៅលើការដឹកនាំរបស់រាជរដ្ឋាភិបាលថែមទៀតផង។
នៅក្នុងឱកាសនោះ នាយឧត្តមសេនីយ៍ អគ្គស្នងការនគរបាលជាតិ ក៍បានណែនាំឲ្យសមត្ថកិច្ចទាំងអស់ត្រូវយកចិត្តទុកដាក់កង្វល់របស់ប្រជាពលរដ្ឋ ចំពោះការអនុវត្តច្បាប់របស់មន្ដ្រី ពោលត្រូវអនុវត្តប្រកបដោយសីលធម៌ គុណធម៌ និងត្រូវបម្រើសេវាជូនប្រជាពលរដ្ឋតាមមូលដ្ឋានប្រកបដោយការទទួលខុសត្រូវ។ លើសពីនេះ ត្រូវយកពង្រឹងលើការងារផ្សព្វផ្សាយអប់រំអំពីច្បាប់ចរាចរណ៍ផ្លូវគោក ឲ្យចំមុខសញ្ញា ខណៈគ្រោះថ្នាក់ចរាចរណ៍នៅតែជាក្ដីកង្វល់នៅពេលបច្ចុប្បន្ននេះ៕
