មេឃុំ និងស្មៀនឃុំត្រពាំងធំខាងត្បូង ស្រុកត្រាំកក់ ត្រូវបានពលរដ្ឋរិះគន់យកម៉ោងរដ្ឋបាល ទៅផឹកស៊ី ហើយប្រសិនចង់ចុះហត្ថលេខា បញ្ជាក់ឯកសារអ្វីមួយ គឺត្រូវយកទៅពិនិត្យ និងចុះហត្ថលេខា នៅហាងផឹកស៊ី
14-កញ្ជា-2023 - ម៉ោង 03:00:PM
តាកែវ៖ ក្រុមប្រជាពលរដ្ឋនាំគ្នាធ្វើការរិះគន់យ៉ាងខ្លាំងៗ លោក សាន់ គឿន មេឃុំត្រពាំងធំខាងត្បូង ស្រុកត្រាំកក់ ខេត្តតាកែវ ចំពោះភាពអសកម្មការងារ ក្នុងការបម្រើសេវាសាធារណៈ បង្កឱ្យមានការកកស្ទះឯកសាររបស់ប្រជាពលរដ្ឋក្នុងមូលដ្ឋានខ្លួន។
តំណាងក្រុមប្រជាពលរដ្ឋ សុំមិនបញ្ចេញឈ្មោះ បានលើកឡើងថាជាបន្តបន្ទាប់ ទាក់ទងនឹងបញ្ហាពួកគាត់បានយកឯកសារផ្សេងៗ មកឲលោកមេឃុំ ត្រួតពិនិត្យនិងស៊ីញ៉េ ទទួលស្គាល់តាមច្បាប់ ដើម្បីយកទៅប្រើតាមតម្រូវការ ប៉ុន្តែនៅក្នុងម៉ោងរដ្ឋបាល តែបែរជាលោក សាន់ គឿន មេឃុំ រូបនេះ មិនមានវត្តមាននៅសាលាឃុំនោះទេ បែរជាឃើញលោកមេឃុំនេះ មានវត្តមាន នៅហាងផឹកស៊ីមួយកន្លែង យីហោឈ្មោះ "សំណាង ស្រីទន់" ដែលស្ថិតនៅភូមិឃុំត្រពាំងធំខាងត្បូង ទៅវិញ គាត់បានបន្ថែមថា ពេលខ្លះក៏មានបងប្អូនប្រជាពលរដ្ឋខ្លះ យកឯកសារទៅឲគាត់ជាអាជ្ញាធរដែនដីត្រួតពិនិត្យ និងចុះហត្ថលេខា គឺទាល់តែយកទៅដល់នៅកន្លែងហាងផឹកស៊ីក៏មានច្រើនលើកដែរ។
ដោយឡែក លោកមេឃុំ អសកម្មការងារទៅហើយ តែបែរជា ស្មៀនឃុំ វិញក៏អញ្ចឹងដែរ មិនសូវមានវត្តមាននៅក្នុងសាលាឃុំ ដើម្បីបម្រើសេវាជូនប្រជាពលរដ្ឋនោះទេ ច្រើនតែមានវត្តមាននៅក្នុងហាងផឹកស៊ីជាមួយលោកពូមេឃុំដែរ បើចង់ជួបកិច្ចការងារទាល់តែទៅរកនៅហាងផឹកស៊ី។
តំណាងក្រុមប្រជាពលរដ្ឋ បានលើកឡើងថា កាលពីថ្ងៃទី១១ ខែកញ្ញា ឆ្នាំ២០២៣ វេលាចន្លោះម៉ោង ១៤:០០ ទៅម៉ោង ១៦:១៥ នាទី ទើបមានវត្តមានលោកមេឃុំមកដល់សាលាឃុំវិញ ទើបមកពីហាងផឹកស៊ី។
ជុំវិញការចោទប្រកាន់ លោកមេឃុំ និងស្មៀនឃុំត្រពាំងធំខាងត្បូង នេះដែរ អង្គភាពសារព័ត៌មាន បានទាក់ទងសុំការបំភ្លឺពីលោកមេឃុំ និងស្មៀនឃុំ តែខលចូលមិនលើក និងទាក់ទងតាមតេលេក្រាមចូលមើលហើយមិនឆ្លើយតប ដែលនេះអាចបង្ហាញបានថា ការលើកឡើងរបស់ពលរដ្ឋ ពិត ឬក៏យ៉ាងណា? ប៉ុន្តែអង្គភាពយើងខ្ញុំ ក៏នឹងរងចាំការឆ្លើយបំភ្លឺ របស់ លោកមេឃុំ និងលោកស្មៀនឃុំ រៀងរាល់ម៉ោងធ្វើការផងដែរ។
ជាមួយគ្នានោះផងដែរ បងប្អូនប្រជាពលរដ្ន ដែលរស់នៅក្នុងមូលដ្ឋានខាងលើ បានលើកដៃសំពះសំណូមពរទៅដល់លោក កៅ វត្តសែល អភិបាល នៃគណ:អភិបាលស្រុកត្រាំកក់ និង លោក អ៊ូច ភា អភិបាល នៃគណៈអភិបាលខេត្តតាកែវ សូមមេត្តាជួយពិនិត្យតាមដានភាពអសកម្ម របស់លោកមេឃុំ និងស្មៀនឃុំត្រពាំងធំខាងត្បូង នេះផង ៕
