02-កញ្ជា-2024 - ម៉ោង 03:53:PM
តាកែវ៖ ក្រុមប្រជាពលរដ្ឋជិត ៥០គ្រួសារ រស់នៅភូមិកំពង់អំពិល ឃុំបូរីជលសារ ស្រុកបូរីជលសារ ខេត្តតាកែវ ស្នើសុំ អភិបាលខេត្ត និងអាជ្ញាធរពាក់ព័ន្ធ ជួយអន្តរាគមន៍បុគ្គលមានអំណាចបិទផ្លូវបង្ហូរទឹកកង្វក់ខាងក្រោយ និងគប់គិតជាមួយមន្រ្តីជំនាញរំលោភយកដីអាងទឹកកំពង់អំពិលជាង ៨ហិកតា ធ្វើជាកម្មសិទ្ធិឯកជន ។
នេះបើយោងទៅតាមពាក្យបណ្ដឹងរបស់ តំណាងប្រជាពលរដ្ឋ ៤៦គ្រួសារ ធ្វើការដាក់ពាក្យប្ដឹងស្នើសុំអន្តរាគមន៍ ពី អភិបាលខេត្ត មន្ទីរជំនាញ និងអភិបាលស្រុក តាំងពីអំឡុងខែវិច្ឆិកា ឆ្នាំ២០២៣ ដោយនៅក្នុងនោះដែរ ប្រជាពលរដ្ឋ បានដាក់ពាក្យប្ដឹងសុំជំទាស់ក្បាលដីរហូតដល់ ៧ រួមមាន៖ ក្បាលដីលេខ ១៥៦, ក្បាលដីលេខ ១៥៩, ក្បាលដីលេខ ១០៤៨, ក្បាលដីលេខ ១៤០, ក្បាលដីលេខ ១៣៩, ក្បាលដីលេខ ១៣៨ និងក្បាលដីលេខ ១៣៧។ ដោយបានធ្វើការអះអាងថា ក្បាលដីទាំង៧នេះ គឺបានបិតផ្លូវទឹកមិនអោយពួកគាត់បង្ហូរទឹកប្រើប្រាស់ចូលទៅអាទឹកបន្តទៀតឡើយ បណ្ដាលអោយមានជន់លិចផ្ទះសម្បែងរបស់ពលរដ្ឋ។
នៅក្នុងពាក្យបណ្ដឹងនេះដែរ ក្រុមប្រជាពលរដ្ឋ បានធ្វើការសំអាងថា ក្បាលដីចំនួន ៧នេះ គឺដីអាងទឹក សូមរក្សាទុកជាសម្បត្តិរដ្ឋ និងបានស្នើសុំអាជ្ញាធរសុំបើកផ្លូវទឹក ទទឹង ៤ម៉ែត្រ និងបណ្ដោយចាប់ពីខាងជើង ជាប់ព្រំប្រទល់ប្លង់ដីផ្ទះ របស់ប្រជាពលរដ្ឋរហូតដល់ខាងត្បូងទល់នឹងប្រឡាយទឹកកាវ៉ាក់។
ជុំវិញពាក្យបណ្ដឹងនេះដែរ យោងតាមលិខិតលេខ ៤០៧ ម.ធទឧ ត.ក របស់ មន្ទីរធនធានទឹក និងឧតុនិយមខេត្តតាកែវ បានឱ្យដឹងថា ករណីពលរដ្ឋជិត ១៣គ្រួសារ បានដាក់ពាក្យប្ដឹងមកនេះ គឺក្រុមការងារជំនាញ កាលពីថ្ងៃទី១៥ ខែវិច្ឆិកា ឆ្នាំ២០២៣ បានចុះធ្វើការសាកសួរអាជ្ញាធរភូមិឃុំ ដោយលោក អេល ហៀត អនុភូមិកំពង់អំពិល បានឡើងថា ឆ្នាំ១៩៨០ ជាដីអាងទឹក ប៉ុន្តែក្រោយមកក៏មានប្រជាពលរដ្ឋជាច្រើនគ្រួសារបានមកតាំងទីលំនៅ រហូតក្លាយជាទីប្រជុំជន លុះដល់ឆ្នាំ២០២៣ គណៈកម្មាធិការចុះបញ្ជីដីធ្លី បានសម្រេចកាត់ឆ្វៀលដីនេះជារាងធ្មេញរណា សម្រាប់លំនៅដ្ឋានជាក់ស្ដែងជូនពលរដ្ឋ ដោយក្រៅពីនេះរក្សាទុកជាដីអាងទឹក សម្រាប់អោយពួកគាត់អាស្រ័យផលជាធម្មតា ប៉ុន្តែនៅពេលបិតផ្សាយឃើញថា មានក្បាលដីខ្លះផ្ទុយពីការសម្រេច ពិសេសក្បាលដីលេខ ១៥៦ ជាដីអាងទឹក ស្រាប់តែវាស់ចេញប្លង់កម្មសិទ្ធិ បញ្ហានេះទើបបណ្ដាលអោយប្រជាពលរដ្ឋរស់នៅភូមិកំពង់អំពិលប្ដឹងទាមទារឱ្យបើកផ្លូវទឹក ដើម្បីរំដោះទឹកចេញពីផ្ទះរបស់ពួកគាត់។
លោក ស៊ូ ភិរិម្យ អភិបាលស្រុកបូរីជលសារ បានឱ្យដឹងថា ករណីបណ្ដឹងរបស់ពលរដ្ឋ នៅភូមិកំពង់អំពិលនេះ គឺអាជ្ញាធរស្រុកបានធ្វើការដោះស្រាយ និងសម្របសម្រួលច្រើនលើកមកហើយ ប៉ុន្តែមិនត្រូវរ៉ូវគ្នា ក៏បញ្ជូនបន្តទៅថ្នាក់ខេត្តដើម្បីធ្វើការដោះស្រាយ។
ដោយឡែក លោក នួន សុធា ប្រធានមន្ទីររៀបចំដែនដី នគររូបនីយកម្ម និងសំណង់ខេត្ត បានឱ្យដឹងថា ករណីបណ្ដឹងរបស់ពលរដ្ឋនេះដែរ គឺបានធ្វើការសម្របសម្រួល ដោះស្រាយគ្នាច្រើនលើកមកហើយ ប៉ុន្តែមិនទាន់សះជា ប៉ុន្តែអាជ្ញាធរនឹងបន្តធ្វើការដោះស្រាយជូនពលរដ្ឋ។ ដោយឡែកក្បាលដីដែលពលរដ្ឋប្ដឹងជំទាស់នោះ គឺមន្ទីរជំនាញបានធ្វើសម្រេចដាក់ជាដីមានទំនាស់ មិនទាន់បានចេញប្លង់ កម្មសិទ្ធិនោះទេ។
ជុំវិញករណីនេះដែរ លោក ម៉ឹង វុធី អភិបាលរងខេត្ត បានថ្លែងបញ្ជាក់ថា កន្លងមកខេត្តបានធ្វើការប្រជុំដោះស្រាយ និងសម្របសម្រួល សម្រេច នៅក្នុងគណៈកម្មាធិការរដ្ឋបាលខេត្តអស់ហើយ ដោយមានគ្រប់សមាសសភាពតាំងជំនាញ រួមនិងអាជ្ញាធរគ្រប់លំដាប់តាំងពីមេភូមិព្រឹទ្ធាចារ្យភូមិ។ ល។ ល។ ចូលរួមប្រជុំផងដែរ ៕
