19-កក្តដា-2024 - ម៉ោង 03:50:PM
តាកែវ៖ លោកឧត្តមសេនីយ៍ទោ នាង សុជីវី ស្នងការនៃស្នងការដ្ឋានកសាងកម្លាំង កងរាជអាវុធហត្ថលើផ្ទៃប្រទេស ប្រាប់បេក្ខជនដែលដាក់ពាក្យប្រឡងថា ការជ្រើសរើសមន្រ្តីអាវុធហត្ថគឺធ្វើឡើងដោយតម្លាភាព ត្រឹមត្រូវ យុត្តិធម៌ ហើយពុំមានអំពើពុករលួយកើតមានឡើងជាដាច់ខាត ។
ថ្លែងនៅចំពោះមុខបេក្ខជនប្រមាណជិត៤០០នាក់ ដែលបានដាក់ពាក្យប្រឡើងជ្រើសរើសកងរាជអាវុធហត្ថខេត្តដែលមានលោក សេង មហា មេបញ្ជាការកងរាជអាវុធហត្ថខេត្ត និងសហការី នាថ្ងៃទី១៨ ខែកក្កដា ឆ្នាំ២០២៤ នៅក្នុងទីបញ្ជាការដ្ឋានកងរាជអាវុធហត្ថខេត្តតាកែវ លោកឧត្តមសេនីយ៍ទោ នាង សុជីវី ស្នងការនៃស្នងការដ្ឋានកសាងកម្លាំង កងរាជអាវុធហត្ថលើផ្ទៃប្រទេស បានមានប្រសាសន៍បន្តថា ចំពោះបេក្ខជន ឬបេក្ខជនារី ដែលមកដាក់ពាក្យប្រឡើងជ្រើសរើសកងរាជអាវុធហត្ថខេត្តតាកែវ គឺលក្ខខ័ណ្ឌនៃការជ្រើសរើស បេក្ខជនត្រូវមានកម្ពស់ចាប់ពី១ម៉ែត្រ៧០ឡើងទៅ ហើយថ្លឹងទម្ងន់ ពិនិត្យឯកសារ អត្តសញ្ញាប័ណ្ណ សំបុត្រកំណើត សៀវភៅគ្រួសារ និងយកអាយុចាប់ពី១៨ឆ្នាំឡើងទៅ ហើយមានកាយសម្បទាមាំមួន មានសញ្ញាបត្របាក់ឌុបឡើងទៅ ហើយបេក្ខជនត្រូវតែនៅលីវ មិនមានប្រពន្ធកូនឡើយ ដើម្បីយកទៅហ្វឹកហ្វឺននៅខេត្តកំពង់ឆ្នាំង ហើយឯកសារដែលត្រួតពិនិត្យនេះ គឺទាមទារឱ្យយកច្បាប់ដើមមកទាំងអស់។
លោកឧត្តមសេនីយ៍ទោ នាង សុជីវី ស្នងការនៃស្នងការដ្ឋានកសាងកម្លាំង កងរាជអាវុធហត្ថលើផ្ទៃប្រទេស បន្តទៀតថា នៅក្នុងការប្រឡងនេះដែរ គឺយើងត្រូវពិនិត្យឈាម ដើម្បីរកមេរោគថាតើបេក្ខជនមានជំងឺថ្លើមឬជំងឺឆ្លងអី្វឬអត់ ព្រោះវាអាចឆ្លងទៅបេក្ខជនផ្សេងៗទៀតក្រោយពេលទៅហ្វឹកហ្វឺន ការពិនិត្យទឹកនោម និងការពិនិត្យកាយសម្បទានទាំងអស់ ព្រោះថា ការជ្រើសរើសចូលជាកងកម្លាំងអាវុធហត្ថ ត្រូវតែមានសុខភាពល្អមាំមួន ដើម្បីបំពេញភារកិច្ចជូនជាតិ និងការពារសន្តិសុខសណ្តាប់ធ្នាប់ ហើយបើមានស្នាមសាក់ត្រង់កន្លែងណាក៏អត់បានដែរ សូម្បីតែមានជំងឺឬសដូងបាតក៏មិនបានដែរ ព្រោះពេលហ្វឹកហ្វឺនខ្លាំងណាស់ ត្រូវហាត់ច្រើនណាស់មានដូចជាខាងអង្គរក្ស លោតឆ័ត្រ ទ័ពព្រៃ គឺមានច្រើនណាស់សម្រាប់ហ្វឹកហាត់ ។
លោកឧត្តមសេនីយ៍ទោ នាង សុជីវី ស្នងការនៃស្នងការដ្ឋានកសាងកម្លាំង កងរាជអាវុធហត្ថលើផ្ទៃប្រទេស បន្តថា ក្រោយពីការពិនិត្យកាយសម្បទានហើយ ត្រូវឆ្លងកាត់ការសរសេរតាមអាន និងគុយសេអឹម និងរត់ហាត់កីឡា ដើម្បីធ្វើត្តេស៍សមត្ថភាពរបស់បេក្ខជននីមួយៗ ហើយយើងជ្រើសរើសយកបេក្ខជនណាដែលពោរពេញទៅដោយសមត្ថភាពខ្ពស់ ជាមនុស្សមានគុណភាពគុណតម្លៃ ដែលគ្រប់លក្ខណៈសម្បត្តិមុននឹងចូលជាកងកម្លាំងអាវុធហត្ថ ព្រោះអាវុធហត្ថជាកម្លាំងអន្តរាគមន៍ ជាកម្លាំងរក្សាសណ្តាប់ធ្នាប់ ខាងបង្រ្កាប និងទប់ស្កាត់បទល្មើស ដូច្នោះវាទាមទារត្រូវតែមានសុខភាពល្អ ៕
