03-មេសា-2025 - ម៉ោង 02:26:PM
តាកែវ៖លោកអភិបាលខេត្តតាកែវចុះសួរសុខទុក្ខបងប្អូនកងទ័ពដែលឈជើងការពារព្រំដែនរវាងប្រទេសកម្ពុជានិងប្រទេសថៃនៅប្រាសាទតាមាន់ ស្ថិតនៅខេត្តឧត្តមានជ័យ នៅថ្ងៃ ព្រហស្បត្ត៍ ទី ៣ ខែ មេសា ឆ្នាំ ២០២៥នេះ លោកអភិបាលខេត្តតាកែវ វ៉ី សំណាង បានសំដែងនូវការកើតសសើរចំពោះវិរៈភាពដ៍អង់អាចក្លាហានរបស់បងប្អូនកងទ័ពដែលឈជើងការពារទឹកដីតាមបណ្ដោយព្រំដែន ដែលវិរៈភាពដ៍អង់អាចក្លាហាននេះជាគម្រូមួយដល់យុវជន យុវនារី និងបងប្អូនប្រជាពលរដ្ឋនៅទូទាំងប្រទេសយកគម្រូតាម។
លោកអភិបាលខេត្តតាកែវបានថ្លែងបន្តថា យើងខ្ញុំទាំងអស់គ្នាដែលនៅសមរភូមិក្រោយពិតជាមានមោទនៈភាពចំពោះបងប្អូនកងទ័ពដែលឈជើងនៅប្រសាទតាមាន់ ដែលបង្ហាញពីគំរូវីរៈភាពដ៏អង់អាចក្លាហានក្នុងការលះបង់សាច់ស្រស់ ឈាមស្រស់ ការពារជាតិ ការពារបូរណភាពទឹកដី និងការពារដាច់ខាត នូវរដ្ឋធម្មនុញ្ញ ការពារស្ថាប័នព្រះមហាក្សត្រ និង ការពាររាជរដ្ឋាភិបាលស្របច្បាប់ ដែលកើតចេញពីការបោះឆ្នោត ជាពិសេសបងប្អូនកងទ័ពក៍បានចូលរួមចំណែកស្តារ និងអភិវឌ្ឍន៍ប្រទេសជាតិឲ្យមានការរីកចំរើនរុងរឿងដូចសព្វថ្ងៃនេះផងដែរ។
នៅក្នុងឱកាសនោះដែរលោក វ៉ី សំណាង ក៍បានលើកឡើងពីក្រុមអគតិមួយចំនួនដែលមានបរទេសនៅពីក្រោយតែងតែអុចអាលញុះញង់ធ្វើយ៉ាងណាអោយប្រទេសយើងមានអសន្តិសុខ អស្ថិរភាព លាពពណ៍រវាងខ្មែរនិងខ្មែរគ្នាឯងជាពិសេសញុះញង់បងប្អូនកងទ័ព្វថែមទៀតផង ក៍ប៉ុន្តែបងប្អូនប្រជាពលរដ្ឋនិងបងប្អូនកងទ័ពយើងទាំងអស់គ្នាមិនបានចាញ់បោកការឃោសនា ការញុះញង់របស់ក្រុមអគតិទាំងអស់នោះទេ។
គួបញ្ជាក់ថា សម្ភារៈដែលលោកអភិបាលខេត្ត និងប្រតិភូរដ្ឋបាលខេត្តតាកែវ នាំយកមកជូនបងប្អូនកងទ័ពនៅប្រាសាទតាមាន់រួមមាន៖ វរសេនាតូចលេខ ៤២២ នៃកងពលថ្មើរជើងលេខ ៤២ អង្ករចំនួន ១២តោន, ទឹកត្រី ៣៥យួរ, ទឹកស៊ីអ៊ីវ ៣៥យួរ, ទឹកបរិសុទ្ធ ២៥កេស, ទឹកក្រូច ២៥កេស, ត្រីខ ៥០យួរ, សាច់ជ្រូក ៥០គីឡូក្រាម, បន្លែស្ពៃក្ដោប ២០គីឡូក្រាម, ពងទាសាប ៨០០គ្រាប់, ពងទាប្រៃ ៨០០គ្រាប់ និង ថវិកាម្នាក់ៗ ៥ម៉ឺនរៀល ។ ដោយឡែក វរសេនាតូចនគរបាលការពារព្រំដែនគោកលេខ ៧០២ ៖ អង្ករចំនួន ៤តោន, ទឹកត្រី ១៥យួរ, ទឹកស៊ីអ៊ីវ ១៥យួរ, ទឹកបរិសុទ្ធ ១៥កេស, ទឹកក្រូច ១៥កេស, ត្រីខ ៥០យួរ, សាច់ជ្រូក ៥០គីឡូក្រាម, បន្លៃស្ពៃក្ដោប ២០គីឡូក្រាម, ពងទាសាប ២០០គ្រាប់, ពងទាប្រៃ ២០០គ្រាប់ និង ថវិកាម្នាក់ៗ ៥ម៉ឺនរៀល ៕
