21-គុម្ភះ-2024 - ម៉ោង 10:59:AM
ស្វាយរៀង៖ រយៈពេលជិត ១ខែហើយ ដែល មន្រ្តីជំនាញចុះចាប់រថយន្តកុងតែន័រ ចំនួន ៤គ្រឿង លួចដឹកជើងមាន់ខុសច្បាប់ ជាង ១០០តោន កាលពីថ្ងៃទី៣១ ខែមករា ឆ្នាំ២០២៤ ប៉ុន្តែរហូតមកដល់ថ្ងៃទី២១ ខែកុម្ភៈ ឆ្នាំ២០២៤នេះ មិនទាន់ឃើញមន្រ្តីជំនាញអាជ្ញាធរពាក់ព័ន្ធ ចេញមុខបំភ្លឺករណីខាងលើនេះទាល់តែសោះ តើអាចមានអ្វីនៅពីក្រោយសំណុំរឿងនេះ? មហាជនឆ្ងល់?
តាមប្រភពពីខេត្តស្វាយរៀងបានលួចបង្ហើបឲ្យដឹងថា ចំពោះសំណុំរឿងករណី គុបគិតគ្នានាំចូលជើងមាន់ខុសច្បាប់ ៤កុងតែន័រ ដែលមានទំងន់រហូតដល់ជាង១០០តោន ដែលបានបញ្ជូនទៅដល់អយ្យការអមសាលាដំបូងខេត្តស្វាយរៀង កាលពីថ្ងៃទី ៦ ខែ កុម្ភៈ ឆ្នាំ ២០២៤ហើយ ។
ប្រភពបានបង្ហើបឲ្យដឹងថាអ្នកនាំជើងមាន់ចូលមកគឺ លោក សម្បត្តិ ម្ចាស់ក្រុមហ៊ុន (Sambath Logistic Co.Ltd )មានអាស័យដ្ឋាននៅភូមិ បាវិតកណ្ដាល សង្កាត់បាវិត ក្រុងបាវិត ខេត្តស្វាយរៀង។ ចំណែកមន្ត្រីដែលឃុបឃិតគ្នា អនុញ្ញាតិអោយនាំចូល ដោយមិនមានការបង់ពន្ធ ហើយគ្មានលិខិតអនុញ្ញាតអោយនាំចូលគឺមានឈ្មោះ យី ថុល ប្រធានគយច្រកព្រំដែនបាវិត លោក ខៀវ សារឿន មេគយតំបន់ ២ លោក ហេង សំបូរ មេគយខេត្តស្វាយរៀង និង សមត្ថកិច្ចពាក់ព័ន្ធមួយចំនួនទៀត ឃើញថាជាប្រព័ន្ធតែម្តង។
ទំនិញប្រភេទជើងមាន់ខូចគុណភាពនាំចូលខុសច្បាប់នេះ ត្រូវបានព្រះរាជអាជ្ញាអមសាលាដំបូងខេត្តស្វាយរៀង បង្កើតគណៈកម្មការចម្រុះរួមទាំងអាជ្ញាធរខេត្តស្វាយរៀង បានធ្វើការដុតបំផ្លាញចោលរួចហើយ ។ខណៈពេលនេះតំណាងអយ្យការអមសាលាដំបូងខេត្តស្វាយរៀង កំពុងចាត់ការបន្តតាមនិតិវិធីច្បាប់ ។
សូមបញ្ជាក់ផងដែរថា៖ រហូតមកដល់ពេលនេះ អគ្គនាយកដ្ឋានគយ និង រដ្ឋាករ មិនទាន់ចេញសេចក្ដីប្រកាសព័ត៌មានណាមួយ អំពីករណីនេះនៅឡើយទេ ខណៈករណីកន្លងមកឲ្យតែឃើញការចុះផ្សាយព័ត៌មានរសើប ពាក់ព័ន្ធនិងអគ្គនាយកដ្ឋានគយ និង រដ្ឋាករ គឺឃើញមានចេញសេចក្តីបំភ្លឺជាហូរហែរភ្លាមៗ ។ចុះករណីរឿងនាំចូលជើងមាន់ខូចគុណភាពគ្មានការអនុញ្ញាត និងមានការឃុបឃិតគ្នាជាប្រព័ន្ធនេះហេតុអីបានស្ងាត់ដូចចោរលួចសេះទៅវិញ?ឬមួយបានដឹងហើយធ្វើជាមិនដឹង?
សូមរំលឹកផងដែរថា កន្លងមក សម្ដេចធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជាលោកធ្លាប់បានផ្ដល់អនុសាសន៍ណែនាំ មិនអោយមានការនាំគ្រឿងក្នុង ឬ បំណែកសាច់ ឬ សាច់បង្កកចូលមកកម្ពុជាទៀតនោះទេ។
បងប្អូនមហាជនទូទាំងប្រទេសសម្តែងការហួសចិត្ត ចំពោះទង្វើរបស់មន្ត្រីគយជើងដប់ខាងលើដែលថ្លើមធំដុះមមីស ហ៊ានផ្គើននិងអនុសាសន៍ណែនាំដ៏ខ្ពង់ខ្ពស់របស់សម្តេចធិបតីនាយករដ្ឋមន្ត្រី ។
មហាជនកំពុងរងចាំមើលថា តើលោកមេគយធំប្រចាំប្រទេស នៅបន្តកាងមន្ត្រីក្រោមឱវាទកំហូចទាំងនេះ ឬ យ៉ាងណា?
