14-សីហា-2024 - ម៉ោង 02:06:PM
តាកែវ៖ ឯកឧត្តម ឯក ឆេងហួត ព្រះរាជអាជ្ញាអមសាលាដំបូងខេត្តតាកែវ នៅព្រឹកថ្ងៃ ពុធ ទី១៤ ខែ សីហា ឆ្នាំ ២០២៤នេះ បានអញ្ជើញផ្សព្វផ្សាយច្បាប់ស្ដីពីការ ប្រយុទ្ធប្រឆាំងគ្រឿង ផលប៉ះពាល់ ការលុបបំបាត់ក្មេងទំនើង និង ច្បាប់ចរាចរណ៍ផ្លូវគោក ដល់សិស្សានុសិស្ស ជាង១ពាន់នាក់ នៅវិទ្យាល័យសម្ដេចអគ្គមហាសេនាបតីតេជោហ៊ុនសែនអង្គតាសោម នៅក្នុងស្រុកត្រាំកក់។
ឯកឧត្តម ឯក ឆេងហួត ព្រះរាជអាជ្ញាអមសាលាដំបូងខេត្ត បានមានប្រសាសន៍ថា គ្រឿងញៀន គឺជាបញ្ហាដ៏ស្មុគស្មាញ ដែលរាជរដ្ឋាភិបាលកម្ពុជា បានយកចិត្តទុកដាក់យ៉ាងខ្លាំងលើបញ្ហាគ្រឿងញៀន ព្រមទាំងបានដាក់ចេញនូវវិធានការនានា ពិសេសធ្វើយ៉ាងណាបង្រ្កាបឱ្យអស់នៅករណីជួញដូរ រក្សា និងប្រើប្រាស់គ្រឿងញៀននៅទូទាំងប្រទេស។
ឯកឧត្តមព្រះរាជអាជ្ញា បានបន្តថា ក្នុងនាមយើងជាយុវជន ដែលជាទំពាំងស្នងឫស្សីត្រូវប្រកាន់ភ្ជាប់ការខិតខំប្រឹងប្រែងរៀនសូត្រដើម្បីក្លាយជាកូនល្អសិស្សល្អនិងមិត្តល្អ ហើយត្រូវឆ្លើយថាទេចំពោះគ្រឿងញៀន ក្មេងទំនើង ពិសេសក៏ត្រូវតែចូលរួមឱ្យបានផុសផុល នូវយុទ្ធនាការលុបបំបាត់ការជួញដូរ រក្សា និងប្រើប្រាស់គ្រឿងញៀន នៅក្នុងមូលដ្ឋានដោយផ្តើមចេញពីយើងទាំងអស់គ្នា ជាពិសេចូលរួមគោរពច្បាប់ចរាចរណ៍ទាំងអស់គ្នា ។
ឯកឧត្តម ឯក ឆេងហួត បានធ្វើការណែនាំ និងបណ្តុះគំនិតដល់សិស្សានុសិស្សអោយខំរៀនសូត្រ ស្តាប់ដំបូន្មានលោកគ្រូ អ្នកគ្រូ ដើម្បីឱ្យក្លាយជាកូនល្អ សិស្សល្អ ជាពលរដ្ឋល្អ ជៀសអោយផុតពីគ្រឿងញៀន ជៀសវាងការយកតាមខ្លួននូវអាវុធ ឬ ឧបករណ៍ ដែលមានគ្រោះថ្នាក់ ដូចជាកាំបិត ដាវ ។ល។ និងជៀសវាងការបង្កបទល្មើសផ្សេងៗទាំងក្នុងសាលា និងក្រៅសាលា ៕
