19-តុលា-2024 - ម៉ោង 11:10:AM
ខេត្តតាកែវ÷ ក្រោយពីបណ្ដាញសារព័ត៌មាន ចេញផ្សាយអត្ថបទពាក់ព័ន្ធនឹងភាពមិនប្រក្រតីនៃការដេញថ្លៃសាងសង់ផ្លូវបេតុងអាមេ១ខ្សែនោះរួចមក រដ្ឋបាលស្រុកទ្រាំង ហាក់ ដូចជា “ក្តៅ”ដោយបានចេញសេចក្តីបដិសេធថា ជារឿងមិនពិត ប៉ុន្តែមិនបានបង្ហាញភស្តុតាងភ្ជាប់ជាមួយនោះឡើយ។ រដ្ឋបាលស្រុកទ្រាំង គួរតែបំភ្លឺគ្រប់ចំណុចនីមួយៗជាជាងបដិសេធទាំងស្រុង ដោយគ្រាន់ តែនិយាយថា “មិនពិត”។ យ៉ាងណាក៏ដោយបណ្ដាញសារព័ត៌មានពេញចិត្តមេឌាសូមផ្សាយនូវសេចក្តីបំភ្លឺនោះទាំងស្រុង÷
រដ្ឋបាលស្រុកទ្រាំង មានកិត្តិយសសូមជម្រាបជូន ឯកឧត្តម លោកជំទាវ លោក លោកស្រី សាធារណជន អ្នកសារព័ត៌មាន ជ្រាបថា៖ កាលពីថ្ងៃទី១៨ ខែតុលា ឆ្នាំ២០២៤ រដ្ឋបាលស្រុកទ្រាំង បានឃើញការចុះផ្សាយ របស់អង្គភាព សារព័ត៌មាន Penhchetmedia បានចុះផ្សាយកាលពីវេលាម៉ោងប្រហែល ១០:៤៧នាទីព្រឹក ថ្ងៃទី១៨ ខែតុលា ឆ្នាំ២០២៤ ថា៖ លទ្ធកម្មស្រុកទ្រាំងចងមុងដេញថ្លៃ សាងសង់ផ្លូវបេតុងអាមេ១ខ្សែជាង៦០០ម៉ែត្រ ផ្ទុយពីសេចក្តីណែនាំរបស់ក្រសួងមហាផ្ទៃ។
ពាក់ព័ន្ធនិងករណីនេះ ដើម្បីចៀសវាងការភ័ន្តច្រឡំ រដ្ឋបាលស្រុកទ្រាំង មានកិត្តិយសសូមជម្រាបជូន ឯក ឧត្តម លោកជំទាវ លោក លោកស្រី សាធារណជន អ្នកសារព័ត៌មាន ជ្រាបថា៖ ក្នុងឆ្នាំ ២០២៤ នេះរដ្ឋបាលស្រុក បានដាក់ធ្វើការដេញថ្លៃតម្រោងជួសជុលផ្លូវបេតុងអាមេ១ខ្សែ ដែលមានប្រវែង ៦៥៨ម៉ែត្រ ទទឹង៥.០០ ម៉ែត្រ កម្រាស់បេតុង១៥០មម និងដាក់ស្លាកសញ្ញាចំនួន ០១កន្លែង ដែលធ្វើការបើកសំណើដេញថ្លៃនៅសាលប្រជុំរដ្ឋ បាលស្រុកទ្រាំង កាលពីថ្ងៃទី១៧ ខែតុលា ឆ្នាំ២០២៤ វេលាម៉ោង ៩:០០នាទីព្រឹក ដោយមានការចូលរួម ពី សមាជិកគណៈកម្មាធិការលទ្ធកម្មស្រុក តំណាងមន្ទីរសេដ្ឋកិច្ច និងហិរញ្ញវត្ថុខេត្ត និងក្រុមហ៊ុន បានចូលរួមដេញ ថ្លៃ ដំណើការតាមនិតិវិធីកិច្ចលទ្ធកម្មសាធារណៈ មិនដូចការចុះផ្សាយខាងលើនោះឡើយ ព្រោះរាល់ការដេញថ្លៃធ្វើនៅតាមច្បាប់លទ្ធកម្មសាធារណៈ។
ចំពោះការចុះផ្សាយរបស់អង្គភាពសារព័ត៌មាន Penhchetmedia.com បែបនេះ រដ្ឋបាល ស្រុកទ្រាំង តំណាងអោយប្រជាពលរដ្ឋក្នុងស្រុកទ្រាំង ក៏ដូចជាប្រជាពលរដ្ឋទូទាំងស្រុក សូមធ្វើការបដិសេធ ទាំងស្រុង ចំពោះការ ផ្សាយបំភ្លៃ និងបំផ្លើសការពិតនៅចំណុចដូចដែលបានផ្សាយទាំងនេះ និងបានចោទ ប្រកាន់ មកលើគណៈកម្មាធិការលទ្ធកម្មស្រុកទ្រាំង ចងមុងដេញថ្លៃ គម្រោងសាងសង់ផ្លូវបេតុងអាមេ១ខ្សែ ជាង៦០០ ម៉ែត្រ ផ្ទុយពីសេចក្តីណែនាំរបស់ក្រសួងមហាផ្ទៃ មិនមែនជាការពិតនោះទេ ព្រោះថារាល់ការដេញថ្លៃគឺធ្វើទៅតាមច្បាប់លទ្ធកម្មសាធារណៈ។
ក្នុងនាមគណៈកម្មាធិការលទ្ធកម្មនៃរដ្ឋបាលស្រុកទ្រាំង សូមបដិសេធទាំងស្រុង នូវខ្លឹមសារការចុះផ្សាយ ទាំងបំផ្លើសខាងលើ មិនមានក្រមសីលធម៌ វិជ្ជាជីវៈ ជាអ្នក សារព័ត៌មាន ដែលធ្វើឱ្យមានការ ភ័ន្តច្រឡំ អំពីមហា ជនទូទៅ ជាពិសេសប្រជាពលរដ្ឋក្នុងមូលដ្ឋានស្រុកយើងខ្ញុំ ដែលជាចេតនាធ្វើឱ្យមានភាពច្របូកច្របល់ បាត់បង់ទំនុកចិត្តដែលធ្វើឱ្យប៉ះពាល់ដល់ការដឹកនាំ ការអភិវឌ្ឍន៍ របស់រដ្ឋបាលស្រុក ដែលជាទង្វើអសកម្ម មួយរបស់រដ្ឋបាលស្រុកយើងខ្ញុំ មិនអាចទទួលយកបាន។
គួរបញ្ជាក់ថា ក្នុងសេចក្តីបំភ្លឺនេះបែរជាយកប្រជាពលរដ្ឋទូទាំងស្រុកធ្វើជាចំណាប់ខ្មាំងដែលគេសង្ស័យថា ផលប្រយោជន៍ នៃការពួនចងមុងដេញថ្លៃនោះ មិនមែនសម្រាប់ប្រជាពលរដ្ឋទូទាំងស្រុកទ្រាំងនោះឡើយ។ ប៉ុន្តែគឺជាការឃុបឃិតគ្នាដើម្បីផលប្រយោជន៍ នៃក្រុមមន្ត្រីប៉ុន្មាននាក់នោះតែប៉ុណ្ណោះ។ យ៉ាងណាក៏ដោយពេញចិត្តមេឌាយើងខ្ញុំរង់ចាំការបំភ្លឺបន្ថែមទៀត អំពីចំណុចនីមួយៗថាតើមានក្រុមហ៊ុនប៉ុន្មាន ដែលបានចូលរួមដេញថ្លៃនេះ? ហើយបានទៅក្រុមហ៊ុនណាក្នុងតម្លៃប៉ុន្មាន? តើការដេញថ្លៃនេះពិតជាបិទបាំង ឬធ្វើជាចំហ ជាសាធារណៈដោយមានការចូលរួមដឹងឮពីប្រជាពលរដ្ឋដែរឬទេ? បើប្រជាពលរដ្ឋចូលរួមមើលការដេញថ្លៃនោះ ទើបរដ្ឋបាលស្រុកអាចទាញយកប្រជាពលរដ្ឋ មកភ្ជាប់ជាមួយ បាននៅក្នុងសេចក្តីបំភ្លឺនេះ។
បន្ថែមលើនេះ ពេញចិត្តមេឌាយើងខ្ញុំបានព្យាយាមទាក់ទងទៅខាងលទ្ធកម្ម និងលោកអភិបាលស្ដីទីនៃអភិបាលស្រុកទ្រាំងដើម្បីបញ្ជាក់បន្ថែម ប៉ុន្តែមិនអាចទាក់ទងបាននៅវេលាព្រឹកថ្ងៃទី១៩ខែតុលាឆ្នាំ២០២៤នេះ៕
អត្ថបទផ្សាយ កាលពីថ្ងៃទី១៩ ខែតុលា ឆ្នាំ២០២៤ ៖ https://postkhmerasia.com/1/2523
