19-សីហា-2024 - ម៉ោង 03:12:PM
តាកែវ៖ មនុស្ស៣នាក់បានស្លាប់ជាបន្តបន្ទាប់ និងម្នាក់ទៀតត្រូវបានបញ្ចូនទៅសង្រ្គោះនៅមន្ទីរពេទ្យក្រោយពីពួកគេបានផឹកដ្រាថ្នាំមួយកន្លែងនៅក្នុងភូមិត្នោត ឃុំស្រង៉ែ ស្រុកទ្រាំងខេត្តតាកែវ។ ក្រោយកើតហេតុកម្លាំងសមត្ថកិច្ចខេត្តតាកែវ បានធ្វើការឃាត់ខ្លួនអ្នកលក់ស្រាថ្នាំម្នាក់ជាបណ្ដោះអាសន្ន ។
យោងតាមរបាយការណ៍របស់ លោកវរសេនីយ៍ទោ កប សេម អធិការនគរបាលស្រុកទ្រាំង បានឱ្យដឹងថា កាលពីថ្ងៃទី១៦ ខែសីហា ឆ្នាំ២០២៤ នៅវេលាម៉ោងប្រហែល ៨:០០ ជនរងគ្រោះចំនួន ០៦នាក់ បានផឹកស្រាថ្នាំនៅផ្ទះឈ្មោះ គឹម សុខ ភេទប្រុស អាយុ ៤៧ឆ្នាំ មានទីលំនៅភូមិត្នោត ឃុំស្រង៉ែ ស្រុកទ្រាំង ខេត្តតាកែវ មុខរបរកសិករ មានប្រពន្ធឈ្មោះ ងិន ណាន់ អាយុ ៤២ឆ្នាំ ។ ក្រោយពេលផឹកស្រារួច ជនរងគ្រោះចំនួន ០៤នាក់ មានអាការៈអស់កម្លាំងក្អួត ហូបអីមិនចូល បណ្តាលអោយជនរងគ្រោះ ០៣នាក់បានស្លាប់បាត់បង់ជីវិតបន្តបន្ទាប់ និងម្នាក់ទៀតត្រូវបញ្ជូនទៅសង្រ្គោះនៅមន្ទីរពេទ្យបង្អែកខេត្តតាកែវ។
លោកអធិការស្រុកទ្រាំង បន្តថា ជនរងគ្រោះទាំង ៣នាក់ រស់នៅភូមិត្នោត ឃុំស្រង៉ែ ស្រុកទ្រាំង ខេត្តតាកែវ ដែលជនរងគ្រោះទី១ ឈ្មោះ គឹម សុខលាង ភេទប្រុស អាយុ៤០ឆ្នាំ ស្លាប់ នៅវេលាម៉ោង២២និង០០ថ្ងៃទី១៨, ទី២ឈ្មោះ ហ៊ឹម ទិត្យ ភេទប្រុស អាយុ៣៨ឆ្នាំ ស្លាប់ នៅវេលាម៉ោង៦និង៣០ព្រឹកថ្ងៃទី១៧ និងទី៣ឈ្មោះ ងឹម ភា ភេទប្រុស អាយុ ៥១ឆ្នាំ ស្លាប់ នៅវេលាម៉ោង៩និង៣០នាទីព្រឹកថ្ងៃទី១៧។
លោកវរសេនីយ៍ទោ កប សេម អធិការស្រុកទ្រាំង បានបន្ថែមថា ដោយមានការសម្របសម្រួលនីតិវិធីពី ឯកឧត្តម ឯក ឆេងហួត ព្រះរាជអាជ្ញាអមសាលាដំបូងខេត្តតាកែវ នៅថ្ងៃទី១៨ ខែសីហា ឆ្នាំ២០២៤ សមត្ថកិច្ចជំនាញបានឃាត់ខ្លួនឈ្មោះ ងិន ណាន់ ដកហូតវត្ថុតាង ដើម្បីកសាងសំណុំរឿងតាមនីតិវិធី។ ចំពោះវត្ថុតាងជាស្រាថ្នាំ មន្រ្តីជំនាញបានបញ្ជូនទៅសាខាការពារអ្នកប្រើប្រាស់ កិច្ចការប្រកួតប្រជែង និងបង្រ្កាបការក្លែងបន្លំ ក.ប.ប ដើម្បីយកទៅពិនឹត្យ។
ជុំវិញករណីនេះដែរ លោក លៀង សុភា ប្រធានសាខាការពារអ្នកប្រើប្រាស់ កិច្ចការប្រកួតប្រជែង និងបង្រ្កាបការក្លែងបន្លំ (ក.ប.ប) ខេត្តតាកែវ បានឱ្យដឹងថា ក្រោយទទួលបានព័ត៌មាន ករណីសង្ស័យពុលស្រាថ្នាំ នៅឃុំស្រង៉ែ ស្រុកទ្រាំងនោះ មន្រ្តីជំនាញសាខាបានចុះទៅយកសំណាក មកធ្វើការពិនិត្យនៅអគ្គនាយកដ្ឋាន រាជធានីភ្នំពេញ ប៉ុន្តែកំពុងធ្វើការពិសោធន៍ និងវិភាគមិនទាន់ទទួលបានលទ្ធផលនោះទេ៕
