31-មិនា-2025 - ម៉ោង 01:34:PM
កណ្តាល៖ ប្រភពបែកធ្លាយពីមន្ត្រីគយក្នុងខេត្តកណ្ដាល មួយចំនួនបានបង្ហើបឲ្យដឹងថា លោក សំ កុសល មិនដែលបានចាត់វិធានការបង្ក្រាបក្រុមឈ្មួញដឹកជញ្ជូនទំនិញគេចពន្ធ និងបង់ពន្ធមិនគ្រប់ឆ្លងកាត់ខេត្តកណ្ដាលទេ ប្រហែលជាខំប្រមូលចូលហោប៉ៅលោកទេដឹង?ព្រោះលោកប្រហែលជាចំណាយដើមទុនយ៉ាងច្រើនក្នុងការទទួលបានតំណែងជាប្រធានសាខាគយខេត្តកណ្ដាលហើយមើលទៅ! ទើបខំប្រឹងស្រង់ដើមតាមរបៀបពុករលួយដោយគ្មានញញើតអ្វីទាំងអស់បែបនេះនោះ។
ប្រភពដែលស្និទ្ធនឹងលោក សំ កុសល បានឲ្យដឹងថា ក្រោយពេលទទួលបានតំណែងជាប្រធានសាខាគយខេត្តកណ្ដាល គឺលោក កំពុងខំប្រមូលលុយយ៉ាងសុខស្រួលពីរក្រុមឈ្មួញដឹកជញ្ជូនទំនិញឆ្លងកាត់ផ្លូវជាតិលេខ១ ផ្លូវជាតិលេខ២ ផ្លូវជាតិលេខ៣ ផ្លូវជាតិលេខ៤ ផ្លូវជាតិលេខ៥ និងផ្លូវជាតិផ្សេងៗទៀតចូលមករាជធានីភ្នំពេញ។ ជាក់ស្ដែងតាំងពីទទួលបានតំណែងជាប្រធានសាខាគយខេត្តកណ្ដាល លោក សំ កុសល មិនដែលចាត់វិធានការបង្ក្រាបក្រុមឈ្មួញដឹកជញ្ជូនទំនិញគេចពន្ធ ទំនិញបង់ពន្ធមិនគ្រប់ ឬទំនិញខុសច្បាប់នោះទេ គឺមានតែសម្របសម្រួលឲ្យឈ្មួញទាំងនោះដឹកទំនិញទៅដល់គោលដៅប្រកបដោយសុវត្ថិភាព ទន្ទឹមនឹងនេះនៅច្រកជ្រៃធំ និងច្រកផ្សេងៗទៀត ក្រុមឈ្មួញអាចនាំចូលទំនិញគេចពន្ធនិងទំនិញបង់ពន្ធមិនគ្រប់យ៉ាងរលូន ផងដែរ។
ប្រភពពីមន្ត្រីគយក្នុងខេត្តកណ្ដាលបានឲ្យដឹងថាក្រុមឈ្មួញធំៗដែលដឹកជញ្ជូនទំនិញគេចពន្ធទំនិញបង់ពន្ធមិនគ្រប់ និងទំនិញខុសច្បាប់ ឆ្លងកាត់ផ្លូវជាតិនានាចូលមករាជធានីភ្នំពេញ សុទ្ធតែមានទំនាក់ទំនងស្អិតរមួតជាមួយលោក សំ កុសល ដើម្បីជាការសម្រួលដល់ អាជីវកម្មរបស់ពួកគេ លើសនេះទៅទៀតលោកមេគយរូបនេះបានបើកដៃឲ្យក្រុមមន្ត្រីគយចល័តក្នុងខេត្តកណ្ដាល គាបយកលុយពីក្រុមឈ្មួញនិងក្រុមអាជីវករដឹកជញ្ជូនទំនិញឆ្លងកាត់ផ្លូវជាតិជាច្រើនខ្សែ ក្នុងខេត្តកណ្ដាលស្រេចតែអំពើចិត្ត បើទោះបីឈ្មួញខ្លះដឹកជញ្ជូនទំនិញបង់ពន្ធត្រឹមត្រូវនៅច្រកព្រំដែនរួចហើយក៏ដោយ ជាកស្តែងគឺនៅចំណុចគោលដៅដីក្រហមព្រំប្រទល់ជាប់ជាមួយខេត្តតាកែវតែម្តង។
ប្រភពពីសមត្ថកិច្ចពាក់ព័ន្ធក្នុងខេត្តកណ្ដាល បានឲ្យដឹងផងដែរថាលោក សំ កុសល ឡើងកាន់តំណែងជាប្រធានសាខាគយខេត្តកណ្ដាលមួយរយៈកន្លងមកនេះ មិនទាន់ចាត់វិធានការបង្ក្រាបក្រុមឈ្មួញដឹកជញ្ជូនទំនិញគេចពន្ធទំនិញបង់ពន្ធមិនគ្រប់ និងទំនិញខុសច្បាប់បានមួយករណីណានៅឡើយទេ។
ចំពោះករណីខាងលើនេះសូមស្នើឲ្យលោក អូន ព័ន្ធមុនីរ័ត្ន រដ្ឋមន្ត្រីក្រសួងសេដ្ឋកិច្ចនិងហិរញ្ញវត្ថុ ក៏ដូចជាលោក គុណ ញឹម អគ្គនាយកនៃអគ្គនាយកដ្ឋានគយនិងរដ្ឋាករកម្ពុជាមេត្តាពិនិត្យមើលផង មិនគួរបណ្ដែតបណ្ដោយឲ្យលោក សំ កុសល ប្រធានសាខាគយខេត្តកណ្ដាលតរូបនេះ ធ្វើអ្វីៗតាមអំពើចិត្តនោះឡើយ ព្រោះថា ក្រោមការដឹកនាំរបស់រាជរដ្ឋាភិបាលអាណត្តិទី៧ តំណាក់កាលទី១ ដែលបន្តដឹកនាំដោយសម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តីនៃកម្ពុជា លោកបាននឹងកំពុងខិតខំយកចិត្តទុកដាក់ណាស់ ក្នុងការគៀងគររកដៃគូវិនិយោគបរទេស មកធ្វើការបណ្តាក់ទុនក្នុងប្រទេស ឲ្យប្រជាជនកម្ពុជាយើងមានការការងារធ្វើ ដោយពុំចាំបាច់ចំណាកស្រុកទៅឆ្ងាយចោលគ្រួសារប្រពន្ធកូន។ចុះហេតុអីព្រោះតែលោកមេគយ សំ កុសល តែម្នាក់សោះ ទុកឲ្យបង្ករការរំខាន និងប៉ះពាល់ដល់សេដ្ឋកិច្ចជាតិខ្លាំងបែបនេះ ។
ជាចុងក្រោយ ក៏សូមស្នើទៅដល់ខាងអង្គភាពប្រឆាំងអំពើពុករលួយ (អ.ប .ព ) ឬហៅថា (A C.U)មេត្តាជួយពិនិត្យស្រាវជ្រាវ ឲ្យបានច្បាស់ទៅលើលោកមេគយខេត្តកណ្តាល សំ កុសល នេះផង ៕
