08-ធ្នូ-2025 - ម៉ោង 01:16:PM
តាកែវ៖ លោក វ៉ី សំណាង អភិបាលខេត្តតាកែវ បានធ្វើការប្រកាសថ្កោលទោសយ៉ាងដាច់អហង្កការចំពោះកងទ័ពឈ្លានពានសៀមដែលបានបើកការបាញ់ប្រហារមកលើកម្ពុជាដោយរំលោភលើកិច្ចព្រមព្រៀងសន្តិភាពដែលភាគីសៀមបានចុះហត្ថលេខានៅប្រទេសម៉ាឡេស៊ី កាលពីចុងខែតុលាកន្លងទៅ ក្រោមការសម្របសម្រួលពីលោកប្រធានាធិបតីអាមេរិក លោក ដូណាល់ ត្រាំ និងលោក អាន់វ៉ា អ៊ីប្រាហ៊ីម នាយករដ្ឋមន្រ្តីម៉ាឡេស៊ីនិងជាប្រធានអាស៊ាន។
ថ្លែងនៅក្នុងកិច្ចប្រជុំក្រុមប្រិក្សាខេត្តតាកែវនៅព្រឹកថ្ងៃ ច័ន្ទ ទី ៨ ខែ ធ្នូ ឆ្នាំ ២០២៥នេះ លោក វ៉ី សំណាង បានថ្លែងបន្តថា «ក្នុងនាមប្រជាពលរដ្ឋទូទាំងខេត្តតាកែវជាង១លាននាក់និងប្រជាពលរដ្ឋកម្ពុជាទូទាំងប្រទេស យើងសូមធ្វើការថ្កោលទោសយ៉ាងដាច់អហង្កការចំពោះទាហ៊ានឈ្លានពានសៀមដែលបើកការវាយប្រហាររំលោភលើអធិបតេយ្យភាពកម្ពុជាម្ដងហើយម្ដងទៀត បើទោះបីជាកម្ពុជាខិតខំអត់ធ្មត់តាមរយៈការអនុវត្តយ៉ាងខ្ជាប់ខ្ជូននូវកិច្ចព្រមព្រៀងសន្តិភាពរវាងប្រទេសទាំង២នៅប្រទេសម៉ាឡេស៊ី»។
គួររំលឹកថា រយៈពេល២ថ្ងៃមកហើយដែលយោធាថៃ បានបើកការវាយប្រហារមកលើកម្ពុជា ដោយម្សិលមិញកងទ័ពថៃ បានវាយប្រហារនៅទីតាំងព្រលានថ្ម ក្នុងស្រុកជាំក្សាន្ត ខេត្តព្រះវិហារ ហើយនៅព្រឹកថ្ងៃច័ន្ទនេះ ចាប់តាំងពីវេលាម៉ោងប្រមាណ ០៥:០៤នាទី ថៃបានបើកការបាញ់ប្រហារមកលើកងកម្លាំងកម្ពុជា នៅក្នុងតំបន់អានសេះ ខេត្តព្រះវិហារ បន្ទាប់មកបាញ់នៅប្រាសាទតាមាន់ធំ ដោយប្រើប្រាស់រថ្តក្រោះបាញ់ចូលជាច្រើន និងនៅតំបន់ប្រាសាទព្រះវិហារ នៅចំណុច៥មករា និងនៅចំការចេក។
ទាក់ទងទៅនិងការបាញ់ប្រហាររំលោភឈ្លានពាននេះ អ្នកនាំពាក្យក្រសួងការពារជាតិកម្ពុជាលោកស្រី ម៉ាលី សុជាតា បានចាត់ទុកថា សកម្មភាព នេះធ្វើឡើងបន្ទាប់ពីយោធាថៃបានធ្វើសកម្មភាពបង្កហេតុជាច្រើនរាប់មិនអស់ច្រើនថ្ងៃមកហើយ ជាពិសេសឧបទវហេតុកាលពីម្សិលមិញនៅព្រលានថ្ម ក្នុងចេតនាញុះញង់ដើម្បីនាំដល់ការប៉ះទង្គិចគ្នា។ ដោយឈរលើស្មារតីនៃការគោរពរាល់កិច្ចព្រមព្រៀងដែលបានឯកភាពគ្នា និងការដោះស្រាយជម្លោះដោយសន្តិវិធី ស្របតាមច្បាប់អន្តរជាតិ នៅក្នុងឧប្បត្តិហេតុលើកទីពីរនោះ កងកម្លាំងកម្ពុជាក៏មិនបានធ្វើការបាញ់តបតឡើយ និងកំពុងបន្តតាមដានលើការវិវត្តនេះយ៉ាងប្រុងប្រយ័ត្ន និងយកចិត្តទុកដាក់ខ្ពស់បំផុត៕
