28-តុលា-2025 - ម៉ោង 03:24:PM
តាកែវ៖លោក កង ជឿន អនុប្រធានស.ស.យ.ក ស្រុកគិរីវង់ បានស្នើដោយទទូចដល់អាជ្ញាធរ រួមនឹងមន្រ្តីពាក់ព័ន្ធ ពិសេសមន្រ្តីជំនាញ ក.ប.ប បន្តចុះត្រួតពិនិត្យ និងជម្រុញដល់គ្រប់គ្រឹះស្ថានសិក្សាទាំងរដ្ឋ និងឯកជនទាំងអស់ យកចិត្តទុកដាក់ និងត្រូវណែនាំដល់អ្នកលក់ដូរចំណីអាហារ ត្រូវលក់ចំណីអាហារណា ដែលមិនប៉ះពាល់ដល់សុខភាពសិស្ស ស្របទៅតាមការណែនាំរបស់ក្រសួងអប់រំ។
ថ្លែងនៅចំពោះមុខ សមាជិកក្រុមប្រឹក្សាខេត្ត គណៈអភិបាលខេត្ត រួមនឹងមន្រ្តីពាក់ព័ន្ធជាច្រើនរូបទៀត នៅក្នុងវេទិការពិគ្រោះយោបល់ របស់ក្រុមប្រឹក្សាខេត្តតាកែវ ដែលរៀបចំឡើងនៅស្រុកសាលាគិរីវង់ នាព្រឹកថ្ងៃទី២៨ ខែតុលា ឆ្នាំ២០២៥ លោក កង ជឿន អនុប្រធានស.ស.យ.ក ស្រុកគិរីវង់ បានថ្លែងថាកន្លងមកនេះសង្កេតឃើញថា នៅតាមបណ្ដាសាលារៀនមួយចំនួន ហាក់មិនសូវយកចិត្តទុកដាក់លើបញ្ហាចំណីអាហារសិស្សនេះទេ ពោលបណ្ដែតបណ្ដោយឱ្យអាជីវករលក់ដូរ លក់ចំណីអាហារដែលគ្មានប្រភពច្បាស់លាស់ គ្មានកាលបរិច្ឆេទត្រឹមត្រូវ ដែលវាធ្វើអោយប៉ះពាល់ដល់សុខភាពសិស្ស ពិសេសកុមារតូចៗពេលយកទៅបរិភោគ ។ ដូច្នេះសូមមន្ទីរអប់រំខេត្ត រួមនឹងមន្រ្តីពាក់ព័ន្ធ បន្តផ្សព្វផ្សាយ និងណែនាំដល់បងប្អូនអាជីវករទាំងអស់ មុននឹងយកចំណីអាហារមកលក់ត្រូវគិតគូរពីសុខភាពសិស្សផង កុំដើម្បីតែផលប្រយោជន៍ខ្លួនឯងពេក។
ឆ្លើយតបនឹងបញ្ហានេះ លោក ស៊ុត ខុន អភិបាលរងខេត្ត ក៏បានជម្រុញដល់មន្ទីរអប់រំ សហការជាមួយអាជ្ញាធរស្រុក ពិសេសថ្នាក់ដឹកនាំសាលារៀន ត្រូវបង្កើនសកម្មភាពចុះត្រួតពិនិត្យជាប្រចាំ នៅតាមទីតាំងលក់ដូរក្នុងសាលារៀនរបស់ខ្លួន និងត្រូវធ្វើកិច្ចសន្យាជាមួយអ្នកលក់ដូរ ក្នុងករណីលក់ចំណីអាហារណាដែលក្រសួងអប់រំបានហាមឃាត់ ពោលកន្លែងលក់ដូរទាំងអស់ ត្រូវតែស្អាត និងមានអនាម័យល្អ ដើម្បីធានាបាននូវសុខភាពដល់ប្អូនៗសិស្សានុសិស្ស និងបង្កើនទំនុកចិត្តដល់អាណាព្យាបាលពួកគាត់ផងដែរ៕
