22-សីហា-2020 - ម៉ោង 09:37:AM
ភ្នំពេញ៖ យោងតាមការបញ្ជាក់ពីលោក យឹម តាស្រង់ នាយកចាត់ការទូទៅផលិតកម្ម Galaxy Navatra បានថ្លែងប្រាប់ PKA News ឲ្យដឹងថា លោក ព្រាប សុវត្ថិ បានសម្រេចចិត្តចូលមកផលិតកម្ម Galaxy Navatra ជាមួយកុងត្រារយៈពេល ៥ឆ្នាំ ដែលនឹងប្រព្រឹត្តទៅនៅថ្ងៃទី ២៥ ខែសីហា ឆ្នាំ២០២០ នៅឯសណ្ឋាគារ Garden City ។
ដោយក្ដីសប្បាយរីករាយនេះដែរ លោក យឹម តាស្រង់ អ្នកនិពន្ធល្បីឈ្មោះប្រចាំផលិតកម្ម Galaxy Navatra បានបន្ថែមថា ការទទួលសមាជិកថ្មីល្បីល្បាញដល់កំពូលជាង ២០ ឆ្នាំនេះ គឺមិនមែនដើម្បីប្រកួតប្រជែងលើទីផ្សារក្នុងស្រុកនោះឡើយ ប៉ុន្តែផលិតកម្មមានចក្ខុវិស័យវែងឆ្ងាយក្នុងការធ្វើឱ្យកេរ្តិ៍ឈ្មោះតារារូបនេះ ខ្ទរខ្ទារទៅដល់ប្រទេសមួយចំនួនផ្សេងទៀតក្នុងតំបន់អាស៊ី។
គេនៅមិនទាន់ដឹងនៅឡើយដែរថាកូនប្រុសទាំង ០៣នាក់របស់តារាចម្រៀងរូបនេះនឹងចាកចេញបន្តនៅពេលណា ខណៈដែលពួកគេនៅមិនទាន់ចប់កិច្ចសន្យានៅឡើយ។ តាមប្រភពក្រៅផ្លូវការលើកឡើងថាតារាចម្រៀងរូបនេះចាកចេញពីផលិតកម្មហង្សមាស ចូលច្រៀងក្នុងផលិតកម្មGalaxy Navatra ក្នុងតម្លៃខ្លួន ៣០ម៉ឺនដុល្លារអាមេរិក និងផលលាភបានពីការងារមួយចំនួនបន្ថែមទៀត។ ការចូលច្រៀងក្នុងផលិតកម្មនេះក្រោយពីតារាចម្រៀងរូបនេះបានបង្ហាញមុខក្នុងការផ្សព្វផ្សាយ និងជាភាគហ៊ុនក្នុងការលក់អចលនទ្រព្យមួយចំនួននៅជាយក្រុងជាមួយថៅកែផលិតកម្មដែលគេស្គាល់ថាជាលោកឧកញ៉ា ឡេង ណាវ៉ាត្រា។
ប្រភពបន្តថាដំណឹងនេះក៏លេចឡើងក្រោយពីការបង្ហាញភាពជិតដិតរបស់លោកព្រាប សុវត្ថិ និងឧកញ៉ាវ័យក្មេងរូបនេះដែលធ្លាប់បានធ្វើការសម្របសម្រួល និងនាំលោកព្រាប សុវត្ថិ និងកូនៗចេញទៅច្រៀងនៅប្រទេសកូរ៉េ។ ប្រភពបន្តដែរថា សូម្បីតារាចម្រៀង មាស សុខសោភា ក៏ស្ថិតក្នុងជម្រើសឲ្យចូលច្រៀងក្នុងផលិតកម្មលោកឧកញ៉ាផងដែរ បន្ទាប់ពីផលិតកម្មនេះចាប់ផ្តើមបំបុកទីផ្សារសម្រាប់តារាចម្រៀងមានស្រាប់ និងក្រោយពីតារាចម្រៀងលំដាប់ជួរមុខ ខេម លេចមុខក្នុងផលិតកម្មនេះ៕
