02-សីហា-2022 - ម៉ោង 02:26:PM
ញូយ៉ក៖ លោក ចាង ជុន អគ្គរដ្ឋទូតចិនប្រចាំអង្គការសហប្រជាជាតិ បានលើកឡើងថា ការធ្វើដំណើរទស្សនកិច្ចណាមួយរបស់លោកស្រី ណាន់ស៊ី ផេឡូស៊ី ប្រធានសភាតំណាងរាស្រ្តសហរដ្ឋអាមេរិក ឆ្ពោះទៅកាន់កោះតៃវ៉ាន់ ដែលជាខេត្តមួយនៃប្រទេសចិន នឹងបំផ្លាញ់ទំនាក់ទំនាក់មិត្តភាពរវាងចិន និងអាមេរិក ។
យោងតាមការចេញផ្សាយដោយទីភ្នាក់ងារសារព័ត៌មាន Reuters នៅថ្ងៃអង្គារ ទី២ ខែសីហា ឆ្នាំ២០២២ បានលើកឡើងដោយស្រង់សំដីរបស់ លោក ចាង ជុន បានថ្លែងនៅក្នុងសន្និសីទសារព័ត៌មានមួយនៅថ្ងៃចន្ទសប្ដាហ៍នេះ (ម៉ោងនៅញូយ៉ក) ចំពេលដែលចិនបានកាន់តំណែងជាប្រធានប្ដូរវេននៃ ក្រុមប្រឹក្សាសន្តិសុខអង្គការសហប្រជាជាតិសម្រាប់ខែសីហានេះថា វាបង្ហាញយ៉ាងច្បាស់ពីគ្រោះថ្នាក់បំផុត និងក៏ជាចលនាមួយបង្កហេតុខ្លាំងផងដែរសម្រាប់ដំណើរទស្សនកិច្ចរបស់ប្រធានសភាតំណាងរាស្រ្តសហរដ្ឋអាមេរិកលើកនេះមកកាន់កោះតៃវ៉ាន់ ។ លោកគូសបញ្ជាក់បន្ថែមទៀតថា ប្រសិនបើវាកើតឡើងពិតមែនចំពោះដំណើរទស្សនកិច្ចមួយនេះ នោះវានឹង បំផ្លាញដល់ទំនាក់ទំនងមិត្តភាពរវាងចិន និងសហរដ្ឋអាមេរិក។
គួរបញ្ជាក់ថា លោកស្រី ណាន់ស៊ី ផេឡូស៊ី ដែលបច្ចុប្បន្នកំពុងបំពេញទស្សនកិច្ចនៅសិង្ហបុរី មិនទាន់បញ្ជាក់ជាផ្លូវការថាតើលោកស្រីនឹងបំពេញទស្សនកិច្ច ទៅកាន់កោះតៃវ៉ាន់ ឬក៏យ៉ាងណានោះទេ ប៉ុន្តែបើតាមប្រព័ន្ធផ្សព្វផ្សាយអាមេរិក ប្រធានសភាតំណាងរាស្ត្រអាមេរិករូបនេះត្រូវបានគេរំពឹងថានឹងធ្វើដំណើរ ទៅតៃវ៉ាន់នៅថ្ងៃអង្គារនេះ ខណៈយោធាចិនក៏បានព្រមានដែរថានឹងចាត់វិធានការឆ្លើយតប យ៉ាងម៉ឺងម៉ាត់៕
