21-មករា-2024 - ម៉ោង 12:55:PM
តាកែវ៖ លោក អ៊ូច ភា អភិបន្ថែមបាលខេត្តតាកែវ បានថ្លែងថា សន្តិភាពជាមូលដ្ឋានគ្រឹះដ៏សំខាន់ សម្រាប់ជាមូលដ្ឋានក្នុងការកសាង និងអភិវឌ្ឍន៍ប្រទេសជាតិឱ្យកាន់តែរីកចម្រើនឡើងថែមទៀត ។
ថ្លែងនៅចំពោះមុខអ្នកចូលរួមប្រមាណជាង៦រយនាក់ នៅក្នុងឱកាសអញ្ជើញចូលរួមកម្មវិធីកាត់ឬសីមាបញ្ចុះខណ្ឌសីមាព្រះវិហារថ្មី និងសម្ពោធសមិទ្ធផលនានា ក្នុងវត្តធារាវតី (ហៅវត្តជាវប្ដីខាងកើត) មានតម្លៃជាង ៦០ម៉ឺនដុល្លារ ស្ថិតនៅភូមិជាវប្ដីខាងកើត ឃុំតាអូរ ស្រុកគិរីវង់ លោក អ៊ូច ភាអភិបាលខេត្តតាកែវ បានមានប្រសាសន៍បន្តថា សុខសន្តិភាពនេះវាពិតជាពិបាករកបានខ្លាំងណាស់សម្រាប់ប្រទេសនីមួយៗ ហើយសន្តិភាពនេះវាជាមូលដ្ឋានគ្រឹះដ៏សំខាន់ និងជាផ្នែកមួយសម្រាប់ជួយឲ្យកម្ពុជា ក្លាយទៅជាប្រទេសអភិវឌ្ឍន៍ទាំងវិស័យពុទ្ធចក្រ និងអាណាចក្រ ហើយក៏បានអំបាវនាវឲ្យបងប្អូនប្រជាពលរដ្ឋទាំងអស់ត្រូវបន្តថែរក្សានូវសុខសន្តិភាពនេះឲ្យបានគង់វង់ និងរឹងមាំយូរអង្វែង សូមបងប្អូនប្រជាពលរដ្ឋកុំភ្លេចទៅបោះឆ្នោតឲ្យបានគ្រប់ៗគ្នា ហើយបោះឆ្នោតជូនគណបក្សប្រជាជនកម្ពុជា ដើម្បីបន្តដឹកនាំប្រទេសជាតិឲ្យកាន់តែរីកចម្រើនបន្ថែមទៀត ពិសេសគឺបន្តថែរក្សាសន្តិភាពនេះឲ្យបានស្ថិតស្ថេរថែមទៀត ។
បន្ថែមពីនេះ លោក អភិបាលខេត្ត ក៏បានថ្លែងការកោតសរសើរចំពោះការ រីកចម្រើនរបស់វត្តធារាវតី (ហៅវត្តជាវប្ដីខាងកើត) និងបានថ្លែងអំណរគុណដល់ព្រះចៅអធិការ ព្រះសង្ឃគ្រប់ ព្រះអង្គ ជាពិសេស លោកជំទាវ មហាឧបាសិកាបណ្ឌិត ហ៊ុន សេងនី និងក្រុមគ្រួសារ ឯកឧត្តម លោកជំទាវ លោកឧកញ៉ា អ្នកឧកញ៉ា លោក លោកស្រី ជាពុទ្ធបរិស័ទទាំងអស់ ដែលមានសទ្ធាជ្រះថ្លាក្នុងវិស័យពុទ្ធសាសនា ដែលបានលះបង់នូវ ថវិកាផ្ទាល់ខ្លួន ចូលរួមកសាងនូវសមិទ្ធផលនានា ជាពិសេសព្រះវិហារដ៏ស្រស់ស្អាតនាពេលនេះ ទុកជាកេរ្តិ៍មរតកសម្រាប់ព្រះពុទ្ធសាសនា និងបានជាប្រយោជន៍ ដល់សាធារណៈជនទូទៅ។
លោកអភិបាលខេត្ត ក៏បានផ្តាំផ្ញើដល់ព្រះសង្ឃ សូមបន្តចូលរួមការងារសង្គមជាមួយរាជរដ្ឋាភិបាលកម្ពុជា ជាពិសេស អប់រំនូវសីលធម៌សង្គមឲ្យបានល្អផូរផង់ ធានាបាននូវសាមគ្គីភាព នៅក្នុងជួរពុទ្ធសាសនិក ដែលជាប្រការដ៏សំខាន់បំផុត និងសុំឲ្យបន្តស្មារតី ដឹងគុណនូវគោលនយោបាយឈ្នះឈ្នះ និងគាំទ្រ រាជរដ្ឋាភិបាលកម្ពុជា ក្រោមការដឹកនាំប្រកបដោយគតិបណ្ឌិតរបស់ សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា ដើម្បីទទួលបាននូវសុខសន្តិភាព និងការអភិវឌ្ឍលើគ្រប់វិស័យ។ បន្ទាប់មក លោកជំទាវ មហាឧបាសិកាបណ្ឌិត ហ៊ុន សេងនី និង លោក អ៊ូច ភា អភិបាលខេត្ត ក៏បានបំពាក់គ្រឿងឥស្សរិយយស និងមេដាយ ជូនដល់សប្បុរសជន និងបានអញ្ជើញកាត់ឫសសីមាសម្ភោធឆ្លងព្រះវិហារជាកិច្ចបញ្ចប់កម្មវិធី។
សូមជម្រាបជូនដែរថា លោកជំទាវ មហាឧបាសិកាបណ្ឌិត ហ៊ុន សេងនី និងក្រុមគ្រួសារ បានឧបត្ថម្ភអ្នកចូលរួម ៨២៣នាក់ ម្នាក់ៗទទួលបាន ថវិកា ១ម៉ឺនរៀល, ក្នុងនោះ កម្លាំងនគរបាល កម្លាំងអាវុធហត្ថ កម្លាំងសឹករងស្រុក កម្លាំងប្រជាការពារ លោកគ្រូ អ្នកគ្រូ គ្រូពេទ្យ ចំនួន ១០៥នាក់ ម្នាក់ថវិកា ៤ម៉ឺនរៀល, ដោយឡែក លោក អ៊ូច ភា អភិបាលខេត្តតាកែវ និងលោកស្រី ស្រី ប៊ុណ្ណាដាវី ចូលរួមបច្ច័យ ១០,០០០,០០០រៀល ផងដែរ៕
