17-ធ្នូ-2021 - ម៉ោង 11:17:AM
អន្តរជាតិ៖ នេះបើតាមការចេញផ្សាយដោយ ទីភ្នាក់ងារសារព័ត៌មាន Reuters នាព្រឹកថ្ងៃសុក្រ ទី១៧ ខែធ្នូ ឆ្នាំ២០២១នេះ បានឲ្យដឹងថា លោកប្រធានាធិបតីអាមេរិក ចូ បៃដិន កាលពីរថ្ងៃព្រហស្បតិ៍ បានព្រមានចំពោះការរាតត្បាតយ៉ាងឆាប់រហ័ស នៃវីរុស COVID-19 បំប្លែងថ្មី Omicron នៅរដូវរងា ជាពិសេសគឺអ្នកមិនទាន់បានការចាក់វ៉ាក់សាំង នឹងត្រូវឈឺធ្ងន់ និងស្លាប់ ប្រសិនបើឆ្លងជំងឺនេះ។
បន្ទាប់ពីបានជួបពិភាក្សា ជាមួយទីប្រឹក្សាផ្នែកសុខាភិបាលសហរដ្ឋអាមេរិក លោក ចូ បៃដិន បានប្រកាសប្រាប់ប្រជាជនថា ការចាក់វ៉ាក់សាំងដូសជំរុញ មិនមែនជារឿងថ្មីឡើយ ដូច្នេះលោកអំពាវនាវឲ្យប្រជាជនទាំងឡាយ ប្រញាប់ទៅទទួលការចាក់ឲ្យបានលឿនបំផុត។ លោកលើកឡើងថា «យើងកំពុងសម្លឹងមើលឃើញ រដូវរងាដែលពោរពេញដោយអ្នកជំងឺឈឺធ្ងន់ និងស្លាប់... ប្រសិនបើអ្នកបានចាក់វ៉ាក់សាំងពេញលេញ រួចចាក់បន្ថែមដូសជំរុញទៀតនោះ អ្នកអាចការពារខ្លួនឯងពីការឈឺធ្ងន់ និងស្លាប់បាន»។
បញ្ជាក់ថា រដ្ឋ ៣៦ ហើយ ក្នុងចំណោមរដ្ឋទាំង ៥០ របស់សហរដ្ឋអាមេរិក បានប្រកាសពីការរកឃើញវត្តមានវីរុសបំប្លែងថ្មី Omicron ដែលត្រូវបានក្រុមអ្នកវិទ្យាសាស្ត្រអន្តរជាតិជឿជាក់ថា មានសមត្ថភាពចម្លងពីមនុស្សទៅមនុស្ស លឿនរហ័សជាងវីរុសបំប្លែងខ្លួន Delta ឆ្ងាយ។
លោក ចូ បៃដិន បានលើកឡើងជាចុងក្រោយថា Omicron មិនទាន់រាតត្បាតលឿន នៅសហរដ្ឋអាមេរិកនោះឡើយ ព្រោះតែនយោបាយទប់ទល់របស់លោក មានប្រសិទ្ធភាពខ្ពស់ តែលោកនៅតែទទូចឲ្យពលរដ្ឋទៅទទួលការចាក់ វ៉ាក់សាំងដូសជំរុញ ឲ្យបានគ្រប់គ្នាៗព្រោះវាមានសារៈសំខាន់ណាស់សម្រាប់សុខភាព៕
