10-មករា-2023 - ម៉ោង 02:49:PM
ភ្នំពេញ ៖ ករណីអគ្គិភ័យឆាបឆេះឃ្លាំងលក់រថយន្តស៊េរីទំនើបមួយកន្លែង កាលពីវេលាម៉ោង៥ព្រឹក ថ្ងៃទី១០ ខែមករា ឆ្នាំ២០២៣ ស្ថិតនៅតាមបណ្ដោយផ្លូវលេខ១៨២ ក្នុងភូមិ៨ សង្កាត់ផ្សារដេប៉ូទី១ ខណ្ឌទួលគោក រាជធានីភ្នំពេញ ដែលក្នុងនោះរថយន្តស៊េរីទំនើបៗ៣គ្រឿងត្រូវបានអគ្គិភ័យឆាបឆេះខ្ទេចទាំងស្រុង និងសម្ភារជាគ្រឿងបន្លាស់រថយន្តជាច្រើនមុខទៀត ។
ប្រភពព័ត៌មានពីកន្លែងកើតហេតុបានឱ្យដឹងថា មុនកើតហេតុទីតាំងខាងលើបានចាក់សោត្រឹមត្រូវដូចសព្វដង តែមិនដឹងជាយ៉ាងម៉េចស្រាប់តែមានការឆ្លងភ្លើងឆាបឆេះយ៉ាងសន្ធោសន្ធៅតែម្ដង នេះបើតាមម្ចាស់ផ្ទះគាត់ និងប្រជាពលរដ្ឋនាំគ្នាយកបំពង់ពន្លត់អគ្គិភ័យជាច្រើនបំពង់មកបាញ់ពន្លត់ក៏មិនអាចទប់ស្ថានភាពនៃការឆេះនោះបានដែរ ។
ជាមួយគ្នានោះប្រជាពលរដ្ឋក៏បានរាយការណ៍ទៅអាជ្ញាធរមូលដ្ឋាន និងកម្លាំងជំនាញបង្ការ សង្គ្រោះអគ្គិភ័យឱ្យមកជួយធ្វើអន្តរាគមន៍ ដោយបានចេញរថយន្តពន្លត់អគ្គិភ័យជាច្រើនគ្រឿងដើម្បីធ្វើការបាញ់ទឹកពន្លត់។
ក្នុងករណី បានធ្វើឱ្យខូចខាតរថយន្តស៊េរីទំនើបចំនួន៣គ្រឿង សម្ភារនិងគ្រឿងបន្លាស់រថយន្តជាច្រើនមុខ តែមិនបង្កគ្រោះថ្នាក់ដល់មនុស្ស និងផ្ទះអ្នកជិតខាងឡើយ ។
ចំពោះមូលហេតុនៃបញ្ហាខាងលើ សមត្ថកិច្ចកំពុងធ្វើការស្រាវជ្រាវបន្ត ៕