សម្តេចក្រឡាហោម ស ខេង ៖ណែនាំដល់អាជ្ញាធរគ្រប់លំដាប់ថ្នាក់ ត្រូវបង្ក្រាបឱ្យមានប្រសិទ្ធភាពនូវទីតាំងល្បែងស៊ីសងគ្រប់ប្រភេទ

17-តុលា-2022 - ម៉ោង 10:41:AM

ព្រៃវែង៖ សម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ បានណែនាំបន្ថែមដល់មន្ត្រីពាក់ព័ន្ធគ្រប់លំដាប់ថ្នាក់ ជាពិសេសមន្ត្រីអនុវត្តច្បាប់ ត្រូវតែអនុវត្តឱ្យបានតាមបទបញ្ជារបស់សម្ដេចតេជោ ហ៊ុន សែន ធ្វើយ៉ាងណាបង្ក្រាបឱ្យមានប្រសិទ្ធភាពនូវទីតាំងល្បែងស៊ីសងគ្រប់ប្រភេទ នៅតាមមូលដ្ឋានដែលស្ថិតនៅក្រោមដែនសមត្ថកិច្ចរបស់ខ្លួន។

ការណែនាំរបស់សម្តេចក្រឡាហោម ស ខេង បានធ្វើឡើងក្នុងឱកាសដែលសម្តេចបានអញ្ជើញជាអធិបតីភាពផ្ដល់រង្វាន់ដល់ទូកដែលទទួលបានជ័យលាភី នាថ្ងៃទី១៦ ខែតុលា ឆ្នាំ២០២២ នៅខេត្តព្រៃវែង។

សម្ដេចក្រឡាហោម ស ខេង បានកោតសរសើរ និងវាយតម្លៃខ្ពស់ចំពោះការខិតខំប្រឹងប្រែងរបស់រដ្ឋបាលខេត្តព្រៃវែង ក្នុងការរៀបចំពិធីប្រណាំងទូកងដែលប្រព្រឹត្តទៅដោយរលូនរយៈពេល២ ថ្ងៃនេះ។ ដែលទាំងនេះគឺជាការបង្ករលក្ខណៈសប្បាយរីករាយដល់បងប្អូនប្រជាពលរដ្ឋខេត្តព្រៃវែង នៅក្នុងឱកាសនៃការប្រណាំងទូក «ង» ថ្នាក់ខេត្តនាឱកាសនេះ។

សម្ដេចក្រឡាហោម ស ខេង ក៏បានលើកឡើងថាទាំងនេះ គឺការចេញពីប្រទេសមានសុខសន្តិភាព មានស្ថេរភាពនយោបាយត្រឹមត្រូវក្រោមការដឹកនាំរបស់រាជរដ្ឋាភិបាលបានធ្វើឱ្យប្រជាពលរដ្ឋមានឱកាសក្នុងការប្រារព្ធពិធីផ្សេងៗ មានឱកាសក្នុងការធ្វើដំណើរទៅទីរមណីយដ្ឋាននានាផ្សេងៗ ប្រកបមុខរបររកស៊ីដោយសុវត្ថិភាព និងភាពកក់ក្តៅ។

សម្តេមក្រឡាហោម បានបន្តថា «បន្ថែមពីលើកិច្ចការរក្សាស្ថានភាពស្ថិរភាពនយោបាយ សន្តិសុខ ការលើកកម្ពស់សុខុមាលភាពរបស់ប្រជាជន និងពង្រឹងខឿនសេដ្ឋកិច្ចឱ្យកាន់តែរឹងមាំថែមទៀតនោះ រាជរដ្ឋាភិបាលបាននឹងកំពុងតែដាក់ចេញនូវវិធានការបង្ក្រាបល្បែងស៊ីសង ក្នុងក្របខ័ណ្ឌទូទាំងប្រទេស សំដៅធ្វើយ៉ាងណាទប់ស្កាត់ឱ្យខាងតែបាននូវទីតាំងល្បែងភ្នាល់គ្រប់ប្រភេទដែលជាដើមចមនាំឱ្យវិនាសហិនហោចទ្រព្យសម្បត្តិ អំពើចោរកម្ម អសន្តិសុខ រួមទាំងអំពើហិង្សាក្នុងគ្រួសារ»។

សូមបញ្ជាក់ថា ជាលទ្ធផលនៃការប្រណាំងទូក «ង» ខេត្តព្រៃវែង ឆ្នាំ២០២២នេះ ទូកទទួលបានចំណាត់ រួមមាន៖

-ចំណាត់ថ្នាក់លេខ១៖ មានចំនួន ៨ទូក (ទូកខ្នាតអន្តរជាតិ ៥ទូក និងទូកខ្នាតវែង ៣ទូក)។
-ចំណាត់ថ្នាក់លេខ២៖ មានចំនួន ១៥ទូក (ទូកខ្នាតអន្តរជាតិ ១៣ទូក និងទូកខ្នាតវែង ២ទូក)
-ចំណាត់ថ្នាក់លេខ៣៖ មានចំនួន ១៣ទូក (ទូកខ្នាតអន្តរជាតិ ៨ទូក និងទូកខ្នាតវែង ៥ទូក)
-ចំណាត់ថ្នាក់លេខ៤៖ មានចំនួន ៥ (ទូកខ្នាតអន្តរជាតិ ៤ទូក និងទូកខ្នាតវែង ១ទូក) ដោយទូក ទទួលជ័យលាភី ទទួលបាន ទង់ជ័យលាភី១ ប័ណ្ណសរសើរ១ រួមជាមួយនឹងថវិកា ក្នុងនោះទូក ង ខ្នាតវែងជ័យលាភី លេខ១ ទទួលបានថវិកា ២,០០០,០០០រៀល លេខ២ ថវិកា ១,៨០០,០០០រៀល លេខ៣ ថវិកា ១,៦០០,០០០រៀល និងលេខ៤ ថវិកា ១,៤០០,០០០រៀល សម្រាប់ទូក «ង» ខ្នាតអន្តរជាតិ ជ័យលាភីលេខ១ទទួលបាន ថវិកា ១,៤០០,០០០រៀល លេខ២ ថវិកា ១,២០០,០០០រៀល លេខ៣ ថវិកា ១០០០,០០០រៀល និងលេខ៤ ថវិកា ៨០០,០០០រៀល៕