17-មិថុនា-2022 - ម៉ោង 12:19:PM
ភ្នំពេញ ៖យោងតាមសេចក្តីជូនដំណឹងរបស់អគ្គនាយកដ្ឋានគយ និងរដ្ឋាករកម្ពុជាបានឱ្យដឹងថា ចាប់ពីថ្ងៃទី១ ខែកក្កដា ឆ្នាំ២០២២ តទៅ រថយន្តគ្មានពន្ធនឹងត្រូវធ្វើការបង្ក្រាប ។ រីឯរថយន្តចង្កូតស្ដាំ ដែលជាប្រភេទទំនិញហាមឃាត់ការនាំចូល ក្នុងករណីបង្ក្រាបបាន «នឹងត្រូវកម្ទេចចោល ឬ ដោះបំបែកជាគ្រឿងបន្លាស់»។
ក្នុងសេចក្តីជូនដំណឹងរបស់អគ្គនាយកដ្ឋានគយ និងរដ្ឋាករកម្ពុជាដដែលនេះបានឱ្យដឹងបន្តទៀតថា អនុលោមតាមខ្លឹមសារលិខិតលេខ ៤៨២ សជណ ហធ ចុះថ្ងៃទី០២ ខែកញ្ញា ឆ្នាំ២០២១ របស់រាជរដ្ឋាភិបាល និងសេចក្តីជូនដំណឹងលេខ ១៩៨៣ ២១ អគរ ចុះថ្ងៃទី១៩ ខែកញ្ញា ឆ្នាំ២០២១ របស់អគ្គនាយកដ្ឋានគយនិង រដ្ឋាករកម្ពុជា (អគរ) យុទ្ធនាការប្រមូលពន្ធ និងអាករនាំចូលលើរថយន្តគ្មានពន្ធដែលមានស្រាប់ក្នុងប្រទេស នឹងត្រូវបញ្ចប់ត្រឹម ថ្ងៃទី៣០ ខែមិថុនា ឆ្នាំ២០២២។ ក្នុងន័យនេះ អគរ សូមរំលឹកដល់ម្ចាស់រថយន្តគ្មានពន្ធមានស្រាប់ ក្នុងប្រទេសទាំងអស់ ត្រូវរួសរាន់មកបំពេញកាតព្វកិច្ចពន្ធ និងអាករ ឬតម្កល់ប្រាក់កក់ (ចំពោះរថយន្តចង្កូតស្តាំ) ឱ្យបានទាន់ថ្ងៃឱសានវាទនេះ។
ចាប់ពីថ្ងៃទី០១ ខែកក្កដា ឆ្នាំ២០២២ តទៅ អគរ នឹងអនុវត្តវិធានការបង្ក្រាបយ៉ាងម៉ឺងម៉ាត់។ ចំពោះរថយន្ត ចង្កូតឆ្វេងដែលបង្ក្រាបបាន នឹងតម្រូវឱ្យបង់ពន្ធ និងអាករ រួមទាំងប្រាក់ពិន័យតាមបទប្បញ្ញត្តិជាធរមាន។ ចំណែកឯ រថយន្តចង្កូតស្តាំដែលជាប្រភេទទំនិញហាមឃាត់ការនាំចូល ក្នុងករណីបង្ក្រាបបាននឹងត្រូវកម្ទេចចោល ឬដោះបំបែកជាគ្រឿងបន្លាស់ តាមនីតិវិធីជាធរមាន។
សូមចូលរួមគោរពនិងអនុវត្តឲ្យបានគ្រប់ៗគ្នា នូវម្ចាស់រថយន្តគ្មានពន្ធទាំងអស់ ប្រញាប់រួសរាន់ទៅបំពេញកាតព្វកិច្ចពន្ធ និងអាករនាំចូល ឱ្យបានទាន់ពេលវេលាតាមការកំណត់ដូចរៀបរាប់ខាងលើនេះ បើពុំដូច្នោះទេនឹងប្រឈមមុខក្នុងការបង្ក្រាបរបស់អគ្គនាយកដ្ឋានគយ និងរដ្ឋាករកម្ពុជាជាពុំខាន៕
