សម្ដេច ហេង សំរិន អញ្ជើញបើកសម័យប្រជុំលើកទី៧ នីតិកាលទី៦ ដើម្បីប្រកាសសុពលភាពអ្នកតំណាងរាស្ត្រមណ្ឌលកំពង់ចាមថ្មី

11-ឧសភា-2022 - ម៉ោង 11:35:AM

ភ្នំពេញ ៖ រដ្ឋសភាកម្ពុជា បានបន្តសម័យប្រជុំលើកទី៧ នីតិកាលទី៦ ដើម្បីប្រកាសសុពលភាពអ្នកតំណាងរាស្ត្រមណ្ឌលកំពង់ចាមថ្មី ជំនួសកន្លែងសម្តេច ហ៊ុន ណេង ដែលបានទទួលមរណភាព។

នាព្រឹកថ្ងៃទី១១ ខែឧសភា ឆ្នាំ២០២២ រដ្ឋសភាបានបន្តសម័យប្រជុំរដ្ឋសភាលើកទី៧ ក្រោមអធិបតីភាពសម្ដេច ហេង សំរិន ប្រធានរដ្ឋសភា ដោយមានវត្តមានសមាជិក សមាជិកាចំនួន១០៦រូប។

ក្នុងនោះមានរបៀបវារៈ សម័យប្រជុំរដ្ឋសភារួមមាន៤ចំណុច ៖ ១. ការសម្រេចអំពីសុពលភាពនៃអាណត្តិរបស់លោក ស្លេះ ពុនយ៉ាម៉ីន ជាតំណាងរាស្រ្តមណ្ឌលខេត្តកំពង់ចាម ជំនួសសម្តេច ហ៊ុន ណេង ដែលបានទទួលមរណភាព។ ២. ការបោះឆ្នោតជ្រើសតាំង លោក កែប ជុតិមា ជាសមាជិកគណៈកម្មការមហាផ្ទៃ ការពារជាតិ និងមុខងារ សាធារណៈនៃរដ្ឋសភា។ លោកខឹម ច័ន្ទគិរី ជាសមាជិកគណៈកម្មការសាធារណការ ដឹកជញ្ជូន ទូរគមនាគមន៍ ប្រៃសណីយ៍ ឧស្សាហកម្ម រ៉ែ ថាមពល ពាណិជ្ជកម្ម រៀបចំដែនដីនគរូបនីយកម្ម និងសំណង់ នៃរដ្ឋសភា។ ៣. ការពិភាក្សា និងអនុម័តសេចក្តីព្រាងច្បាប់ពីវិសោធនកម្មមាត្រា១៤០ នៃច្បាប់ស្តីពីការគ្រប់គ្រងរដ្ឋបាល រាជធានី ខេត្ត ក្រុង ស្រុក ខណ្ឌ និង ៤.ការពិភាក្សា និងអនុម័តសេចក្តីព្រាងច្បាប់ ស្តីពីសុវត្ថិភាពម្ហូបអាហារ ៕