27-វិច្ឆិកា-2021 - ម៉ោង 07:39:PM
សមត្ថកិច្ចខេត្ដសៀមរាប បានបង្ហាញមុខជនសង្ស័យជាក្រុមចោរប្លន់ប្លន់ម៉ូតូចំនួន ៣នាក់ទៀត ក្នុងចំណោមជនសង្ស័យ ៨នាក់ រួចហើយបញ្ជូនទៅតុលាការខេត្ដនេះ ដើម្បីចាត់វិធានការផ្លូវច្បាប់ កាលពីល្ងាចថ្ងៃទី២៦ ខែវិច្ឆិកា ឆ្នាំ២០២១នេះ ក្រោយពេលសមត្ថកិច្ចតាមចាប់ខ្លួនបានជាបន្ដបន្ទាប់ ក្នុងករណីប្លន់ម៉ូតូ កាលពីថ្ងៃទី៧ ខែវិច្ឆិកា ឆ្នាំ២០២១កន្លងមក។
លោកវរ:សេនីយ៍ទោ សុខ ម៉េងអ៊ាង ប្រធានការិយាល័យព្រហ្មទ័ណ្ឌកំរិទ្ធធ្ងន់ នៃស្នងការដ្ឋាននគរបាលខេត្ដសៀមរាប បានឱ្យដឹងថា កម្លាំងសមត្ថកិច្ចបានបើកប្រតិបត្តិការស៊ើបអង្កេតតាមចាប់ជនសង្ស័យ បានចំនួន ៣នាក់បន្ថែមទៀតក្នុងចំណោម ៨នាក់ ក្នុងករណីអំពើលួចមានស្ថានទម្ងន់ទោស ដោយក្រុមជនសង្ស័យមានគ្នាចំនួន ៨នាក់ បានប្រើកាំបិតប្លន់យកម៉ូតូ ២គ្រឿង កាលពីថ្ងៃទី០៧ ខែវិច្ឆិកា ឆ្នាំ២០២១កន្លងទៅ។លោកបានបន្ដថា ជនសង្ស័យចំនួន ៥នាក់ សមត្ថកិច្ចចាប់ខ្លួនបានភ្លាមៗដែលជាបទល្មើសជាក់ស្ដែង និង៣នាក់ បានរត់គេចខ្លួន ទៅជ្រកនៅខេត្ដ៣៖ មានខេត្តកំពង់ធំ, រាជធានីភ្នំពេញ និងខេត្តបាត់ដំបង។
ប៉ុន្ដែក្រោយពីមានការសហការស៊ើបអង្កេតយ៉ាងយកចិត្ដទុកដាក់ ទើបសមត្ថកិច្ចតាមចាប់ខ្លួនបាន អ្នក ៣នាក់បន្ថែមទៀត កាលពីថ្ងៃទី២៦ ខែវិច្ឆិកា ឆ្នាំ២០២១នេះ។ លោក សុខ ម៉េងអ៊ាង បានបន្ដថា ការឃាត់ខ្លួនក្នុងបទល្មើសជាក់ស្តែង ចំនួន ៥នាក់មុន បានបញ្ជូនទៅតុលាការខេត្ដសៀមរាបកាលពីថ្ងៃទី១០ ខែវិច្ឆិកា ឆ្នាំ២០២១នេះ ចំណែកជនសង្ស័យចំនួន ៣នាក់ទៀត ដែលតាមចាប់ខ្លួនបានម្សិលមុិញនោះ បានបញ្ជូនទៅតុលាការខេត្ដ នៅថ្ងៃទី២៦ ខែវិច្ឆិកា ឆ្នាំ២០២១នេះ ។
សមត្ថកិច្ចបានដកហូតវត្ថុតាងម៉ូតូជារបស់ជនរងគ្រោះចំនួន ២គ្រឿង រួចប្រគល់ជូនជនរងគ្រោះវិញ និងវត្ថុតាងកាំបិតចំនួន ១ ដែលធ្វើសកម្មភាពកាប់ជនរងគ្រោះសមត្ថកិច្ចរក្សាទុក ។ តាមចំលើយរបស់ជនសង្ស័យ ពួកគេទទួលស្គាល់ថា ពិតជាបានធ្វើសកម្មភាពប្លន់ម៉ូតូពីជនរងគ្រោះពិតប្រាកដមែន ដោយប្រព្រឹតកាលពីថ្ងៃទី០៧ ខែវិច្ឆិកា ឆ្នាំ២០២១នេះ នៅចំណុចរង្វង់មូលផ្លូវ៦០ម អង្គរឃ្យុងយូ ក្នុងសង្កាត់ស្លក្រាម ក្រុងសៀមរាប ។ ក្រោយពីមានការខិតខំប្រឹងប្រែងតាមចាប់ខ្លួនជនសង្ស័យ លោកឧត្តមសេនីយ៍ត្រី តេង ចន្ទ័ណាត ស្នងការនគរបាលខេត្តសៀមរាប បានផ្តល់រង្វាន់លើកទឹកចិត្តចំនួន ៨០ម៉ឺនរៀលដល់កងកម្លាំងសមត្ថកិច្ចរបស់ខ្លួនផងដែរ៕
