20-កញ្ជា-2021 - ម៉ោង 12:51:PM
តាកែវ៖ សាខាគយ និងរដ្ឋាករខេត្តតាកែវ បានចេញសេចក្តីជូនដំណឹងមួយ ដោយទុករយៈពេលកំណត់រហូតដល់ថ្ងៃទី ៣០ ខែមិថុនា ឆ្នាំ២០២២ ដល់ម្ចាស់យានយន្តដែលកំពុងតែប្រើប្រាស់រថយន្តគ្មានពន្ធ ឬរថយន្តជ្រកក្រោកស្លាកលេខផ្សេងៗ ត្រូវមកបំពេញកាតព្វកិច្ចបង់ពន្ធអាករឱ្យបានត្រឹមត្រូវជាមួយនឹងការអនុគ្រោះបន្ធូរបន្ថយពន្ធចំនួន ១០ភាគរយ ។
នៅក្នុងសេចក្តីជូនដំណឹងរបស់សាខាគយ និងរដ្ឋាករសាខាខេត្តតាកែវ បានបញ្ជាក់ដោយបានជូនដំណឹងដល់សាធារ ណជនក្នុងខេត្ត ជាពិសេសម្ចាស់យានយន្តជ្រក ក្រោមស្លាកលេខផ្សេងៗ ដែលមានស្រាប់ក្នុងស្រុក ( គ្មានពន្ធ និងអាករនាំចូល ) មេត្តាជ្រាបថា៖ ចាប់ពី ថ្ងៃជូនដំណឹងនេះ រហូតដល់ថ្ងៃទី៣០ ខែមិថុនា ឆ្នាំ២០២២ សាខាគយ និងរដ្ឋាករខេត្តតាកែវ នឹងទទួលបង់ពន្ធអាករនាំចូល លើយានយន្តគ្រប់ប្រភេទ (ទាំងចង្កូតស្ដាំ និងឆ្វេង) ដែលមិនទាន់បានបំពេញកាតព្វកិច្ចពន្ធនាំចូលកន្លងមក ។
នៅក្នុងសេចក្តីជូនដំណឹងដដែលនេះ បានបញ្ជាក់ថា សាធារណជូន ដែលកំពុងប្រើប្រាស់យានយន្តមិនមានពន្ធនាំចូល មេត្តារួសរាន់មកបំពេញកាតព្វកិច្ច ពន្ធអាករនាំចូល ដោយទទួលបានការលើកទឹកចិត្តដូចខាងក្រោមនេះ៖
១. ម្ចាស់យានយន្តនឹងទទួលបានការអនុគ្រោះបន្ធូរបន្ថយពន្ធចំនួន១០ភាគរយ នៃប្រាក់ពន្ធអាករសរុបដែលត្រូវបង់ ការបន្ធូរបន្ថយនេះមានឱសានវាទអនុវត្តត្រឹមថ្ងៃទី ៣១ ខែធ្នូ ឆ្នាំ២០២១ និងមិនគ្រប់ដណ្តប់លើយានយន្តមានឆ្នាំផលិត ២០២១ឡើយ។ ក្រោយរយៈពេលនេះ ម្ចាស់យានយន្តនឹងមិន ទទួលបានការបន្ធូរបន្ថយឡើយ ។
២. ចំពោះរថយន្តចង្កូតស្តាំ ម្ចាស់រថយន្តត្រូវមកតម្កល់ប្រាក់កក់ស្មើនឹងប្រាក់ពន្ធ និងអាករ សរុបដក១០ភាគរយ និងត្រូវយករថយន្តទៅកែចង្កូតពីសាំងមកឆ្វេងឱ្យបានរួចរាល់យ៉ាងយូរបំផុតត្រឹមថ្ងៃទី ៣០ ខែមិថុនា ឆ្នាំ២០២២ បន្ទាប់ ពីកែចង្កូតស្តាំ ម្ចាស់រថយន្តអាចមកទទួលបង្កាន់ដៃ និងលតាប័ត្ររថយន្តពីមន្រ្តីគយ ។
៣. ចាប់ពីថ្ងៃទី០១ ខែកក្កដា ឆ្នាំ២០២២ តទៅ យានយន្តគ្មានពន្ធដែលបង្រ្កាបបាននឹងតម្រូវឱ្យបង់ពន្ធអាករ រួមទាំងប្រាក់ពិន័យតាមលិខិតបទដ្ឋានជាធរមាន ។ ចំពោះរថយន្តចង្កូតស្តាំ ដែលជាប្រភេទរថយន្តហាមឃាត់នាំចូល ក្នុងករណីបង្រ្កាបបាននឹងត្រូវកំទេចចោល ឬដោះបំបែកជាគ្រឿងបន្លាស់ ។
៤. ម្ចាស់យានយន្តគ្មានពន្ធអាចមកបំពេញកាតព្វកិច្ច និងអាករនៅសាខាគយ និងរដ្ឋាករខេត្តតាកែវ ដែលមានអាសយដ្ឋាន បណ្ដោយផ្លូវជាតិលេខ២ ស្ថិតនៅភូមិចក សង្កាត់រកាក្នុង ក្រុងដូនកែវ ខេត្តតាកែវ៕