15-កញ្ជា-2021 - ម៉ោង 04:18:PM
ភ្នំពេញ៖ លោកស្រី ឱ វណ្ណឌីន រដ្ឋលេខាធិការ ក្រសួងសុខាភិបាល និងជាប្រធានគណៈកម្មការ ចំពោះកិច្ចចាក់វ៉ាក់សាំង កូវីដ-១៩ ក្នុងក្របខណ្ឌ ទូទាំងប្រទេស (គ.វ.ក-១៩) បានប្រាប់ក្រុមគ្រូពេទ្យ ត្រូវយកវ៉ាក់សាំងកូវីដ-១៩ ទៅចាក់ជូនប្រជាពលរដ្ឋ នៅតាមផ្ទះ បើសិនពួកគាត់ពិបាក ធ្វើដំណើរ មកទីតាំងចាក់វ៉ាក់សាំង ដែលសហការរៀបចំ ដោយអាជ្ញាធរមូលដ្ឋាន។
ក្នុងពិធីបិទបញ្ចប់យុទ្ធនាការ ចាក់វ៉ាក់សាំងការពារជំងឺកូវីដ-១៩ ជុំទី១ ទូទាំងខេត្តកោះកុង ដែលប្រារព្ធ ធ្វើឡើង នាថ្ងៃទី១៥ ខែកញ្ញា ឆ្នាំ២០២១ នៅមន្ទីរសុខាភិបាលខេត្តកោះកុង លោកស្រី ឱ វណ្ណឌីន បាន ថ្លែងថា គោលដៅចាក់វ៉ាក់សាំង ១០លាននាក់ បានរំកិលខ្លួនជិតគោលដៅហើយ។ ដូច្នេះ នៅសល់ ប្រជាពលរដ្ឋបន្ដិចបន្ដួច ខណៈ គ.វ.ក-១៩ ជំរុញរដ្ឋបាលថ្នាក់ក្រោមជាតិ សម្រង់ស្ថិតប្រជាពលរដ្ឋ មក ចាក់វ៉ាក់សាំង និងមិនទាន់មកចាក់វ៉ាក់សាំង ឲ្យបានច្បាស់លាស់ ។
លោកស្រីមានប្រសាសន៍ថា មានបងប្អូនប្រជាពលរដ្ឋមួយចំនួន មិនអាចចាក់វ៉ាក់សាំងបាន ដោយសារ ស្ថានភាព និងសុខភាពរបស់គាត់ និងកត្ដាផ្សេងៗជាដើម ទើបពួកគាត់មិនអាច ធ្វើដំណើរមកវ៉ាក់សាំង បាន ដូចជា ផ្ទះគាត់ឆ្ងាយពេក ឬខ្វះមធ្យោបាយធ្វើដំណើរ។
លោកស្រីបញ្ជាក់ថា «គ.វ.ក-១៩ បានណែនាំរដ្ឋបាលខេត្ដទាំងអស់សូមយកចិត្ដទុកដាក់ ដើម្បីជំរុញធ្វើ យ៉ាងម៉េច ឲ្យយើងគ្រប់ តាមគោលដៅកំណត់ ដោយយើងចេះបន់បែន ។ ទន្ទឹមនឹងយើងក៏មាន ទីតាំង ចល័តហើយ ក៏ប៉ុន្ដែយើងត្រូវ មើលទៅលើ ស្ថានភាពជាក់ស្ដែង ប្រសិនបើមានគ្រួសារណា ដែលគាត់ នៅឆ្ងាយ មិនអាចធ្វើដំណើរមកចាក់វ៉ាក់សាំងបាន ចឹងយើងត្រូវតែបញ្ជូនក្រុមគ្រូពេទ្យ ដើម្បីឲ្យទៅចាក់ ជូនគាត់ ដល់ទីតាំងរបស់ពួកគាត់តែម្ដង»៕