14-កញ្ជា-2021 - ម៉ោង 09:26:AM
ភ្នំពេញ៖ នៅក្នុងឱកាសបើកយុទ្ធនាការនៃការបាញ់ថ្នាំសម្លាប់មេរោគ នៅក្នុងបរិវេណវិទ្យាល័យជាស៊ីម សន្ធរម៉ុក ដែលស្ថិតនៅក្នុងសង្កាត់ទឹកល្អក់ទី១ ខណ្ឌទួលគោក រាជធានីភ្នំពេញ កាលពីថ្ងៃទី ១៣ ម្សិលមិញនេះ លោក ឃួង ស្រេង អភិបាលរាជធានីភ្នំពេញ បានប្រកាសដោយអនុញ្ញាតឱ្យបើកសាលារៀនឡើងវិញនៅថ្ងៃ១៥ខែកញ្ញា ចាប់ពីអនុវិទ្យាល័យ ដោយមិនគិតថា រដ្ឋឬឯកជននោះទេ ឱ្យតែគោរពតាមស្តង់ដារSOP របស់ក្រសួងអប់រំ ក្រោយពីបានចុះពិនិត្យជាក់ស្តែង ។
លោក ឃួង ស្រេង បន្តថា តាមអនុសាសន៍ដ៏ខ្ពង់ខ្ពស់របស់សម្តេចតេជោ ហ៊ុន សែន នាយករដ្ឋមន្រ្តីនៃកម្ពុជា ដោយការបើកសាលារៀនឡើងវិញនេះ គឺត្រូវបានគាទ្រ និងសារទរយ៉ាងពេញទំហឹង ពីសំណាក់បងប្អូនប្រជាពលរដ្ឋ ឪពុកម្ដាយ អាណាព្យាបាលសិស្ស ដោយសារកូនគាត់បានសិក្សារៀនសូត្រនៅតាមសាលាឡើងវិញ ក្រោយពីខកខាននៃការរៀន សូត្រប្រមាណ៧ខែមកនេះ ដោយការរាតត្បាតដោយជំងឺកូវីដ-១៩ ។
លោក ឃួង ស្រេង បញ្ជាក់ទៀតថា ការអនុញ្ញាតបើកសាលារៀនឡើងវិញចាប់ពីអនុវិទ្យាល័យឡើងទៅនេះ មិនថាសាលាតូចធំ រដ្ឋឬឯកជននោះទេ សំខាន់ត្រូវតែអនុវត្តឱ្យបានត្រឹមត្រូវទៅតាមប្រតិបត្តិស្តង់ដា (SOP) របស់ក្រសួងអប់រំ គឺរដ្ឋបាលរាជធានីភ្នំពេញអនុញ្ញាតឱ្យបើកដំណើរការ ឱ្យសិស្សានុសិស្សបានចូលរៀន ។ ប៉ុន្តែបើសាលាដែលមិន ទាន់បានបំពេញនូវលក្ខខណ្ឌត្រឹមត្រូវនោះទេ រដ្ឋបាលរាជ ធានីភ្នំពេញនិងជំរុញឱ្យពួក គាត់អនុវត្តឱ្យបានត្រឹមត្រូវ ទើបឱ្យបន្តការបើកសាលានេះជាបន្តបន្ទាប់ទៀត។
ជាមួយគ្នានេះដែរ លោក ឃួង ស្រេង ក៏បានអំពាវនាវទៅដល់ឪពុកម្ដាយអាណាព្យាបាលសិស្សទាំង អស់ត្រូវចូលរួមជាមួយនឹងអាជ្ញាធររាជធានីភ្នំពេញ ដើម្បីទប់ស្កាត់ឱ្យបាននូវការរីករាល ដាលជំងឺ-១៩ ខណៈបើកសា លារៀនឡើងវិញនេះ ។ បើយើងធ្វេសប្រហែសតែបន្តិច គ្រោះថ្នាក់នៃជំងឺកូវីដ-១៩ នឹងធ្លាក់មកលើពួកយើងទាំង អស់គ្នា។ ដូច្នេះយើងត្រូវតែរួមគ្នា ទប់ស្កាត់ឱ្យបាននូវការរីករាលដាលជំងឺកូវីដ-១៩នេះ ដើម្បីឈានទៅអភិវឌ្ឍប្រទេសជាតិយើងឱ្យបានរីកចម្រើនលឿនឡើងវិញ។
គួរបញ្ជាក់ផងដែរថា យុទ្ធ នាការនៃការបាញ់ថ្នាំសម្លាប់មេរោគនៅតាមបណ្ដាសាលានានានៅទូទាំងរាជធានីនេះ អាជ្ញាធររាជធានីភ្នំពេញ ត្រូវបាញ់ថ្នាំសម្លាប់មេរោគនៅសាលារដ្ឋចំនួន៦៨សាលាទូទាំង១៤ខណ្ឌ៕
