03-សីហា-2021 - ម៉ោង 09:45:AM
ភ្នំពេញ៖ ក្រសួងធនធានទឹក និងឧតុនិយម បានបញ្ជាក់ថា ចាប់ពីថ្ងៃទី៤ ដល់១០ សីហាខាងមុខនេះ កម្ពុជានឹងមានភ្លៀងធ្លាក់ ក្នុងតំបន់មួយចំនួន ដោយលាយឡំជាមួយផ្គរ រន្ទះ និងខ្យល់កន្ត្រាក់ ។
តាមសេចក្តីជូនដំណឹង របស់ក្រសួងនៅថ្ងៃ៣ សីហា បានឲ្យដឹងថា កម្ពុជាទទួលឥទ្ធិពលខ្សោយ ពីជ្រលងនៃប្រព័ន្ធសម្ពាធទាប ITCZ ដែលបានកើត និងអូសបន្លាយលើ ភាគខាងជើងប្រទេសមីយ៉ាន់ម៉ា ឡាវ និងវៀតណាម ។
ក្រសួងក៏សូមបញ្ជាក់ផងដែរថា ជាមួយគ្នានេះក៏មានខ្យល់មូសុងនិរតី បក់ក្នុងល្បឿនពីមធ្យមទៅបង្គួរ ។ស្ថានភាពបែបនេះ នឹងធ្វើឲ្យតាមបណ្តាខេត្តនៅតំបន់វាលទំនាបកណ្ដាល មានសីតុណ្ហភាពអប្បបរមាពី២៤-២៦អង្សាសេ និងសីតុណ្ហភាពអតិបរមាពី ៣២-៣៤ អង្សាសេ ។
បណ្តាខេត្តនៅភាគពាយ័ព្យ និងភាគខាងត្បូង អាចនឹងមានភ្លៀងក្នុង កម្រិតពីខ្សោយទៅមធ្យម និងបណ្តាខេត្តដទៃទៀតអាច មានភ្លៀងក្នុងកម្រិតពីតិចទៅបង្គួរ ហើយឡំទៅដោយ ផ្គរ រន្ទះ និង ខ្យល់កន្ត្រាក់ ។
ដូច្នេះសូមបងប្អូនបង្កើនការប្រុងប្រយ័ត្នឲ្យបានខ្ពស់ ប្រសិនគ្មានការអ្វីចំាបាច់ទេនោះ នៅពេលមានភ្លៀងធ្លាក់សូមកុំចេញក្រៅផ្ទះឲ្យសោះ ៕
សូមអានសេចក្ដីជូនដំណឹងរបស់ ក្រសួងធនធានទឹក ដូចខាងក្រោម៖
