20-កក្តដា-2021 - ម៉ោង 11:48:AM
តាកែវ៖ អភិបាលខេត្តតាកែវ លោក អ៊ូច ភា បានបញ្ជាឱ្យបិទវត្តសីហរតនារាមជាបណ្ដោះអាសន្ន ដែលមានទីតាំងស្ថិតនៅក្នុងសង្កាត់រកាក្នុង ក្រុងដូនកែវ បន្ទាប់ពីមន្ត្រីជំនាញសុខាភិបាលបាលបានរកឃើញព្រះសង្ឃចំនួន ១០អង្គបានឆ្លងជំងឺកូវីដ១៩ កាលពីយប់ថ្ងៃចន្ទម្សិលមិញនេះ។
ថ្លែងនៅក្នុងអញ្ជើញចុះពិនិត្យការយកសំណាកព្រះសង្ឃ ដែលមានការជាប់ពាក់ព័ន្ធផ្ទាល់ និងដោយប្រយោលនៅក្នុងវត្តសីហរតនារាមជាង ១០០អង្គនាក់បន្ថែមទៀត នៅព្រឹកថ្ងៃអង្គារ ទី២០ ខែ កក្កដា ឆ្នាំ២០២១នេះ បានមានប្រសាសន៍បន្តថា ក្រោយពីការបិទវត្តសីហរតនារាមហើយ សូមកម្លាំងសមត្ថកិច្ចយាមកាម និងហាមមិនឱ្យមានការចេញចូលវត្តជាដាច់ខាត ហើយក្នុងនោះដែរមន្រ្តីជំនាញសុខាភិបាល ត្រូវយកសំណាកព្រះសង្ឃឱ្យបានគ្រប់ៗអង្គ ម្យ៉ាងវិញទៀតចំពោះព្រះសង្ឃដែលមានវិជ្ជមានកូវីដ១៩ តម្រូវអោយសម្រាកព្យាបាលនៅក្នុងវត្តតែម្តង ។
លោកអភិបាលខេត្តតាកែវ បន្ថែមទៀតថា ស្ថានភាពកូវីដ១៩នាពេលបច្ចុប្បន្ននេះ នៅពុំទាន់ធូរស្បើយនៅឡើយ ហើយដោយឡែកសម្រាប់ខេត្តតាកែវ ក៏បន្តឆ្លងរាលដាល ដូច្នោះសូមបងប្អូនប្រជាពលរដ្ឋទាំងអស់គ្នា មេត្តាចូលរួមសហការជាមួយអាជ្ញាធរ និងក្រុមគ្រូពេទ្យ ប្រសិនបើសង្ស័យខ្លួនថា មានជាប់ពាក់ព័ន្ធដោយផ្ទាល់ឬប្រយោលជាមួយអ្នកវិជ្ជមានកូវីដ១៩ ហើយបន្តនៅដាច់ដោយឡែកពីក្រុមគ្រួសាររយៈពេល១៤ថ្ងៃ ពិសេសអនុវត្តវិធានការរបស់ក្រសួងសុខាភិបាល និងអនុវត្ត៣កុំ៣ការពារ ដើម្បីរួមគ្នាប្រយុទ្ធប្រឆាំងជំឺងឺកូវីដ១៩នេះ កុំឱ្យបន្តឆ្លងរាលដាលថែមទៀត ។
ជាមួយគ្នានេះដែរ លោក អ៊ូច ភា ក៏សូមធ្វើការអំពាវនាវ បងប្អូនប្រជាពលរដ្ឋ ពុទ្ធបរិស័ទ យាយជី តាជី ដែលបានមកសមាទានសីល ឬធ្លាប់ប្រាស្រ័យទាក់ទងជាមួយព្រះសង្ឃគង់នៅវត្តសីហរតនារាម សូមចូលរួមយកសំណាក នៅសាលាគរុកោសល្យខេត្ត ព្រមទាំងដាក់ខ្លួនដាច់ដោយឡែក (ចត្តាឡីស័ក) ពីក្រុមគ្រួសារ រយះពេល ១៤ថ្ងៃសិន ។
គួរបញ្ជាក់ថា រដ្ឋបាលក្រុងដូនកែវ នៅយប់ថ្ងៃទី១៩ ខែកក្កដា ឆ្នាំ២០២១នេះ បានចេញសេចក្ដី ប្រកាសព័ត៌មាន ស្ដីពីក្រុមគ្រូពេទ្យ នៃការិយាល័យស្រុកប្រតិបត្តិដូនកែវ បានចុះទៅយក សំណាក ព្រះសង្ឃគង់នៅក្នុងវត្ត សីហរតនារាម ចំនួន ១៨អង្គនាក់ ក្នុងចំណោមព្រះសង្ឃ ១៧០អង្គនាក់ ជាលទ្ធផល នៃការធ្វើសំណាកតេស្ដរហ័ស (Rapid Test) ឃើញថា មានវិជ្ចមានកូវីដ១៩ ចំនួន ១០អង្គនាក់ ៕
