16-កញ្ជា-2025 - ម៉ោង 11:31:AM
តាកែវ៖ លោក វ៉ី សំណាង អភិបាលនៃគណៈអភិបាលខេត្តតាកែវ និងមន្រ្តីរាជការ មន្ទីរអង្គភាពជុំវិញខេត្ត បានអញ្ជើញចូលរួមពិធីបុណ្យកាន់បិណ្ឌវេនទី៩ នៅវត្តសីហរតនារាម ស្ថិតក្នុងក្រុងដូនកែវ ខេត្តតាកែវ នាព្រឹកថ្ងៃអង្គារ៍ ទី១៦ ខែកញ្ញា ឆ្នាំ២០២៥នេះ។
ក្នុងឱកាសនោះលោក វ៉ី សំណាង អភិបាលខេត្ត បានមានប្រសាសន៍ថា ពិធីបុណ្យកាន់បិណ្ឌ និងភ្ជុំបិណ្ឌ គឺជាពិធីបុណ្យប្រពៃណីដ៏សំខាន់មួយរបស់ជាតិយើង ដែលបានបន្សល់ទុកតាំងពីបុរាណកាលមក។ ពិធីនេះមិនត្រឹមតែជាការបង្ហាញនូវជំនឿសាសនាតាមរយៈការធ្វើបុណ្យទានឧទ្ទិសកុសលជូនដល់ជីដូន ជីតា បុព្វការីជន ដែលបានចែកឋានទៅកាន់លោកខាងមុខនោះទេ តែវាក៏ជាឱកាសសម្រាប់បងប្អូនកូនចៅបានជួបជុំគ្នា ប្រមូលផ្ដុំសាមគ្គីភាព និងបង្ហាញពីការដឹងគុណចំពោះអ្នកមានគុណផងដែរ។
លោកក៏បានគូសបញ្ជាក់ អំពីសារៈសំខាន់នៃ សុខសន្តិភាព ដែលជាកត្តាចម្បងបំផុតនៃការអភិវឌ្ឍន៍ប្រទេសជាតិ និងធ្វើឲ្យប្រជាពលរដ្ឋរស់នៅយ៉ាងសុខសាន្ត អាចប្រារព្ធពិធីបុណ្យប្រពៃណីនានាប្រកបដោយបរិយាកាសរីករាយ។ជាមួយគ្នានោះ លោកបានថ្លែងអំណរគុណដល់សម្ដេចតេជោ ហ៊ុន សែន អតីតនាយករដ្ឋមន្រ្តី និងបន្តដឹកនាំ ដោយសម្តេចមហាបវរធិបតី ហ៊ុន ម៉ាណែត ជាប្រមុខដឹកនាំបន្តវេនដ៏ឆ្នើម ដែលបានបន្តថែរក្សាសុខសន្តិភាព និងការអភិវឌ្ឍន៍រីកលើគ្រប់វិស័យ ដើម្បីផ្តល់ឱកាសដល់ប្រជាពលរដ្ឋបានរស់នៅ និងប្រកបរបរចិញ្ចឹមជីវិតប្រកបដោយភាពកក់ក្តៅ។
សូមបញ្ជាក់ថា ពិធីបុណ្យកាន់បិណ្ឌ-ភ្ជុំបិណ្ឌ ត្រូវបានប្រារព្ធឡើងរយៈពេល ១៥ថ្ងៃ គិតចាប់ពីថ្ងៃ ១រោច ខែភទ្របទ រហូតដល់ថ្ងៃ ១៥រោច (ថ្ងៃភ្ជុំបិណ្ឌ)។ រយៈពេលនេះ វត្តអារាមនានានៅទូទាំងប្រទេសតែងតែទទួលបានការចូលរួមយ៉ាងផុសផុលពីសំណាក់ពុទ្ធបរិស័ទ ក្នុងការធ្វើចង្ហាន់ វេរភត្តាហារ និងបច្ច័យបួន ជូនដល់ព្រះសង្ឃ ដើម្បីឧទ្ទិសកុសលជូនបុព្វការីជន ៕
