ល្មមកាត់សាច់ស្អុយបោះចោលហើយ !​​ លោក សំ​ កុសល មេគយកំពូលប្រចាំសាខា ត្រូវគេទម្លាយថា កំពុងសម្ងំប្រមូលលុយខ្មៅដើម្បី "ស្រង់ដើមតំណែង" ដោយបើកដៃឲ្យឈ្មួញល្មើសច្បាប់នាំទំនិញចូលយ៉ាងគំហុក

8 ម៉ោងមុន

កណ្តាល៖ អំពើពុករលួយនៅសាខាគយខេត្តកណ្ដាលកំពុងក្លាយជាប្រធានបទដ៏ក្តៅគគុកដែលត្រូវបានបែកធ្លាយពីសំណាក់មន្ត្រីផ្ទៃក្នុងមួយចំនួន ដែលបានចោទប្រកាន់ចំៗទៅលើលោក សំ កុសល ប្រធានសាខាគយរូបនេះ ថាបានប្រើតំណែងជាខែលការពារ និងប្រមូលផលប្រយោជន៍ផ្ទាល់ខ្លួនយ៉ាងមហិមា។
ប្រភពរឹងមាំបានបង្ហើបថា លោក សំ កុសល ទំនងជាបានចំណាយដើមទុនដ៏ច្រើនសន្ធឹកសន្ធាប់ដើម្បីទទួលបានកៅអីជាប្រធានសាខាគយខេត្តកណ្ដាល ទើបលោកកំពុងប្រឹងប្រែង ស្រង់ដើម តាមរយៈការប្រព្រឹត្តអំពើពុករលួយដោយគ្មានញញើតអ្វីទាំងអស់។ ការស្រង់ដើមនេះ គឺតាមរយៈការទទួលលុយខ្មៅពីក្រុមឈ្មួញទុច្ចរិត ដែលដឹកជញ្ជូនទំនិញគេចពន្ធ បង់ពន្ធមិនគ្រប់ ឬទំនិញខុសច្បាប់ឆ្លងកាត់ខេត្តកណ្ដាល។

រឿងអាស្រូវនេះកាន់តែធ្ងន់ធ្ងរនៅពេលដែលប្រភពជិតស្និទ្ធបានអះអាងថា លោក សំ កុសល មិនដែលបានបង្ក្រាប ក្រុមឈ្មួញទាំងនេះទេ ផ្ទុយទៅវិញមានតែកិច្ច សម្របសម្រួល និងបើកដៃ ឲ្យពួកគេដឹកជញ្ជូនទំនិញយ៉ាងរលូនចូលមករាជធានីភ្នំពេញ ឆ្លងកាត់តាមបណ្តាញផ្លូវជាតិសំខាន់ៗដូចជា ផ្លូវជាតិលេខ១, ២, ៣, ៤, ៥ និងច្រកសំខាន់ៗផ្សេងទៀតដូចជា ច្រកជ្រៃធំ ជាដើម។ សកម្មភាពនេះធ្វើឲ្យក្រុមឈ្មួញល្មើសច្បាប់ទាំងនោះមានទំនាក់ទំនងស្និទ្ធស្នាលជាមួយលោកមេគយរូបនេះ ដើម្បីបន្តអាជីវកម្មខុសច្បាប់របស់ពួកគេដោយគ្មានការរំខាន។
មិនតែប៉ុណ្ណោះ លោក សំ កុសល ក៏ត្រូវបានចោទថា បាន អនុញ្ញាត និងបើកដៃ ឲ្យមន្ត្រីគយចល័តក្រោមឱវាទរបស់ខ្លួន ប្រើអំណាច គាបយកលុយ ពីក្រុមឈ្មួញ និងអាជីវករដឹកជញ្ជូនទំនិញឆ្លងកាត់ក្នុងខេត្តកណ្ដាល តាមអំពើចិត្ត ទោះបីពួកគេបង់ពន្ធត្រឹមត្រូវរួចហើយក៏ដោយ។ គោលដៅជាក់ស្តែងដែលមន្ត្រីទាំងនេះប្រមូលលុយយ៉ាងព្រហើន គឺនៅចំណុច ដីក្រហម ព្រំប្រទល់ខេត្តតាកែវ។
តាមការបញ្ជាក់ពីសមត្ថកិច្ចពាក់ព័ន្ធ បានលាតត្រដាងថា ក្នុងអំឡុងពេលនៃការកាន់តំណែងរបស់លោក សំ កុសល កន្លងមកនេះ មិនទាន់មានករណីបង្ក្រាប ទំនិញគេចពន្ធ ឬទំនិញខុសច្បាប់ធំៗណាមួយត្រូវបានធ្វើឡើងនោះទេ ដែលជាសញ្ញាមួយបង្ហាញយ៉ាងច្បាស់អំពីភាពអសកម្ម ឬការឃុបឃិត។
ករណីពុករលួយដ៏ធ្ងន់ធ្ងរនេះ កំពុងធ្វើឲ្យចំណូលជាតិត្រូវបាត់បង់យ៉ាងគំហុក និងប៉ះពាល់យ៉ាងខ្លាំងដល់កិច្ចខិតខំប្រឹងប្រែងរបស់រាជរដ្ឋាភិបាលអាណត្តិទី៧ ដែលដឹកនាំដោយសម្ដេចធិបតី ហ៊ុន ម៉ាណែត ក្នុងការទាក់ទាញការវិនិយោគ និងលើកកម្ពស់សេដ្ឋកិច្ចជាតិ។
ហេតុនេះ សូមអំពាវនាវជាបន្ទាន់ទៅកាន់ ឯកឧត្តម អូន ព័ន្ធមុនីរ័ត្ន រដ្ឋមន្ត្រីក្រសួងសេដ្ឋកិច្ចនិងហិរញ្ញវត្ថុ និង ឯកឧត្តម គុណ ញឹម អគ្គនាយកនៃអគ្គនាយកដ្ឋានគយនិងរដ្ឋាករកម្ពុជា មេត្តាកុំបណ្ដែតបណ្ដោយឲ្យលោក សំ កុសល បន្តធ្វើអ្វីៗតាមអំពើចិត្តរបស់ខ្លួនតទៅទៀត។
ជាពិសេស សូមស្នើឲ្យ អង្គភាពប្រឆាំងអំពើពុករលួយ (អ.ប.ព ឬ ACU) បើកការស៊ើបអង្កេត និងវែកមុខរកការពិតឲ្យបានច្បាស់លាស់ទៅលើទង្វើដ៏ស្មោកគ្រោករបស់លោក សំ កុសល មេគយសាខាខេត្តកណ្តាលរូបនេះជាប្រញាប់!