15-កញ្ជា-2021 - ម៉ោង 04:12:PM
កំពង់ចាម៖ អភិបាលខេត្តកំពង់ចាម លោក អ៊ុន ចាន់ដា បានថ្លែងថា រដ្ឋបាលខេត្តកំពង់ចាម ត្រៀម ឧបត្ថម្ភសម្ភារសម្រាប់ការពារ ការឆ្លងជំងឺកូវីដ១៩ ដល់គ្រប់សាលារៀន នាពេលបើកឲ្យសិស្ស ចូល រៀននៅថ្ងៃទី២០ ខែកញ្ញា ខាងមុខនេះ។
អភិបាលខេត្តកំពង់ចាមលោក អ៊ុន ចាន់ដា ការថ្លែងទ្បើងដូច្នេះក្នុងឱកាសដែលលោកអញ្ជើញចុះពិនិត្យ និងជួបសំណេះសំណាល ជាមួយអាណាព្យាបាលសិស្ស និងសិស្ស នៃវិទ្យាល័យជួនណាត៩១រូប ដែលបានទទួលអាហា រូបករណ៍សិក្សាបន្ត នៅព្រឹកថ្ងៃទី១៥ ខែកញ្ញា ឆ្នាំ២០២១ នៅវិទ្យាល័យជួនណាត ស្ថិតក្នុងឃុំក្រឡា ស្រុកកំពង់ សៀម ។
លោកអភិបាលខេត្តបន្តថា បើទោះជាប្រទេសជាតិកំពុងស្ថិតនៅក្នុងបរិបទកូវីដ១៩ យ៉ាងណាក៏ដោយ ក៏រាជរដ្ឋា ភិបាលនៅតែយកចិត្តទុកដាក់ លើកកំពស់លើវិស័យសិក្សានេះ ឱ្យនៅតែបន្តដំណើរការ ដូចឃើញស្រាប់ហើយថា កន្លងមកនេះបានបង្កើតជាកម្មវិធី ឱ្យសិស្សសិក្សាតាមប្រព័ន្ធអនឡាញជាដើម។
លោក បញ្ជាក់ថា វិស័យបណ្ដុះបណ្ដាលធនធានមនុស្សនេះជាអទិភាព ដើម្បីលើកកម្ពស់គុណភាពសិក្សាសម្រាប់យុវជនយើង ដែលជាទំពាំងស្នងឬស្សី សម្រាប់ការអភិវឌ្ឍន៍ប្រទេសជាតិរបស់យើងទៅថ្ងៃអនាគត់ ដូច្នេះសូមឲ្យក្មួយៗទាំងអស់ ត្រូវខិតខំប្រឹងប្រែងរៀនសូត្រ ។
លោកបានឲ្យដឹងផងដែរថា ការបើកឲ្យសិស្សចូលរៀននៅក្នុងថ្ងៃទី២០ ខែកញ្ញា ខាងមុខនេះ រដ្ឋបាលខេត្តបានចែកចេញជាពីរដំណាក់កាល គឺទី១ បើកចាប់ពីកម្រិតអនុវិទ្យាល័យឡើង ដែលមានចំនួន១២៣ សាលាទូទាំងខេត្តកំពង់ចាម ហើយនោះផងដែរ រដ្ឋបាលខេត្តក៏ត្រៀមឧបត្ថម្ភគាំទ្រនូវសម្ភារៈសម្រាប់ការពារ ការឆ្លងជំងឺកូវីដ១៩ មានដូចជា៖ ម៉ាស, អាល់កុល និងសម្ភារផ្សេងៗទៀតជាបន្តបន្ទាប់ ក្នុងពេលដែលចាប់ផ្ដើមដំណើរការនាពេលខាងមុខនេះ។ ចំណែកផ្នែកបឋមសិក្សា គឺបើកនៅដំណាក់កាលទី២ នៅថ្ងៃទី១១ ខែតុលា ពេលបុណ្យភ្ជុំបិណ្ឌរួច ៕