16-កញ្ជា-2025 - ម៉ោង 10:59:AM
តាកែវ៖ លោកទេសរដ្ឋមន្រ្តី កែវ រ៉េមី ប្រធានគណៈកម្មការសិទ្ធិមនុស្សកម្ពុជា បានថ្លែងក្នុងសិក្ខាសាលាមួយនៅខេត្តតាកែវថា ប្រទេសថៃបានប្រព្រឹត្តការរំលោភបំពានយ៉ាងធ្ងន់ធ្ងរលើច្បាប់សិទ្ធិមនុស្ស និងច្បាប់អន្តរជាតិផ្សេងទៀត។ ឯកឧត្តមបានលើកឡើងថា ក្នុងសង្គ្រាមកន្លងមក ភាគីថៃបានប្រើប្រាស់គ្រប់ឧបាយកល រួមទាំងការចាប់ខ្លួនទាហានខ្មែរ ១៨ នាក់ដោយខុសច្បាប់ បន្ទាប់ពីការអនុវត្តបទឈប់បាញ់។
ថ្លែងក្នុងពិធីបើកសិក្ខាសាលាផ្សព្វផ្សាយរបាយការណ៍ជាតិស្ដីពីការអនុវត្តកតិកាសញ្ញាអន្តរជាតិស្ដីពីសិទ្ធិសេដ្ឋកិច្ច សង្គម និងវប្បធម៌ (ICESCR) នៅព្រឹកថ្ងៃទី១៥ ខែកញ្ញា ឆ្នាំ២០២៥ លោក កែវ រ៉េមី បានគូសបញ្ជាក់បន្ថែមថា គណៈកម្មការសិទ្ធិមនុស្សកម្ពុជាបានដាក់សំណើទៅអង្គការសហប្រជាជាតិ និងក្រុមប្រឹក្សាសិទ្ធិមនុស្សអន្តរជាតិ ដើម្បីស្នើសុំការដោះស្រាយករណីនានាដែលបានកើតឡើង។ ករណីទាំងនោះរួមមានការប្រើប្រាស់អំពើហិង្សាមកលើពលករខ្មែរ ការញុះញង់ឲ្យមានការរើសអើងជាតិសាសន៍ ការចាប់បង្ខាំងទាហានខ្មែរ និងការប្រើប្រាស់ឧស្ម័នពុលព្រមទាំងគ្រាប់បែកចង្កោមនៅលើទឹកដីកម្ពុជា។ លោកបានសង្កត់ធ្ងន់ថា វិធីសាស្ត្រទាំងនេះសុទ្ធតែជាអំពើខុសច្បាប់ដែលភាគីថៃបានប្រព្រឹត្តកន្លងមក។
សិក្ខាសាលានេះដែលរៀបចំឡើងដោយគណៈកម្មការសិទ្ធិមនុស្សកម្ពុជា ក្នុងសាលប្រជុំរដ្ឋបាលខេត្តតាកែវ ក៏មានការចូលរួមពីលោក វ៉ី សំណាង អភិបាលខេត្ត កងកម្លាំងទាំងបី មន្រ្តីរាជការ និងមន្រ្តីពាក់ព័ន្ធជាច្រើនរូបទៀតផងដែរ។
ក្នុងឱកាសនោះលោកប្រធានគណៈកម្មការសិទ្ធមនុស្សកម្ពុជា ក៏បានថ្លែងបញ្ជាក់ថា អង្គសិក្ខាសាលានេះមានគោលបំណងចំនួន៤គឺ ១.បង្ហាញពីកិច្ចខិតខំប្រឹងប្រែង និងសមិទ្ធផលធំៗរបស់រាជរដ្ឋាភិបាលក្នុងការការពារនិងលើកកម្ពស់សិទ្ធិមនុស្សនៅកម្ពុជា ២.បង្ហាញពីការអនុវត្តយ៉ាងទៀងទាត់នៅកាតព្វកិច្ច ក្នុងនាមជារដ្ឋសមាជិកអង្គការសហប្រជាជាតិ ៣.បញ្ជ្រាបការយល់ដឹងដល់អង្គភាពថ្នាក់ក្រោមជាតិឱ្យយល់កាន់តែច្បាស់ពីកិច្ចខិតខំប្រឹងប្រែងរបស់រាជរដ្ឋាភិបាលលើវិស័យសិទ្ធិមនុស្ស និង៤.ជំរុញការចូលរួមដល់អង្គភាពថ្នាក់ក្រោមជាតិ និងភាគីពាក់ព័ន្ធទាំងអស់ក្នុងកិច្ចការអនុវត្តសេចក្ដីសន្និដ្ឋាននៃរបាយការណ៍ជាតិស្ដីពីកតិកាសញ្ញាអន្តរជាតិ ស្ដីសិទ្ធសេដ្ឋកិច្ច សង្គម និងវប្បធម៌ ៕
