03-កក្តដា-2024 - ម៉ោង 04:39:PM
កណ្តាល៖ បន្ទាប់ពីការទ្បើងកាន់តំណែងជាប្រធានសាខាគយខេត្តកណ្ដាលភ្លាម ហើយប្រហែលជាចំណាយដើមទុនច្រើនហើយមើលទៅទៅលើតួនាទីនឹងសិទ្ធិអំណោច លោកសំ កុសល បានប្រើតួនាទីនិងអំណាច ប្រព្រឹត្តអំពើពុករលួយ ដើម្បីស្រង់ដើមនិងប្រមូលលុយចូលហោប៉ៅភ្លាមៗដែរ មិនខ្លាចញញើតអង្គភាពប្រឆាំងអំពើពុករលួយទ្បើយ។
តាមប្រភពពីមន្ត្រីគយក្នុងខេត្តកណ្ដាលមួយចំនួនបានលួចបង្ហើបឲ្យដឹងថា លោក សំ កុសល មិនត្រឹមតែមិនចាត់វិធាន ក្នុងការបង្ក្រាបក្រុមឈ្មួញដឹកជញ្ជូនទំនិញគេចពន្ធ និងទំនិញបង់ពន្ធមិនគ្រប់ ឆ្លងកាត់ខេត្តកណ្ដាលទេនោះ តែផ្ទុយទៅវិញ លោក សំ កុសល ដែលអាចទំនងជាចំណាយដើមទុនអស់ច្រើន ក្នុងការទទួលបានតំណែងជាប្រធានសាខាគយខេត្តកណ្ដាល ដូច្នេះហើយបានជាខំប្រឹងស្រង់ដើមវិញតាមរបៀបពុករលួយដោយគ្មានញញើតអ្វីទាំងអស់បែបនេះ។
ប្រភពដែលកៀកស្និតជាមួយលោក សំ កុសល បានបង្ហើបឲ្យដឹងថា ក្រោយពេលទទួលបានតំណែងជាប្រធានសាខាគយខេត្តកណ្ដាល លោក សំ កុសល បានយកតួរនាទីដែលទើបទទួលបាន មកអនុវត្តន៍ដើម្បីប្រមូលលុយយ៉ាងសុខស្រួលដែរហើយមើលទៅ។ ប្រភពបានឲ្យដឹងទៀតថា ក្រុមឈ្មួញដឹកជញ្ជូនទំនិញឆ្លងកាត់ខេត្តកណ្តាលគ្រប់បណ្តាផ្លូវចូលមកក្រុងភ្នំពេញ និងផ្លូវជាតិផ្សេងៗទៀត គឺជាប្រភពចំណូលរបស់លោក សំ កុសល តែម្តង។
ប្រភពពីសមត្ថកិច្ចពាក់ព័ន្ធក្នុងខេត្តកណ្ដាល បានឲ្យដឹងថា ក្រោយពីលោក សំ កុសល ឡើងកាន់តំណែងជាប្រធានសាខាគយខេត្តកណ្ដាល គឺមិនទាន់ឃើញចាត់វិធានការបង្ក្រាបក្រុមឈ្មួញដឹកជញ្ជូនទំនិញគេចពន្ធទំនិញបង់ពន្ធមិនគ្រប់ និងទំនិញខុសច្បាប់បានមួយករណីនៅឡើយនោះទេ គឺមានតែជួយសម្រួលឲ្យឈ្មួញទាំងនោះដឹកទំនិញទៅដល់គោលដៅប្រកបដោយសុវត្ថិភាពទៀតផង។
ប្រភពដដែលបានឲ្យដឹងបន្ថែមថា ចំណែកនៅច្រកជ្រៃធំ និងច្រកផ្សេងទៀត ពួកក្រុមឈ្មួញនាំចូលទំនិញគេចពន្ធនិងបង់ពន្ធមិនគ្រប់ចូលបានយ៉ាងរលូន។
តាមការលួចបង្ហើបប្រាប់ឲ្យដឹងពីមន្ត្រីគយក្នុងខេត្តកណ្ដាលថា ក្រុមឈ្មួញរកស៊ីធំៗដែលដឹកជញ្ជូនទំនិញគេចពន្ធនិងទំនិញបង់ពន្ធមិនគ្រប់ និងទំនិញខុសច្បាប់ឆ្លងកាត់ផ្លូវជាតិនានាចូលទៅរាជធានីភ្នំពេញ គឺសុទ្ធតែមានទំនាក់ទំនងស្អិតរមួតជាមួយលោកសំ កុសល ហើយ ដើម្បីសម្រួលដល់ អាជីវកម្មនាំទំនិញរបស់ពួកគេបានដល់គោលដៅលឿន។ លើសនេះទៅទៀតលោក សំ កុសល បានបើកដៃឲ្យក្រុមមន្ត្រីគយចល័តក្នុងខេត្តកណ្ដាល ចុះគាបយកលុយពីក្រុមឈ្មួញនិងក្រុមអាជីករដឹកជញ្ជូនទំនិញឆ្លងកាត់ឆ្លងខេត្តកណ្ដាលស្រេចតែអំពើចិត្ត ទោះបីឈ្មួញខ្លះដឹកជញ្ជូនទំនិញបង់ពន្ធត្រឹមត្រូវនៅច្រកព្រំដែនរួចហើយយ៉ាងណាក៏ដោយ។
ជុំវិញករណីខាងលើនេះសូមលោក អូន ព័ន្ធមុនីរ័ត្ន រដ្ឋមន្ត្រីក្រសួងសេដ្ឋកិច្ចនិងហិរញ្ញវត្ថុ ក៏ដូចជាលោក គុណ ញឹម អគ្គនាយកនៃអគ្គនាយកដ្ឋានគយនិងរដ្ឋាករកម្ពុជា កុំបណ្ដែតបណ្ដោយឲ្យលោក សំ កុសលប្រធានសាខាគយខេត្តកណ្ដាល ធ្វើអ្វីៗតាមអំពើចិត្តបែបនេះ ព្រោះថារាជរដ្ឋាភិបាលដំណាក់កាលទី៧ ដែលដឹកនាំដោយសម្តេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា លោកបានខិតខំប្រឹងប្រែងណាស់ ក្នុងការគៀងគរវិនិយោគពីគ្រប់ទិសទីទាំងក្នុងស្រុកនិងក្រៅស្រុក ធ្វើយ៉ាងណាឲ្យសេដ្ឋកិច្ចរបស់ជាតិនិងប្រទេសទាំងមូលមានការីចចម្រើនជឿនលឿន ស្មើមុខស្មើមាត់លើឆាកអន្តរជាតិ។
ចំពោះករណីខាងលើនេះផងដែរ ក៏សូមស្នើដល់អង្គភាពប្រឆាំងអំពើពុករលួយ “ACU’’មេត្តាចុះពិនិត្យតាមដានស្រាវជ្រាវ សើបអង្គេត និងចាត់វិធានការលើករណីនេះផង៕
