03-គុម្ភះ-2024 - ម៉ោង 11:05:AM
តាកែវ៖ ថ្លែងនៅក្នុងឱកាសអញ្ជើញបើកកិច្ចប្រជុំបន្ទាន់ជាមួយគណ:អភិបាលក្រុងស្រុក មន្ទីរអង្គភាព និងមន្រ្តីជំនាញពាក់ព័ន្ធ នៅរសៀលថ្ងៃ សុក្រ ទី០២ ខែមករា ឆ្នាំ២០២៤នេះ ឯកឧត្តម អ៊ូច ភា អភិបាលខេត្តតាកែវ បានធ្វើការជម្រុញ និងណែនាំដល់អាជ្ញាធរក្រុងស្រុក ពិសេសមន្ទីរទេសចរណ៍ខេត្ត ត្រូវយកចិត្តទុកដាក់ សហការគ្នា ធ្វើយ៉ាងណារៀបចំតំបន់រមណីដ្ឋាននានាក្នុងខេត្ត ឱ្យមានរបៀបរៀបរយ សុខសណ្ដាប់ធ្នាប់ល្អ បរិស្ថានស្អាត ដើម្បីទាក់ទាញដល់ភ្ញៀវទេសចរណ៍ជាតិ និងអន្តរជាតិ ឲ្យចូលមកលេងកម្សាន្តនៅក្នុងឱកាសបុណ្យចូលឆ្នាំប្រពៃណីចិនខាងមុខនេះ។
ឯកឧត្តម អ៊ូច ភា អភិបាលខេត្តតាកែវ បានមានប្រសាសន៍ថា ខេត្តតាកែវមានរម្យណីយ៍ដ្ឋានទេសចរណ៍ប្រវត្តិសាស្រ្តដ៏គួរឲ្យទាក់ទាញជាច្រើនដូចជាទន្លេបាទី ភ្នំតាម៉ៅ ភ្នំជីសូរ ភ្នំដា ជ្រោះផ្អោកជាដើម។ រម្យណីយ៍ដ្ឋានទេសចរណ៍ទាំងអស់នេះ ពិតជាអាចទាក់ទាញភ្ញៀវទេសចរណ៍ជាតិនិងអន្តរជាតិឲ្យចូលមកកម្សាន្តកាន់តែច្រើន ប្រសិនបើអាជ្ញាធរមានការរៀបចំបានល្អ។
ឯកឧត្តមអភិបាលខេត្ត បានមានប្រសាសន៍បន្តថា ទន្ទឹមនិងការទាក់ទាញភ្ញៀវទេចរណ៍ឱ្យមកលេងកាន់តែច្រើន អាជ្ញាធរក៏ត្រូវរៀបចំសន្ដិសុខសណ្ដាប់ធ្នាប់ឱ្យបានល្អប្រសើរ មានអនាម័យបរិស្ថានស្អាតល្អ នៅតាមតំបន់រមណីដ្ឋាននានា ពិសេសបញ្ហាចរាចរណ៍ នៅថ្ងៃចូលឆ្នាំចិនខាងមុនច្បាស់ជាមានបងប្អូនប្រជាពលរដ្ឋជាច្រើន ធ្វើ ដំណើរទៅកាន់រមណីដ្ឋាននានាក្នុងខេត្ត ដូច្នេះអាជ្ញាធរត្រូវជួយសម្រួលចរាចរណ៍តាមដងផ្លូវ ចៀសវាងបង្ករការកកស្ទះ និងមានគ្រោះថ្នាក់ចរាចរណ៍ផ្សេងៗកើតឡើង ដើម្បីរួមចំណែកជាមួយរាជរដ្ឋាភិបាលក្នុងការកាត់បន្ថយគ្រោះ ថ្នាក់ចរាចរណ៍។
នៅក្នុងឱកាសនោះដែរ ឯកឧត្តម អ៊ូច ភា អភិបាលខេត្តតាកែវ ក៏បានធ្វើការជម្រុញ ដល់សមត្ថកិច្ចពាក់ព័ន្ធ ត្រូវបង្កើនការបង្ក្រាបបទល្មើសគ្រឿងញៀន ក្មេងទំនើង និងល្បែង ស៊ីសងខុសច្បាប់គ្រប់ប្រភេទ អោយបានខ្លាំងក្លាកុំឲ្យកើត មានតទៅទៀតនៅក្នុងមូលដ្ឋានរបស់ខ្លួន ដើម្បីធានាបាននូវសុខសុវត្ថិភាពជូនប្រជាពលរដ្ឋក៏ដូចជាលើកកម្ពស់នូវគោលនយោបាយ ភូមិឃុំមានសុវត្ថិភាព របស់រាជរដ្ឋាភិបាលកម្ពុជា បានដាក់ចេញផងដែរ៕