11-មករា-2024 - ម៉ោង 01:36:PM
ជនសង្ស័យម្នាក់ ត្រូវបានកម្លាំង នៃបញ្ជាការដ្ឋានកងរាជអាវុធហត្ថខេត្តតាកែវ ធ្វើការឃាត់ខ្លួន និងមេខ្លោងជួញដូរម្នាក់រត់គេចខ្លួន ជាប់ពាក់ព័ន្ធករណីជួញដូរសារធាតុគ្រឿងញៀន ជិត ៤គីឡូក្រាម នៅចំណុចរោងស័ង្កសី ជើងភ្នំតាម៉ៅ ស្ថិតនៅភូមិខ្សាច់លុប ឃុំត្រពាំងសាប ស្រុកបាទី ខេត្តតាកែវ។
យោងតាមការបញ្ជាក់ពី លោកឧត្តមសេនីយ៍ត្រី សេង មហា មេបញ្ជាការកងរាជអាវុធហត្ថខេត្តតាកែវ បាន្លថ្លែងនៅក្នុងសន្និសិទសារព័ត៌មាន នាព្រឹកថ្ងៃព្រហស្បតិ៍ ទី១១ ខែមករា ឆ្នាំ២០២៤នេះ ដោយបានបញ្ជាក់ដែរថា ករណីបង្រ្កាបជួញដូរគ្រឿងញៀននេះដែរ គឺដោយអនុវត្តបទបញ្ជារបស់ នាយឧត្តមសេនីយ៍ សៅ សុខា មេបញ្ជាការកងរាជអាវុធហត្ថលើផ្ទៃប្រទេស កម្លាំងនៃបញ្ជាការដ្ឋានកងរាជអាវុធហត្ថខេត្តតាកែវ ក្រោមការសម្របសម្រួលនីតិវិធីដោយ ឯកឧត្តម ឯក ឆេងហួត ព្រះរាជអាជ្ញាអមសាលាដំបូងខេត្ត ដឹកនាំកម្លាំងដោយ លោកវរសេនីយ៍ឯក ង៉ែត ចាន់ធី មេបញ្ជាការរងកងរាជអាវុធហត្ថ និងលោកអនុសេនីយ៍ទោ ហួត វឿន នាយការិយាល័យប្រឆាំងបទល្មើសគ្រឿងញៀន បានចុះបង្រ្កាបករណីជួញដូរគ្រឿងញៀន កាលពីថ្ងៃទី០៩ ខែមករា ឆ្នាំ២០២៤ ដោយបានធ្វើការឃាត់ខ្លួនជនសង្ស័យម្នាក់ ឈ្មោះ ឆែម ជាតិ ភេទប្រុស អាយុ ៣៨ឆ្នាំ ជនជាតិខ្មែរ (រក្សាទុក ប្រើប្រាស់នូវសារធាតុញៀនខុសច្បាប់) រស់នៅភូមិសង្កែ ឃុំត្រពាំងសាប ស្រុកបាទី ខេត្តតាកែវ ដករហូតវត្ថុតាង៖ ម្សៅក្រាមពណ៌សថ្លាចំនួន ០៧កញ្ចប់ ទម្ងន់ ២៣០,៧៧ក្រាម (គិតទាំងសំបក់ថង់), ជញ្ជីងថ្លឹងថ្នាំញៀនចំនួន ០២គ្រឿង, សម្ភារៈចូកថ្នាំញៀន០១, ក្រដាសវីងចំនួន ០២សន្លឹក លេខទូរស័ព្ទ (០១៧២១៧០៧០ ទទួលលុយ) សម្ភារៈសេពថ្នាំញៀនមួយចំនួន, ទូរសព្ទ័ចំននួន០២គ្រឿង (អូប៉ូ + វិវ៉ូ ខូច០១), ម៉ូត ០១គ្រឿង ម៉ាកអឹមស្លាស់ពណ៍ខ្មៅស្លាកលេខភ្នំពេញ 1TL-3712។
ក្រោយពីស្ដាប់ចម្លើយជនសង្ស័យឈ្មោះ ឆែម ជាតិ បានសារភាពថា ថ្នាំញៀនដែលសមត្ថកិច្ចដកហូត គឺខ្លួនបានទិញពីរឈ្មោះ ស សុងឃៀង ហៅ ពែក ម្ដុំជើងភ្នំតាម៉ៅ ស្ថិតនៅភូមិខ្សាច់លប់ ឃុំត្រពាំងសាប ស្រុកបាទី ខេត្តតាកែវ លុះនៅវេលាម៉ោង ១៤ និង ០០ នាទី ថ្ងៃទី ១០ ខែមករាឆ្នាំ ២០២៤ កម្លាំងជំនាញបានចុះទៅចំណុចរោងស័ង្កសី ជើងភ្នំតាម៉ៅ ស្ថិតនៅភូមិខ្សាច់លុប ឃុំត្រពាំងសាប ស្រុកបាទីខេត្តតាកែវ (តែម្ចាស់ផ្ទះឈ្មោះ ស សុងឃៀង មិននៅ) កម្លាំងជំនាញ បានរាយការណ៍ជូន ឯកឧត្តមព្រះរាជអាជ្ញា សុំធ្វើការត្រួតពិនិត្យឆែកឆេរ បានរកឃើញម្សៅក្រាមពណ៌សថ្លាចំនួន ០៣ដុំធំ (រកឃើញក្នុងរោងជីកដីកាប់) និងចំនួន ១៥កញ្ចប់ធំ (រកឃើញដាក់ក្នុងធុងបាស) ទម្ងន់៖ ៣,៩១០,៧៦ក្រាម ( ស សុងឃៀងកំពុងរត់គេចខ្លួន) ។
បច្ចុប្បន្នជនសង្ស័យដែលជំនាញបានខ្លួន ការិយាល័យជំនាញកសាងសំណុំរឿង បញ្ជូនទៅសាលាដំបូងខេត្តតាកែវ ចំពោះឈ្មោះ ស សុងឃៀង ភេទប្រុស អាយុ ២៩ឆ្នាំ រស់នៅភូមិខ្សាច់លុប ឃុំត្រពាំងសាប ស្រុកបាទី ខេត្តតាកែវ ជាមេខ្លោងជួញដូរគ្រឿងញៀន កំពុងរត់គេចខ្លួន។
បន្ថែមពីដែរ លោកឧត្តមសេនីយ៍ត្រី សេង មហា មេបញ្ជាការកងរាជអាវុធហត្ថខេត្តតាកែវ ក៏បានធ្វើការប្ដេជ្ញាបង្រ្កាបករណីគ្រឿងញៀន និងរាល់បទល្មើសផ្សេងៗ ឱ្យដូចភ្លៀងរលឹម ដើម្បីសេចក្ដីសុខសាន្តរបស់បងប្អូនប្រជាពលរដ្ឋ៕
កិច្ចសម្ភាសន៍ លោកឧត្តមសេនីយ៍ត្រី សេង មហា មេបញ្ជាការកងរាជអាវុធហត្ថខេត្តតាកែវ https://youtu.be/xsBGm2CuiY4
កិច្ចសម្ភាសន៍ កិច្ចសម្ភាសន៍ ឯកឧត្តម ឯក ឆេងហួត ព្រះរាជអាជ្ញាអមសាលាដំបូងខេត្តតាកែវ https://youtu.be/a7xQYmRIrWs
