02-សីហា-2022 - ម៉ោង 02:24:PM
បរទេស៖ ប្រទេសអ៊ុយក្រែន បានទទួលជំនួយហិរញ្ញវត្ថុ ចំនួន៥០០លានអឺរ៉ូ (ប្រមាណ ៥១២លានដុល្លារអាម៉េរិក)ពីសហភាពអឺរ៉ុប(EU) ។ នេះបើតាមការបញ្ជាក់ពី នាយករដ្ឋមន្រ្តីអ៊ុយក្រែន លោក ដេនីស ស្មីហាល បាននិយាយកាលពីថ្ងៃចន្ទម្សិលមិញនេះ ។
លោកនាយករដ្ឋមន្រ្តី អ៊ុនក្រែន ស្មីហាល បានសរសេរនៅលើបណ្តាញតេឡេក្រាមថា នេះជាការរួមចំណែកមួយ ហើយក៏ជាការវិនិយោគមួយយ៉ាងសំខាន់នៅក្នុងការធ្វើឱ្យមានស្ថេរភាពផ្នែកសេដ្ឋកិច្ច និងហិរញ្ញវត្ថុរបស់យើងព្រមទាំងអនាគត់ដែលផុតពីគ្រោះថ្នាក់ ដូច្នោះយើងដឹងគុណដល់សហភាពអឺរ៉ុប។
កាលពីខែកន្លងទៅ រដ្ឋមន្រ្តីហិរញ្ញវត្ថុនៃរដ្ឋជាសមាជិកសហភាពអឺរ៉ុប បានអនុម័តជំនួយមួយដែលមានទឹកប្រាក់ចំនួន ១ប៊ីលានអឺរ៉ូ (ប្រមាណ ១,០២ប៊ីលានដុល្លារអាម៉េរិក) សម្រាប់ប្រទេសអ៊ុយក្រែន ដើម្បីជួយប្រទេសនេះក្នុងការរក្សានូវស្ថេរភាពហិរញ្ញវត្ថុនៅពេលមានជម្លោះជាមួយរុស្ស៊ី។
លោក ស្មីហាល បាននិយាយថា មូលនិធិនេះនឹងជួយដល់អ៊ុយក្រែនក្នុងការគ្របដណ្តប់នូវតម្រូវការថវិការជាអាទិភាពរបស់ខ្លួន។ កាលពីក្នុងខែឧសភា គណៈកម្មការអឺរ៉ុបបានស្នើលៃលកទុកប្រាក់ចំនួន ៩ប៊ីលានអឺរ៉ូ (ប្រមាណ ៩,២ប៊ីលានដុល្លារអាម៉េរិក) សម្រាប់ជំនួយដល់ប្រទេសអ៊ុយក្រែននៅក្នុងឆ្នាំនេះ៕