ក្រុមបាតុករនៅប្រទេសថៃ យករូបនាយករដ្ឋមន្រ្តីប្រមាថ និងស្រែកទាមទារ ឱ្យចុះចេញពីតំណែង

19-កក្តដា-2021 - ម៉ោង 03:58:PM

បរទេស៖ ក្រុមបាតុករនៅក្នុងប្រទេសថៃ នៅតែបន្តធ្វើបាតុកម្មដោយក្នុងនោះយករូបលោក ប្រាយុទ្ធ ចាន់អូចារ នាយករដ្ឋមន្រ្តីប្រមាថ និងស្រែកទាមទារឱ្យលោកចុះចេញពីតំណែង ខណៈដែលមេរោគកូវីដ១៩ កំពុងតែឆ្លងរាតត្បាតពេញផ្ទៃប្រទេស។ ការធ្វើបាតុកម្មនេះ បានប៉ះង្គិតគ្នាជាមួយនឹងក្រុមប៉ូលីសនៅទីក្រុងបាងកក កាលពីថ្ងៃអាទិត្យ ទី ១៨ ខែកក្កដា ឆ្នាំ២០២១ម្សិលមិញនេះ ដោយក្រុមប៉ូលីសបានបាញ់ឧស្ម័នបង្ហូរទឹកភ្នែកដាក់ក្រុមបាតុករ ។

បាតុករម្នាក់ឈ្មោះ Kanyaporn Veeratat អាយុ ៣៤ ឆ្នាំបានប្រាប់សារព័ត៌មានរ៉យទ័រថា រដ្ឋាភិបាលត្រូវទទួលខុសត្រូវចំពោះចន្លេះខ្វះខាតក្នុងការគ្រប់គ្រងរបស់ខ្លួន ហើយបណ្តាលឱ្យវីរុសកូវីដ-១៩ ផ្ទុះឆ្លងពេញប្រទេស។ “រដ្ឋាភិបាលមានភាពខ្សោយក្នុងការគ្រប់គ្រងស្ថានការណ៍ហើយប្រសិនបើយើងមិនធ្វើអ្វីសោះ នោះនឹងមិនមានការផ្លាស់ប្តូរទេ” ។

រូបសាកសាពក្លែងក្លាយជាច្រើន ត្រូវបានគេយកទៅកន្លែងធ្វើបាតុកម្ម ដើម្បីតំណាងឱ្យការបរាជ័យរបស់រដ្ឋាភិបាលក្នុងការទប់ស្កាត់ការរីករាលដាលនៃវីរុសកូវីឌ បណ្តាលឱ្យមានមនុស្សស្លាប់ ៣៣៤១នាក់ ចាប់តាំងពីមានការផ្ទុះកាលពីដើមឆ្នាំ ២០២១កន្លងទៅ៕