06-គុម្ភះ-2023 - ម៉ោង 03:15:PM
ខេត្តតាកែវ៖ បន្ទាប់ពីមានករណីក្រុមក្មេងស្ទាវមួយក្រុម បានធ្វើសកម្មភាពកាប់លើយុវជនម្នាក់ នៅលើបណ្ដោយផ្លូវជាតិលេខ២ ស្ថិតនៅឃុំប្រាំបីមុំ ស្រុកទ្រាំង បណ្ដាលឱ្យស្លាប់ភ្លាមៗ កាលពីថ្ងៃទី០៣ ខែកុម្ភៈ ឆ្នាំ២០២៣ ត្រូវបានកម្លាំងសមត្ថកិច្ច នៃអធិការដ្ឋាននគរបាលស្រុកទ្រាំង សហការជាមួយកម្លាំងនគរបាលស្រុកគិរីវង់ ចាប់ខ្លួនបាន ០៤នាក់។
យោងតាមការបញ្ជាក់ពី លោកវរសេនីយ៍ឯក ឃុត ភិន អធិការនគរបាលស្រុកទ្រាំង បានឱ្យដឹងថា ដោយមានការណែនាំផ្ទាល់ពីសំណាក់ លោកឧត្តមសេនីយ៍ទោ ឈាង ផាន់ណារ៉ា ស្នងការនគរបាលខេត្តតាកែវ និងក្រោមការសម្របសម្រួលនីតិវិធីពី លោក ឯក ឆេងហួត ព្រះរាជ អាជ្ញាអមសាលាដំបូងខេត្ត កម្លាំងនៃអធិការដ្ឋាននគរបាលស្រុកទ្រាំង បានធ្វើការស្រាវជ្រាវដោយយកចិត្តទុកដាក់ ទើបឈានទៅដល់ការឃាត់ខ្លួនជនសង្ស័យម្នាក់ ឈ្មោះ ផែន រ៉ាឌី អាយុ ១៦ឆ្នាំ មុខរបបសិល្បៈ រស់នៅភូមិត្រពាំងឈូក ឃុំត្រឡាច ស្រុកទ្រាំង ក្រោយស្ដាប់ចម្លើយសារភាព គឺបានបញ្ជាក់ថា ខ្លួនគេនិងបក្ខពួកមិនមានគំនុំអ្វីជាមួយ ជនរងគ្រោះ នោះទេ ប៉ុន្តែរូបគេនិងគូរកន មានរឿងមកពីកន្លែង ផ្សេង រួចក៏ជិះម៉ូតូដល់កន្លែងកើតហេតុឃើញជនរងគ្រោះ ជិះម៉ូតូម្នាក់ឯង រូបគេនិងបក្ខពួកក៏បានកាប់សំដៅមកលើជនរងគ្រោះបណ្ដាលឱ្យស្លាប់ភ្លាមៗតែម្ដង។
លោកអធិការនគបាលស្រុកទ្រាំង បានបន្តថា នៅព្រឹកថ្ងៃទី០៦ ខែកុម្ភៈ ឆ្នាំ២០២៣នេះ កម្លាំងសមត្ថកិច្ចស្រុកទ្រាំង បានសហការជាមួយកម្លាំងសមត្ថកិច្ចស្រុកគិរីវង់ បានចុះឃាត់ខ្លួនយុវជន ០៣នាក់ ទៀត តាមចម្លើយសារភាពរបស់ឈ្មោះ ផែន រ៉ាឌី ក្នុងនោះរួមមាន ៖
១/ ឈ្មោះ សន វណ្ណរ៉ា ភេទប្រុស អាយុ ១៧ឆ្នាំ រស់នៅភូមិកំពង់ ឃុំព្រះបាទជាន់ជុំ ស្រុកគិរីវង់ មុខរបបរ សិស្ស ជា ជនដៃដល់ កាប់ជនរងគ្រោះ (ម្ចាស់ដាវ និងកាំបិត)។
២/ ឈ្មោះ ស៊ឹម ចន្នី ភេទប្រុស អាយុ ១៧ឆ្នាំ រស់នៅភូមិអណ្ដូងកៀន ឃុំភ្នំដិន ស្រុកគិរីវង់ មុខរបបរសិស្ស ម្ចាស់ម៉ូតូដឹកជនសង្ស័យ ដៃដល់កាប់ជនរងគ្រោះ។
៣/ ឈ្មោះ សុខ សេមសេរីវឌ្ឍនៈ ភេទប្រុស អាយុ ១៦ឆ្នាំ រស់នៅភូមិពោធិ៍ខ្វិត ឃុំព្រះបាទជាន់ជុំ ស្រុកគិរីវង់ ខេត្តតាកែវ មុខរបរ សិស្ស (ម្ចាស់កាំបិតក្រង៉ុក និងម៉ូតូខ្ចីគេជិះ ធ្វើសកម្មភាព) ។
អធិការនគរបាលស្រុកទ្រាំង លោកវរសេនីយ៍ឯក ឃុត ភិន បានបន្តថា ក្រោយឃាត់ខ្លួនបានជនសង្ស័យ ០៤នាក់ខាងលើនេះហើយ កម្លាំងជំនាញ កំពុងកសាងសំណុំរឿងបញ្ជូនខ្លួនជនសង្ស័យ ទៅស្នងការដ្ឋាននគរបាលខេត្ត ចាត់ការបន្តតាមនីតិវិធីច្បាប់ ៕
