25-មេសា-2022 - ម៉ោង 09:06:PM
តាកែវ៖ លោក ឡោ ជំនិត តំណាងអ្នកវិនិយោគផ្សារណាត់ បានគូសបញ្ជាក់ថា ក្រុមអាជីវករដែលលក់ដូរនៅតាមចិញ្ចើមផ្លូវ និងរូបលោក ក្នុងនាមអ្នកវិនិយោគបានសហការគ្នារៀបចំកន្លែងលក់ដូរឱ្យបានល្អត្រឹមត្រូវប្រកបដោយបរិស្ថានអនាម័យស្អាតល្អ និងមានសណ្តាប់ធ្នាប់របៀបរៀបរយ ពោលគឺមិនរញ៉ែរញ៉ៃឬកកស្ទះចរាចរណ៍ ហើយពួកគាត់មិនលក់ផ្ទាល់ដីតាមចិញ្ចើមដូចមុននោះឡើយ ។
លោក ឡោ ជំនិត តំណាងអ្នកវិនិយោគផ្សារណាត់ បានគូសបញ្ជាក់ថា ទីតាំងលក់ដូរនៅតាមចិញ្ចើមផ្លូវជុំវិញផ្សារណាត់ដែលអាជីវករធ្លាប់លក់ផ្ទាល់នឹងដីហើយគ្មានសណ្ដាប់ធ្នាប់ និងគ្មានអនាម័យនោះ ឥឡូវត្រូវបានអាជីវករ និងអ្នកវិនិយោគផ្សារសហការគ្នារៀបចំទៅជាកន្លែងលក់ដែលមានគ្រែចល័ត និងកៅអីអង្គុយសមរម្យប្រកបដោយសោភ័ណ្ឌភាព និងរបៀបរៀបរយ ហើយចំពោះការបង់ប្រាក់បដិភាគនេះឡើង គឺធ្វើតាមការស្ម័គ្រចិត្តដោយគ្មានបង្ខិតបង្ខំពួកគាត់ឡើយ ដើម្បីសហការគ្នារៀបចំជាគ្រែចល័តនិងមានកៅអីអង្គុយឱ្យពួកគាត់មានកន្លែងលក់ដូរត្រឹមត្រូវសមរម្យ មានអនាម័យ និងបញ្ឈប់ពួកគាត់មិនឱ្យលក់ផ្ទាល់ដី ហើយអាជីវករដែលលក់ដូរនៅលើចិញ្ចើមផ្លូវនឹងទទួលបានការប្រើប្រាស់ទឹកភ្លើងរបស់ផ្សារ ហើយនឹងការរៀបចំសណ្ដាប់ធ្នាប់ត្រឹមត្រូវ រួមទាំងសន្តិសុខផងដែរ ដោយឡែកសម្រាប់បងប្អូនជាអាជីវករដែលលក់ដូរត្រឹមជាកញ្រ្ចែង កញ្ជើ ល្អី គឺមិនតម្រូវឱ្យពួកគាត់បង់ប្រាក់បដិភាគនេះដែរ គឺយើងនឹងរៀបចំកន្លែងឱ្យពួកគាត់សមរម្យផងដែរ ។
បើតាមលោក ឡោ ជំនិត គោលបំណងរបស់លោកតែមួយគត់ គឺធ្វើយ៉ាងណាប្រែក្លាយផ្សារណាត់មួយនេះ ទៅជាផ្សារទំនើបផង ផ្សារទេសចរណ៍ផង ហើយដើម្បីប្រែក្លាយផ្សារមួយនេះទៅជាផ្សារទំនើប និងផ្សារបែបទេសចរណ៍ គឺយើងត្រូវរៀចំសណ្តាប់ធ្នាប់នៅក្នុង និងជុំវិញផ្សារឱ្យមានរបៀបរៀបរយ មិនរញ៉ែរញ៉ៃ ជាផ្សារដែលស្អាតមានអនាម័យ ជាពិសេសគឺបញ្ចៀសបងប្អូនអាជីវករដែលពួកគាត់ពីមុនធ្លាប់លក់ដូរនៅលើផ្លូវលក់ផ្ទាល់នឹងដី គឺបញ្ឈប់មិនឱ្យលក់លើផ្លូវលក់ផ្ទាល់នឹងដីតទៅទៀត ។
អាជីកវរលក់ត្រីសាច់ ដែលពីមុនលក់នៅផ្ទាល់នឹងដី បានសម្តែងអារម្មណ៍សប្បាយរីករាយ ហើយពេញចិត្តចំពោះម្ចាស់វិនិយោគផ្សារណាត់ថា បានរៀបចំកន្លែងលក់ដូរជូនពួកគាត់ឱ្យបានស្អាតសមរម្យនិងមានអនាម័យល្អ លែងលក់នៅផ្ទាល់នឹងដីតទៅទៀតហើយ ដោយមានគ្រែចល័តនេះ និងមានកៅអីសម្រាប់អង្គុយលក់ដូរ ពិសេសថែមទៀតនោះ គឺបងប្អូនអាជីវករដែលលក់ត្រីសាច់បន្លែ បានប្រើប្រាស់ទឹកភ្លៀងដោយឥតគិតថ្លៃពេញមួយឆ្នាំថែមទៀតផង ៕
