26-មករា-2022 - ម៉ោង 10:47:AM
តាកែវ៖ ប្រធានគណៈកម្មាធិការសាខាកាកបាទក្រហមកម្ពុជាខេត្ត និងជាអភិបាលខេត្តតាកែវ លោក អ៊ូច ភា បានធ្វើការណែនាំទៅដល់អនុសាខាកាកបាទក្រហមកម្ពុជាក្រុងស្រុក ក៏ដូចជាមន្ទីរអប់រំយុវជន និងកីឡាខេត្ត ត្រូវយកចិត្តទុកដាក់ធ្វើចលនាកសាងកម្លាំងយុវជនកាកបាទក្រហមតាមបណ្តាលក្រុងស្រុកឱ្យបានកាន់តែច្រើន ដើម្បីជួយប្រជាពលរដ្ឋក្នុងពេលជួបគ្រោះអាសន្នភ្លាមៗបានទាន់ពេលវេលា ។
ថ្លែងនៅក្នុងឱកាសអញ្ជើញជាអធិបតីក្នុងពិធីកាកបាទក្រហមកម្ពុជាចែកជែលចំនួន ៩១១កេស ដល់អនុសាខាកាកបាទក្រហមកម្ពុជាក្រុងស្រុកទាំង១០របស់ខេត្តតាកែវ និងកិច្ចប្រជុំស្តីពីផែនការអភិវឌ្ឍសាខាតាមយុទ្ធសាស្ត្រ ២០២១-២០៣០ របស់កាកបាទក្រហមកម្ពុជា និងកិច្ចប្រជុំបូកសរុបលទ្ធផលការងារប្រចាំឆ្នាំ២០២១ នឹងលើកទិសដៅ ២០២២ សាខាកាកបាទក្រហមកម្ពុជាខេត្តតាកែវ នាព្រឹកថ្ងៃអង្គារ៍ ទី ២៥ ខែមករា ឆ្នាំ២០២២ ក្នុងសាលប្រជុំរដ្ឋបាលខេត្ត លោក អ៊ូច ភា អភិបាលខេត្ត បានមានប្រសាសន៍បន្តទៀតថា ដើម្បីទាន់សភាពការណ៍ និងការជួយសង្គ្រាះបងប្អូនប្រជាពលរដ្ឋពីហេតុការណ៍គ្រោះថ្នាក់ផ្សេងៗជាយថាហេតុ ឬគ្រោះធម្មជាតិ ខ្យល់កន្រ្តក់ រន្ទះបាញ់ជាដើម យើងត្រូវថែមកម្លាំងបន្ថែមទៀតឱ្យកាន់តែច្រើននៅតាមបណ្តាមូលដ្ឋាន ដើម្បីឱ្យកម្លាំងយុវជន និងអនុសាខាកាកបាទក្រហមក្រុងស្រុក ក៏ដូចជាអាជ្ញាធរមូលដ្ឋានសហការគ្នា ក្នុងការជួយសង្គ្រាះពួកគាត់បានទាន់ពេលវេលា មិនមានគ្រោះថ្នាក់ដល់អាយុជីវិត និងអាចជួយគ្នាទៅវិញទៅមកបានក្នុងគ្រាអាសន្ននេះ។
លោកប្រធានសាខាខេត្ត បន្ថែមទៀតថា ទន្ទឹមនឹងការជួយសង្រ្គាះប្រជាពលរដ្ឋពីគ្រោះធម្មជាតិនានា និងហេតុការណ៍ដែលកើតឡើងជាយថាហេតុបានទាន់ពេលវេលា អាជ្ញាធរមូលដ្ឋានទាំងអស់ ជាពិសេសលោកអភិបាលក្រុងស្រុកដែលជាអនុសាខាកាកបាទក្រហមកម្ពុជាតាមបណ្តាក្រុងស្រុក ត្រូវតែនាំយកអំណោយរបស់សម្តេចគតិព្រឹទ្ធិបណ្ឌិត ប៊ុន រ៉ានី ហ៊ុន សែន ប្រធានកាកបាទក្រហមកម្ពុជា មកចែកជូនដល់ពួកគាត់ភ្លាមៗ ដោយពុំរង់ចាំយូរនោះឡើយ ហើយចាំធ្វើរបាយការណ៍មកថ្នាក់លើជាក្រោយក៏បាន ពោលគឺមិនត្រូវទុកឱ្យពួកគាត់ខ្វះស្បៀងអាហារ សម្ភារៈប្រើប្រាស់នានា ឬខ្វះទីជំរក ក្រោយជួបគ្រោះធម្មជាតិ ឬហេតុការណ៍កើតឡើងជាយថាហេតុនោះឡើយ ។
ជាមួយគ្នានេះដែរ លោក អ៊ូច ភា ក៏បានក្រើនរំលឹកទៅដល់លោកប្រធានអនុសាខាកាបាទក្រហមកម្ពុជក្រុងស្រុក ត្រូវបន្តគៀងគរស្វែងរកថវិកាបន្ថែមទៀត សម្រាប់ទ្រទ្រង់សកម្មភាពមនុស្សធម៌របស់កាកបាទក្រហម និងបន្តសកម្មភាពមនុស្សធម៌ក្នុងការជួយសង្គ្រាះបងប្អូនប្រជាពលរដ្ឋដែលងាយរងគ្រោះដោយគ្រោះធម្មជាតិ អគ្គីភ័យ ទឹកជំនន់ ខ្យល់កន្រ្តក់ជាដើម ៕
