24-មករា-2022 - ម៉ោង 03:13:PM
តាកែវ៖ អភិបាលខេត្តតាកែវ លោក អ៊ូច ភា បានធ្វើការណែនាំទៅដល់លោកអភិបាលក្រុងស្រុក ដែលបានមកអញ្ជើញចូលរួមនៅក្នុងកិច្ចប្រជុំបូកសរុបលទ្ធផល នៃការផ្ដល់សេវារដ្ឋបាលប្រចាំ ឆ្នាំ២០២១ និងលើកទិសដៅសកម្មភាពការងារប្រចាំឆ្នាំ២០២២ របស់ អង្គភាពច្រកចេញ ចូលតែមួយ រដ្ឋបាលខេត្តនាព្រឹកថ្ងៃច័ន្ទ ទី២៤ ខែមករា ឆ្នាំ២០២២ ត្រូវតែផ្សព្វផ្សាយនិងជំរុញប្រជាពលរដ្ឋឱ្យមកទទួលការចាក់វ៉ាក់សាំងការពារជំងឺកូវីដ១៩ ដូសទី០៣ជាដូសជំរុញឱ្យបានគ្រប់ៗគ្នា ខណៈដែលចំនួននៃការចាក់ដូសទី០៣នេះនៅក្នុងខេត្តហាក់មានតិចតួច ។
លោក អ៊ូច ភា អភិបាលខេត្តតាកែវ បានមានប្រសាសន៍បន្តទៀតថា ការជំរុញទៅដល់បងប្អូនប្រជាពលរដ្ឋឱ្យនាំគ្នាចាក់វ៉ាក់សាំងដូសទី០៣នេះឱ្យបានគ្រប់ៗគ្នា គឺដើម្បីការពារនិងប្រយុទ្ធប្រឆាំងជំងឺកូវីដ១៩ ពិសេសប្រភេទបំលែងថ្មីអូមីក្រុងដែលវាកំពុងតែរាត្បាតនៅក្នុងប្រទេសកម្ពុជារបស់យើងហើយ ដូច្នោះអាជ្ញាធរពាក់ព័ន្ធទាំងអស់ ត្រូវបង្កើនកិច្ចការងារជំរុញការចាក់វ៉ាក់សាំងដូសទី០៣នេះឱ្យលឿនតាមដែលអាចធ្វើទៅបាន ។
លោក អ៊ូច ភា បន្តទៀតថា ទន្ទឹមនឹងការជំរុញទៅដល់បងប្អូនប្រជាពលរដ្ឋទាំងអស់ ទៅចាក់វ៉ាក់សាំងដូសទី០៣ការពារជំងឺកូវីដ១៩នេះដែរ ក្រុមគ្រូពេទ្យនៃមន្ទីរសុខាភិបាលខេត្ត និងតាមមន្ទីរពេទ្យបង្អែកខេត្តស្រុកមណ្ឌលសុខភាពតាមឃុំ ក៏ត្រូវតែចុះទៅចាក់វ៉ាក់សាំងទៅដល់ខ្នងផ្ទះរបស់បងប្អូនប្រជាពលរដ្ឋផ្ទាល់ផងដែរ ទើបយើងអាចសម្រេចកិច្ចការងារមួយនេះ ។
ជាមួយគ្នានេះដែរ លោកអភិបាលខេត្ត អ៊ូច ភា ក៏បានអំពាវនាវទៅដល់ប្រជាពលរដ្ឋត្រូវតែបង្កើនការប្រុងប្រយ័ត្នឱ្យបានខ្ពស់ចំពោះជំងឺកូវីដ១៩បំលែខ្លួនថ្មីអូមីក្រុង ដោយបន្តអនុវត្តឱ្យបានត្រឹមត្រូវ តាមការណែនាំរបស់ក្រសួងសុខាភិបាល ហើយត្រូវពាក់ម៉ាស់ និងមានអាគុលជាប់ខ្លួនជានិច្ចនៅពេលចេញទៅក្រៅផ្ទះ ដើម្បីសហគមន៍របស់យើង និងប្រទេសរបស់យើងយកឈ្នះជំងឺកូវីដ១៩ ក៏ដូចជាមិនឱ្យមានករណីស្លាប់ដោយកូវីដ១៩នេះតទៅទៀត ៕