24-មករា-2022 - ម៉ោង 02:18:PM
កំពត៖ លោក ហ៊ុន ម៉ានី ប្រធានសហភាពសហព័ន្ធយុវជនកម្ពុជា បានសំណូមពរ ដល់សមាជិក សមាជិកា (ស.ស.យ.ក) ទាំងអស់ ត្រូវតែយកចិត្តទុកដាក់អភិវឌ្ឍសមត្ថភាពរបស់ខ្លួនបន្ថែមទៀតឱ្យអស់លទ្ធភាព ដើម្បីចូលរួម ចំណែកជាមួយរាជរដ្ឋាភិបាលកម្ពុជា តាមរយៈការខិតខំរៀនសូត្រធ្វើគំរូល្អ និងដំណើរជោគជ័យរបស់ថ្នាក់ដឹកនាំទាំងការ គិត និងការអនុវត្តការងារ ក្នុងពិធីជួបសំណេះសំណាលជាមួយគណៈកម្មាធិការ ឃុំ-សង្កាត់ ក្រុង-ស្រុក ខេត្ត ក្នុងរចនាសម្ព័ន្ធសហភាពសហព័ន្ធយុវជនកម្ពុជា (ស.ស.យ.ក) ខេត្តកំពត ថ្ងៃទី២៣ ខែមករា ឆ្នាំ២០២២ នៅសាលប្រជុំសាលាខេត្តកំពត។
លោក ហ៊ុន ម៉ានី បានបន្តថា ក្នុងនាមយុវជន ជាអ្នកបន្តវេន ត្រូវមានភារកិច្ចថែទាំ និងទទួលខុសត្រូវចំពោះជោគវាសនា អនាគតរបស់ប្រទេសជាតិ ដោយមិនត្រឹមតែធ្វើសកម្មភាពជួយលើការងារសង្គម និងការងារមនុស្សធម៌តែប៉ុណ្ណោះទេ។
ជាមួយគ្នានេះដែរ លោក ហ៊ុន ម៉ានី ក៏បានធ្វើការកត់សម្គាល់ និងវាយតម្លៃខ្ពស់ ចំពោះលទ្ធផលការងារដែល ស.ស.យ.ក. ខេត្តកំពត បានសហការល្អជាមួយនឹងអាជ្ញាធរគ្រប់ជាន់ថ្នាក់ក្នុងខេត្ត ដើម្បីបម្រើការងារសង្គម និងមនុស្សធម៌ជូនប្រជាពលរដ្ឋ នៅមូលដ្ឋានបានល្អប្រសើរ នារយៈពេលកន្លងមក និងក៏សូមថ្លែងអំណរគុណចំពោះគណៈអភិបាលខេត្ត និងអាជ្ញាធរមូលដ្ឋានទាំងអស់ ដែលតែង ផ្តល់ឱកាសដល់សមាជិក (ស.ស.យ.ក.) តាមមូលដ្ឋាននីមួយៗ ដោយបានសហការយ៉ាងល្អប្រសើរ។
សកម្មភាពទាំងអស់របស់សមាជិក សមាជិកា (ស.ស.យ.ក) គឺកើតចេញពីការលះបង់របស់សមាជិក សមាជិកា នៅទូទាំងប្រទេស ហើយត្រូវបានទទួលស្គាល់ពីសំណាក់ប្រជាពលរដ្ឋក្នុងមូលដ្ឋាន និងសាធារណជន ដោយបានផ្សារភា្ជប់ស្លាកសញ្ញា នៃស្ថាប័ន និងឯកសណ្ឋាន (ស.ស.យ.ក) ទៅនឹងសកម្មភាពល្អៗ និងភាពវិជ្ជមានសម្រាប់សង្គម ៕
