12-មករា-2022 - ម៉ោង 02:06:PM
ភ្នំពេញ៖ បើយោងតាមខ្លឹមសារដែលបានបង្ហោះនៅលើទំព័រហ្វេសប៊ុករបស់ស្ថានទូតអាមេរិករប្រចាំនៅកម្ពុជា បានចូលរួមសម្តែងនូវការសោកស្តាយ និងមានក្តីក្រៀមក្រំជាខ្លាំងចំពោះមន្ត្រីដោះមីនរបស់កម្ពុជា៣រូប ដែលបានស្លាប់បាត់បង់ជីវិតដោយសារការផ្ទុះមីនពេលពួកគេកំពុងបំពេញការងារក្នុងភូមិសាស្រ្តភូមិសែនតេជៈ ឃុំសែនតេជោ ស្រុកជាំក្សាន្ត ខេត្តព្រះវិហារ។
ទន្ទឹមនឹងបង្ហាញការសោកស្តាយចំពោះហេតុការណ៍ដ៏អកុសលនេះ អាមេរិក ក៏បានចូលរួមរំលែកមរណទុក្ខជាមួយក្រុមគ្រួសារជនរងគ្រោះផងដែរ។
សូមបញ្ជាក់ថា មន្រ្តីជាអ្នកដោះមីនទាំង ៣នាក់ នៃអង្គការដោះមីនកម្ពុជា (CSHD) បានពលីជីវិតដោយការផ្ទុះមីនតោន ក្នុងកិច្ចប្រតិបត្តិការប្រមូល និងកម្ទេចគ្រាប់កាលពីថ្ងៃទី១០ ខែមករា ឆ្នាំ២០២២ ។ ជនរងគ្រោះ បានបម្រើការងារបោសសម្អាតមីនមនុស្សធម៌រយៈពេលជិត ១០ឆ្នាំមកហើយ។
ជនរងគ្រោះទាំង៣នាក់នេះ រួមមាន៖ លោក ស៊ុន វង្ស, លោក ម៉ា ស៊ីម៉េត និងលោក ម៉ន ចក់៕
