11-មករា-2022 - ម៉ោង 11:08:AM
ភ្នំពេញ៖ សម្ដេចក្រទ្បាហោម ស ខេង ប្រធានក្រុមការងារចុះមូលដ្ឋានខេត្តបាត់ដំបង និងព្រៃវែង បានផ្ដាំផ្ញើបេក្ខជនក្រុមប្រឹក្សា ឃុំ-សង្កាត់ សម្រាប់ការបោះឆ្នោតអាណត្តិថ្មី ត្រូវធ្វើសកម្មភាពល្អៗ ជាមួយប្រជាពលរដ្ឋ ពិសេសចុះទៅតាមខ្នងផ្ទះ ដើម្បីស្វែងយល់ពីជីវភាពពួកគាត់ឲ្យច្បាស់។
ក្នុងពិធីសំណេះសំណាល ជាមួយក្រុមការងារចុះមូលដ្ឋាន និងមន្ត្រីរាជការក្នុងខេត្តបាត់ដំបង នាថ្ងៃទី១០ ខែមករា ឆ្នាំ២០២២ សម្ដេច ស ខេង កោតសរសើរចំពោះក្រុមការងារ ចុះមូលដ្ឋានខេត្តបាត់ដំបងគ្រប់លំដាប់ថ្នាក់ បានរួមកម្លាំងសាមគ្គីគ្នាចូលរួម គាំទ្រដល់ការបំពេញភារកិច្ចបំរើជាតិ និងប្រជាពលរដ្ឋខេត្ត ទោះបីជាជួបនូវបញ្ហាប្រឈមបង្កឡើយដោយជំងឺកូវីដ-១៩យ៉ាងណាក៏ដោយ។
នាឱកាសនោះដែរសម្ដេច ក៏បានបានធ្វើការណែនាំបន្ថែម ដោយឲ្យថ្នាក់ដឹកនាំជាក្រុមការត្រូវខិតខំបំពេញភារកិច្ចដែលថ្នាក់ជាតិ បានផ្ដល់ជូនមកជាបន្តបន្ទាប់ ដើម្បីចូលរួមធ្វើឲ្យ សម្រេចបានជោគជ័យ នូវការធ្វើកំណែទម្រង់វិមជ្ឈការ និងវិសហមជ្ឈការដែលជា កំណែទម្រង់ប្រវត្តិសាស្រ្តនៅកម្ពុជា និងធ្វើឲ្យនៅថ្នាក់មូលដ្ឋាន មានលទ្ធភាពទទួលខុសត្រូវខ្ពស់ក្នុងការ ផ្ដល់សេវាសាធារណៈជូនប្រជាពលរដ្ឋ។
សម្ដេចបញ្ជាក់ថា «បេក្ខជនក្រុមប្រឹក្សាឃុំ-សង្កាត់ សម្រាប់ការបោះឆ្នោតអាណត្តិថ្មីខាងមុខនេះ សូមខិតខំធ្វើសកម្មភាពល្អៗ ឲ្យបានកាន់តែច្រើនបន្ថែមទៀត ជាមួយប្រជាពលរដ្ឋ ពិសេសការចុះទៅតាមខ្នងផ្ទះ ដើម្បីស្វែងយល់ពីជីវភាពពួកគាត់» ៕
