10-មករា-2022 - ម៉ោង 02:32:PM
តាកែវ៖ រដ្ឋមន្រ្តីក្រសួងប្រៃសណីយ៍ និងទូរគមនាគមន៍ លោក ជា វ៉ាន់ដេត បានចាត់ទុកអាគារ ពេទ្យថ្មីមណ្ឌលសុខភាពពត់សរ ដែលទើបសាងសង់ថ្មី នឹងក្លាយជាមន្ទីរពេទ្យមួយ ដែលបម្រើសេវាសុខាភិបាល ជូនបងប្អូនប្រជាពលរដ្ឋនៅក្នុងមូលដ្ឋានឃុំពត់សរនេះ ដោយពុំចាំបាច់ ទៅរកសេវាសុខាភិបាលនៅឆ្ងាយពីលំនៅដ្ឋាននោះទេ ។
ថ្លែងនៅក្នុងឱកាសអញ្ជើញសម្ពោធដាក់ឱ្យប្រើប្រាស់ជាផ្លូវការ អាគារពេទ្យថ្មីមណ្ឌលសុខភាពពត់សរ ឃុំពត់សរ ស្រុកបាទី កាលពីថ្ងៃអាទិត្យ ម្សិលមិញនេះ លោក ជា វ៉ានដេត រដ្ឋមន្រ្តីក្រសួងប្រៃសណីយ៍ និងទូរគមនាគមន៍ បានថ្លែងថា មិនយូរមិនឆាប់អាគារពេទ្យថ្មី មណ្ឌលសុខភាពពត់សរនេះ ប្រាកដជាក្លាយទៅជាមន្ទីរពេទ្យបង្អែកស្រុកទី២ នៅក្នុងស្រុកបាទី ហើយវាជាមន្ទីរពេទ្យបង្អែកថ្នាក់ស្រុក ដែលមានសម្ភារៈ បរិក្ខា ពេទ្យទំនើបៗ សម្រាប់បម្រើដល់បងប្អូនប្រជាពលរដ្ឋនៅក្នុងមូលដ្ឋាននេះផ្ទាល់ ក៏ដូចជាបងប្អូនមូលដ្ឋានផ្សេងទៀត ដែលមានទីលំនៅក្បែស្រុកភូមិនេះដែលមានជំងឺ អាចចូលមក សម្រាកព្យាបាលនៅទីនេះ ដោយមិនចាំបាច់ធ្វើដំណើរទៅព្យាបាល នៅទីរួមខេត្តឬនៅរាជធានីភ្នំពេញ នោះទេ។
លោករដ្ឋមន្រ្តី បានមានប្រសាសន៍បន្តថា ក្រៅពីសាលារៀនដែលរាជរដ្ឋាភិបាល បានធ្វើយ៉ាងណា កសាងអោយមកនៅជិតផ្ទះរបស់បងប្អូនប្រជាពលរដ្ឋនោះ មណ្ឌលសុខភាព និងមន្ទីរពេទ្យដែលបំរើ អោយសុខភាពរបស់បងប្អូនប្រជាពលរដ្ឋក៍ត្រូវបានកសាងអោយមកនៅក្នុងភូមិឃុំរបស់បងប្អូនប្រជាពលរដ្ឋផងដែរ។ ការកសាងមណ្ឌលសុខភាពឬមន្ទីរពេទ្យនេះ វានិងជួយកាត់បន្ថយអាត្រាគ្រោះថ្នាក់ ដល់ស្រ្តីឆ្លងទន្លេ និងបងប្អូនដែលមានជំងឺប្រចាំកាយ អាចចូលមកសម្រាកព្យាបាល ដែលវានិងនាំ អោយកាត់បន្ថយការចំណាយថវិការរបស់បងប្អូនប្រជាពលរដ្ឋបានមួយចំនួនធំជាក់ជាពុំខាន។
ឆ្លៀតនៅក្នុងឱកាសនោះ លោក ជា វ៉ាន់ដេត រដ្ឋមន្រ្តីក្រសួងប្រៃសណីយ៍ និងទូរគមនាគមន៍ ក៍បានស្នើអោយមន្ទីរសុខាភិបាល និងបញ្ជូនក្រុមគ្រូពេទ្យដែលមានជំនាញ ឯកទេសច្បាស់លាស់ អោយមកបំរើការនៅមន្ទីរពេទ្យប្រតិបត្តិស្រុក និងនៅតាមមណ្ឌលសុខភាពអោយកាន់តែច្រើនឡើង ដើម្បីធ្វើយ៉ាងណា ព្យាបាលជំងឺបងប្អូនប្រជាពលរដ្ឋ អោយកាន់តែឆាប់ជាសះស្បើយ និងដែលនាំអោយ បងប្អូនប្រជាពលរដ្ឋ កាន់តែមានជំនឿជឿជាក់លើគ្រូពេទ្យខ្មែរ យើងកាន់តែច្រើនឡើងថែមទៀត៕
