10-មករា-2022 - ម៉ោង 02:06:PM
តាកែវ៖ លោក មូល វិចិត្រ អភិបាលរងខេត្តតាកែវ បានថ្លែងអំពាវនាវដល់សិស្សានុសិស្សទាំងអស់ ត្រូវអនុវត្តវិធានការសុខាភិបាលឲ្យបានខ្ជាប់ខ្ជួនគឺ ៣កុំនិង ៣ការពារ ដើម្បីការពារជំងឺកូវីដ-១៩ កុំឲ្យឆ្លងចូលសាលារៀនជាពិសេសត្រូវរៀនរស់តាមបែបគន្លងប្រក្រតីថ្មីនៃបរិបទជំងឺកូវីដ-១៩។
ថ្លែងនៅចំពោះមុខលោកគ្រូអ្នកគ្រូ និងសិស្សានុសិស្ស ដែលបានចូលរួមនៅក្នុងពិធីបើកបវេសនកាល ឆ្នាំសិក្សា ២០២១-២០២២ នៅវិទ្យាល័យជាស៊ីមតាកែវ នាព្រឹកថ្ងៃទី១០ ខែមករា ឆ្នាំ២០២២នេះ លោក មូល វិចិត្រ អភិបាលរងខេត្ត បានថ្លែងបន្តថា យើងទាំងអស់គ្នាត្រូវចូលរួមបង្ការនិងទប់ស្កាត់វិបត្តិជាសកលនៃជំងឺកូវីដ១៩ ដោយបន្ត អនុវត្តឲ្យ បានខ្ជាប់ខ្ជួន នៅប្រធានសុវត្ថិភាពនានា ជាពិសេសសូមលោកគ្រូ អ្នកគ្រូ និងបងប្អូនសិស្សានុសិស្សទាំងអស់ ទៅនាំគ្នាទៅ ចាក់វ៉ាក់សាំងអោយបានគ្រប់គ្នា នឹងត្រូវបន្តការអនុវត្តវិធានការ បីកុំ បីការពារឲ្យបានខ្ជាប់ខ្ជួន។
ក្រៅពីបានអំពាវនាវលោកគ្រូ អ្នកគ្រូ សិស្សានុសិស្សចូលរួមទប់ស្កាត់ជំងឺកូវីដ១៩ អភិបាលរងខេត្តតាកែវ លោក មូល វិចិត្រ ក៏បានស្នើលោកគ្រូអ្នកគ្រូត្រូវខិតខំប្រឹងប្រែង អភិវឌ្ឍសមត្ថភាពរបស់ខ្លួនបន្ថែមទៀត ទាំងចំណេះដឹងវិធីសាស្រ្ត បង្រៀនរួមទាំងបច្ចេកវិទ្យាព័ត៌មានថ្មីៗ ភាសាបរទេសដើម្បីយកចំណេះដឹងមកបង្ហាត់បង្រៀនសិស្ស ឲ្យកាន់តែឆាប់ យល់ដឹងប្រសើរឡើងថែមទៀត ចំពោះសិស្សានុសិស្សត្រូវខិតខំរៀនសូត្រឲ្យបានខ្ជាប់ខ្ជួន ព្រមទាំងចូលរួមគ្រប់ សកម្មភាពនានា ដើម្បីគាំទ្រដំណើរការអភិវឌ្ឍសាលារៀន និងសង្គមជាតិរបស់យើងឲ្យកាន់តែរីកចម្រើនថែមទៀត៕
