08-មករា-2022 - ម៉ោង 02:58:PM
តាកែវ៖ នាព្រឹកថ្ងៃសៅរ៍ ទី០៨ ខែមករា ឆ្នាំ ២០២២ នៅទីស្នាក់ការគណបក្ស ប្រជាជនកម្ពុជាស្រុកសំរោង អ្នកឧកញ៉ា លី សាម៉េត តំណាងដ៏ខ្ពង់ខ្ពស់ សម្ដេចអគ្គមហាសេនាបតីតេជោ ហ៊ុន សែន ជាប្រធានគណបក្សប្រជាជនកម្ពុជា និងជានាយករដ្ឋមន្ត្រី នៃព្រះរាជាណាចក្រកម្ពុជា រួមជាមួយ លោក ដួង តារា រដ្ឋលេខាធិការទីស្ដីការគណៈរដ្ឋមន្ត្រី និងជាជំនួយការផ្ទាល់សម្ដេចតេជោ លោក អ៊ូច ភា អភិបាលខេត្តតាកែវ បានអញ្ជើញជួបសំណេះសំណាល ជាមួយអតីតសមាជិក គណបក្សសង្គ្រោះជាតិចំនួន ១៦០នាក់ ដែលមកពីស្រុកសំរោង និងស្រុកបាទី ខេត្តតាកែវ។
នៅក្នុងឱកាសដ៏ឧត្តុងឧត្តមនេះផងដែរ លោក អ៊ូច ភា អភិបាលខេត្តតាកែវ ក៏បានមាន មតិស្វាគមន៍ផងដែរថា លោកពិតជាសប្បាយចិត្តនៅពេលឃើញវត្តមាន របស់បងប្អូន នៅថ្ងៃនេះ និងលើកទឹកចិត្តឱ្យបងប្អូនដែលជាអតីត សមាជិករបស់គណបក្សប្រឆាំង ទាំងអស់ ជឿទុកចិត្តក្នុងការចុះចូលរួមមាគ៌ាជាមួយ គណបក្សប្រជាជនកម្ពុជា ហើយ លោកគាំទ្រយ៉ាងពេញទំហឹងនូវបេក្ខភាពរបស់ លោក ហ៊ុន ម៉ាណែត ជានាយករដ្ឋមន្ត្រីនៅពេលថ្ងៃអនាគតផងដែរ។
ឆ្លៀតក្នុងឱកាសនោះ អ្នកឧកញ៉ា លី សាម៉េត តំណាងដ៏ខ្ពង់ខ្ពស់ របស់ សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃកម្ពុជា បានមាន ប្រសាសន៍សំណេះសំណាលដ៏មានអត្តន័យផងដែរថា លោកពិតជាសប្បាយចិត្ត នៅពេលដែលបានជួបបងប្អូនទាំងអស់គ្នានៅក្នុងឱកាសនេះ ហើយលោកក៏បានលើក ទឹកចិត្តនិងផ្ដាំផ្ញើ ដល់បងប្អូនប្រជាពលរដ្ឋដែលជាសមាជិក គណបក្សប្រឆាំងពីមុន អាចចូលរួមមាគ៌ា ជាមួយគណបក្សប្រជាជនកម្ពុជាវិញ ដោយគ្មានការរើសអើង ហើយគណបក្សប្រជាជនកម្ពុជា ចាំបើកទ្វាចំហជានិច្ចក្នុងការទទួលដោយកក់ក្តៅបំផុត ហើយលោកក៏បាននាំនូវប្រសាសន៍ផ្ដាំផ្ញើសួរសុខទុក្ខ របស់សម្ដេចទាំងទ្វេ ជូនចំពោះបងប្អូន ក្នុងឱកាសនោះផងដែរ។
លោក ដួង តារា រដ្ឋលេខាធិការទីស្ដីការគណៈរដ្ឋមន្ត្រី និងជាជំនួយការផ្ទាល់ សម្ដេចតេជោបានមានប្រសាសន៍សំណេះ សំណាលនាឱកាសនោះផងដែរថា គណ បក្សប្រជាជនកម្ពុជាបើកទ្វារចំហនឹងស្វាគមន៍ជានិច្ចចំពោះបងប្អូនដែលជាអតីតសមាជិករបស់គណបក្សប្រឆាំងដើម្បីចូលរួមមាគ៌ាជាមួយគ្នា អភិវឌ្ឍ រីកចម្រើនជាមួយគ្នា ក្រោមដំបូលសន្តិភាពនិងការដឹកនាំរបស់គណបក្សប្រជាជនកម្ពុជាដែលមានសម្ដេចអគ្គមហាសេនាបតីតេជោ ហ៊ុន សែន ជាប្រមុខ។
នាឱកាសនោះផងដែរ សមាជិកទាំងអស់ដែលបានចូលរួមជាមួយ និង គណបក្ស ប្រជាជននៅថ្ងៃនេះក៏បានធ្វើការប្ដេជ្ញាចិត្ត ថានឹងចូលរួមបម្រើគណបក្សប្រជាជនកម្ពុជា បម្រើសម្តេចតេជោនាយករដ្ឋមន្ត្រី ដោយមិនមានការកែប្រែ ជារៀងរហូត។
ជាកិច្ចបញ្ចប់នៃកម្មវិធីដ៏មានអត្ថន័យក្នុង ថ្ងៃនេះផងដែរ គណៈអធិបតីទាំងអស់ ក៏បានចូលរួមថតរូបភាពអនុស្សាវរីយ៍ជាមួយបងប្អូនដែលមានវត្តមាននៅក្នុងអង្គពិធីផងដែរ៕
