01-ធ្នូ-2021 - ម៉ោង 09:20:AM
តាកែវ៖ ផ្លូវចាក់បេតុងមានប្រវែងជាង ១ពាន់ម៉ែត្រ កំពុងដំណើរការស្ថាបនា ក្នុងសង្កាត់រកាក្នុង និងសង្កាត់រកាក្រៅ ក្រុងដូនកែវ ដើម្បីបំពេញសេចក្ដីតម្រូវការចំបាច់បំផុតរបស់ពលរដ្ឋ ក៏ដូចជាចូលរួម អភិវឌ្ឍន៍ហេដ្ឋារចនាសម្ព័ន្ធក្នុងមូលដ្ឋាន ឱ្យសមស្របទៅតាមប្រទេសជាតិកំពុងមានការរីកចំរើន។
បើតាមការបញ្ជាក់ពីលោក កង អាណាន់ អភិបាលក្រុងដូនកែវ បានឱ្យដឹងថា កាលពីថ្ងៃទី៣០ ខែធ្នូ ឆ្នាំ២០២១នេះ លោកបានដឹកនាំមន្រ្តីជំនាញចំណុះរដ្ឋបាលក្រុង ចុះពិនិត្យជាក់ស្ដែង សាងសង់ផ្លូវ បេតុងចំនួន ៤ខ្សែ៖ ចំនួន ២ខ្សែ ស្ថិតនៅសង្កាត់រកាក្នុង មានប្រវែងសរុប ៩៩១ម៉ែត្រ ទទឹង ៤ម៉ែត្រ កម្រាស់ ២តឹក គ្មានសរសៃដែក ដោយប្រើប្រាស់មូលនិធិសង្កាត់ឆ្នាំ២០២១ និងនៅក្នុងសង្កាត់ រកាក្រៅ ចំនួន ២ខ្សែ ដែលមានប្រវែងសរុប ៤២០ម៉ែត្រ ទទឹង ៦ម៉ែត្រ កម្រាស់ ១,៥តឹក មានសរសៃដែក មានប្រពន្ធ័លូសង់ខាង ០,៥ម៉ែត្រ ដោយប្រើប្រាស់មូលនិធិសង្កាត់ឆ្នាំ២០២១។
ក្នុងឱកាសចុះពិនិត្យនោះដែរ លោកអភិបាលក្រុង ក៏បានណែនាំដល់ក្រុមហ៊ុនម៉ៅការសាងសង់ ត្រូវសាងសង់ អោយស្របតាមបទដ្ឋានបច្ចេកទេសស្តង់ដាត្រឹមត្រូវ ដើម្បីធានាគុណភាពផ្លូវអោយបាន យូរអង្វែង ព្រមទាំងជម្រុញឱ្យក្រុមកាងារសាងសង់ពន្លឿនការសាងសង់ ឱ្យបានលឿន ធានាបាន បរិមាណ គុណភាព និងសោភ័ណភាព ។
ឆ្លៀតក្នុងឱកាសនោះផងដែរ អភិបាលក្រុងដូនកែវ លោក កង អាណាន់ ក៏បានចុះសួរសុខទុក្ខបងប្អូន ប្រជាពលរដ្ឋដែលរស់នៅជាប់ផ្លូវកំពុងសាងសង់ ដោយពួកគាត់បង្ហាញអារម្មណ៍រំភើប សប្បាយរីករាយ ក្នុងការទទួលបានផ្លូវថ្មី ដែលបង្កភាពងាយស្រួលក្នុងការធ្វើដំណើរ និងការប្រកបអាជីវកម្ម របស់ពួកគាត់កាន់តែប្រសើរឡើងថែមទៀត៕
