15-វិច្ឆិកា-2021 - ម៉ោង 02:11:PM
តាកែវ៖ ក្រុមអាជីវករផ្សារតាកែវរាប់រយនាក់ នៅព្រឹកថ្ងៃចន្ទ ទី១៥ ខែវិច្ឆិកា ឆ្នាំ២០២១នេះ បានលើក គ្នាមកតវ៉ា នៅមុខសាលាខេត្តតាកែវ ដោយស្នើឲ្យ អភិបាលខេត្តតាកែវ លោក អ៊ូច ភា ជួយអន្តរាគមន៍ ដោយស្នើទៅក្រសួងសេដ្ឋកិច្ច និងហិរញ្ញវត្ថុអោយលុបគម្រោងវិនិយោគ សាងសង់ផ្សារតាកែវ ដែលស្ថិត នៅក្នុងសង្កាត់រកាក្រៅ ក្រុងដូនកែវ ខេត្តតាកែវ។
ក្រុមអាជីវករតាកែវ បានធ្វើការអះអាងថា គម្រោងវិនិយោគសាងសង់ផ្សារ បានរងប៉ះពាល់ដល់ការប្រកប របរលក់ដូររបស់ពួកគាត់ ដោយនៅពេលសាងសង់នឹង មានការជម្លៀសក្រុមអាជីវករទៅលក់នៅ កន្លែង ផ្សេង ខណៈពេលដែលការលក់ដូរបស់អាជីវករ បច្ចុប្បន្នកំពុងតែរងផលប៉ះពាល់ពីការឆ្លងរីករាល ដាលជំងឺកូវីដ១៩ ស្រាប់ផង។
បើយោងតាមបងប្អូនអាជីវករផ្សារតាកែវ ពួកគាត់គាំទ្រគម្រោងជួសជុលផ្សារ ឲ្យមានសោភ័ណភាពល្អ និងការស្ដារប្រព័ន្ធលូកុំឲ្យផ្សារលិចទឹកនៅក្នុងផ្សារ ប៉ុន្តែប្រឆាំងដាច់ខាតគម្រោងសាងសង់ផ្សារ។ នៅក្នុង ការជួបជុំប្រឆាំងតវ៉ានោះអភិបាលខេត្តតាកែវ លោក អ៊ូច ភា បានចេញមកជួបបងប្អូនអាជីវករ និងបាន ស្ដាប់តាមសំណូមពររបស់អាជីវករ ដោយ លោកអភិបាល ក៏បានបញ្ជាអោយខាងរដ្ឋបាល សាលាខេត្ត ចេញលិខិតផ្លូវការមួយ បញ្ជាក់ពីការសម្រេចផ្អាកគម្រោងការសាងសង់ និងជួសជុលផ្សារតាកែវផងដែរ។ ក្នុងលិខិតរបស់រដ្ឋបាលខេត្តតាកែវបាន បញ្ជាក់ថា ផ្អែកតាមការស្នើសុំរបស់បងប្អូនអាជីវករលក់ដូរ ក្នុងផ្សារតាកែវ ដែលបានសុំតវ៉ាមិនឲ្យមានការសាងសង់ចំនួនតូបបន្ថែមក្នុងផ្សារតាកែវទេ។
រដ្ឋបាលខេត្ត នឹងធ្វើសំណើទៅក្រសួងសេដ្ឋកិច្ច និងហិរញ្ញវត្ថុ ដើម្បីផ្អាកការសាងសង់ និងជួសជុលផ្សារ តាកែវ ទៅតាមសំណូមពររបស់បងប្អូនអាជីវករផ្សារតាកែវ។
គួបញ្ជាក់ថា ផ្សារធំតាកែវដែលមានទីតាំង ស្ថិតនៅក្នុងសង្កាត់រកាក្រៅ ក្រុងដូនកែវ ត្រូវបានក្រសួង សេដ្ឋកិច្ច និងហិរញ្ញវត្តុកាលពីថ្ងៃទី ៨ ខែ វិឆ្ឆិកា ឆ្នាំ២០២១ កន្លងទៅនេះ បានសម្រេចករណីសំណើរ សុំវិនិយោគ សាងសង់ផ្សារតាកែវ មួយផ្នែកនៅ កន្លែងលក់ត្រី បន្លែ ដោយចំណាយទុនវិនិយោគប្រមាណ ២លានដុល្លា៕
