08-វិច្ឆិកា-2021 - ម៉ោង 01:57:PM
ភ្នំពេញ៖ សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា បានប្រាប់ទៅក្រសួងអប់រំ យុវជន និងកីឡា កុំទាន់អាលបើកឱ្យថ្នាក់មត្តេយ្យសិក្សាឡើងវិញ ព្រោះកុមារដែលមានអាយុអាចចូលសិក្សាកម្រិតមត្តេយ្យសិក្សា មិនទាន់ទទួលបានវ៉ាក់សាំងបង្ការជំងឺកូវីដ១៩ នៅឡើយទេ។
ប្រមុខនៃរាជរដ្ឋាភិបាលកម្ពុជា បានធ្វើការណែនាំបែបនេះ ក្នុងឱកាសសម្ដេចតេជោ ហ៊ុន សែន អញ្ជើញសម្ពោធអគារទីស្ដីការថ្មីនៃក្រសួងរៀបចំដែនដី នគរូបនីយកម្ម និងសំណង់ នាព្រឹកថ្ងៃទី០៨ ខែវិច្ឆិកា ឆ្នាំ២០២១ ដោយសម្តេចបានមានប្រសាសន៍ថា អញ្ចឹងបានជាខ្ញុំសូមផ្តាំផ្ញើមត្តេយ្យកុំទាន់អាល់លឿនពេក ខ្ញុំចង់ឱ្យបឋម បើកមត្តេយ្យអត់ទាន់បានចាក់វ៉ាក់សាំង វាមានរឿងរបស់វាប្រយ័ត្នប្រយែង មត្តេយ្យកុំអាល់លឿនពេក អញ្ចឹងអីឡូវបានឱ្យចាក់អា៥ឆ្នាំ ព្រោះវាចូលបឋម អាយុ៣ឆ្នាំ ៤ឆ្នាំ យើងអត់ទាន់ឱ្យចាក់ទេ អញ្ចឹងយើងកុំអាល់លឿនពេក»។
សម្តេចតេជោ ហ៊ុន សែន ក៏បានបន្តក្រើនរំឮកដល់សិក្សានុសិស្ស និស្សិត ចាប់ពីកម្រិតថ្នាក់បឋមសិក្សារហូតដល់ថ្នាក់វិទ្យាល័យ ដែលត្រូវបានអនុញ្ញាតឱ្យចូលរួមសិក្សាឡើងវិញទាំងអស់នោះ ត្រូវបន្តអនុវត្តតាមវិធានការសុខាភិបាល និងវិធានការ «៣ការពារ និង៣កុំ» ឱ្យបានខ្ជាប់ខ្ជួនគ្រប់ៗគ្នា។
សម្តេចតេជោ ហ៊ុន សែន បញ្ជាក់ថា ចំនួនសាលារៀនដែលបានបើកសាលាឡើងវិញ នៅទូទាំងប្រទេសកម្ពុជា ពេលនេះមានចំនួន ២៦៤១សាលា ក្នុងនោះមានមតេយ្យ១៥៣សាលា, បឋមសិក្សា១៥០០សាលា, កម្រិតអនុវិទ្យាល័យ ៧១៦សាលា និងកម្រិតវិទ្យាល័យ២៧២សាលា។
សូមបញ្ជាក់ថា កន្លងមកក្រសួងអប់រំ យុវជន និងកីឡា នៅថ្ងៃទី២១ ខែតុលា ឆ្នាំ២០២១ បានចេញសេចក្តីណែនាំ ដោយប្រកាសពីការបើកដំណើរការគ្រឹះស្ថានអប់រំសាធារណៈ និងឯកជនគ្រប់កម្រិតឡើងវិញ ចាប់ពីថ្ងៃទី១ ខែវិច្ឆិកា ឆ្នាំ២០២១តទៅ ក្នុងភូមិសាស្ត្ររាជធានី ខេត្តទាំងអស់ តែត្រូវអនុវត្តនិងគោរពតាមយ៉ាងខ្ជាប់ខ្ជួននូវបទដ្ឋានសុខាភិបាលជាធរមាន៕
