13-កញ្ជា-2021 - ម៉ោង 11:41:AM
តាកែវ៖ ជនសង្ស័យ០២នាក់ ត្រូវបានកម្លាំងនៃបញ្ជាការដ្ឋានកងរាជអាវុធហត្ថខេត្តតាកែវ ចុះធ្វើការ ឃាត់ខ្លួន ព្រមទាំងដកហូតបានវត្ថុតាងមួយចំនួន នៅមូលដ្ឋានស្រុកសំរោង និងស្រុកត្រាំកក់ ។
បើតាមការបញ្ជាក់ពី លោកអនុសេនីយ៍ទោ ហួត វឿន នាយការិយាល័យប្រឆាំងគ្រឿងញៀន នៃបញ្ជាការដ្ឋានកងរាជអាវុធហត្ថខេត្តតាកែវ បានឱ្យដឹងថា កាលពីថ្ងៃទី១២ ខែកញ្ញា ឆ្នាំ២០២១ វេលាម៉ោង ១២និង១០នាទី ក្រោមការសម្របសម្រួលនីតិវិធីដោយ លោក ជីវ ចាន់តារា ព្រះរាជអាជ្ញាអមសាលា ដំបូងខេត្ត បានចុះបង្រ្កាប ករណីជួញដូរដោយខុសច្បាប់នូវសារធាតុញៀន នៅត្រង់ចំណុច (ផ្លូវលំ ខាងកើតភូមិតាមូង) ស្ថិតក្នុងភូមិតាមូង ឃុំលំចង់ ស្រុកសំរោង ខេត្តតាកែវ ។ ឃាត់ខ្លួនជនសង្ស័យ បាន០២នាក់ ទី១- ឈ្មោះហួន សារុំ ភេទប្រុស អាយុ ៣៩ឆ្នាំ មុខរបបរមិនពិតប្រាកដ ជនជាតិខ្មែរ រស់នៅភូមិតាមូង ឃុំលំចង់ ស្រុកសំរោង ខេត្តតាកែវ និងទី២- ឈ្មោះ ប៉ាន់ ឧត្តម ភេទប្រុស អាយុ ២៥ឆ្នាំ មុខរបបរមិនពិតប្រាកដក ជនជាតិខ្មែរ រស់នៅភូមិតាឌូសង្កាត់រកាក្រៅ ក្រុងដូនកែវ ខេត្តតាកែវ ។ ក្រោយពីស្តាប់ចម្លើយជនសង្ស័យឈ្មោះ សារុំ បានសារភាពថាថ្នាំញៀននេះខ្ញុំទិញពី ឈ្មោះ រុន ភេទប្រុសប្រហែល៣០ឆ្នាំរស់នៅភូមិអង្គរ គគីរ ឃុំពពេលស្រុកត្រាំកក់ ខេត្តតាកែវ ។ សមត្ថកិច្ចយើងឈានរកឈ្មោះរុន តែមិននៅផ្ទះ។
លោកអនុសេនីយ៍ទោ ហួត វឿន បានបន្ថែមថា ក្រោយការឃាត់ខ្លួនជនសង្ស័យ ក៏ដកហូតវត្ថុតាងមាន៖ ក្រាមពណ៌សថ្លា ចំនួន ៣៤កញ្ចប់ ទម្ងន់ ៤,៦៦ ក្រាម (ថ្លឹងទាំងសំបក់ថង់) ទូរស័ព្ទចំនួន ០២គ្រឿង ម៉ាករៀលមី និងម៉ាក ស៊ីងតិច ។
បច្ចុប្បន្នជនសង្ស័យ និងវត្ថុតាង ការិយាល័យជំនាញកសាងសំណុំរឿង និងបញ្ជូនទៅសាលាដំបូង ខេត្តតាកែវ ចាត់ការតាមនីតិវិធី ៕
