02-សីហា-2021 - ម៉ោង 11:30:AM
តាកែវ៖ លោកស្រី ឱ វណ្ណឌីន រដ្ឋលេខាធិការក្រសួងសុខាភិបាល និងជាប្រធានគណៈកម្មការចំពោះកិច្ច ចាក់វ៉ាក់សាំងកូវីដ១៩ នៅព្រឹកថ្ងៃចន្ទ ទី០២ ខែសីហា ឆ្នាំ២០២១នេះ បានបន្ដនាំយកអំណោយដ៏ថ្លៃថ្លា រួមនឹងថវិការបស់ សម្ដេចតេជោ ហ៊ុន សែន នាយករដ្ឋកមន្ដ្រីកម្ពុជា ប្រគល់ជូនលោកយាយ អាយុ ១០០ឆ្នាំម្នាក់ ដែលបានស្មគ្រចិត្តចាក់វ៉ាក់សាំងការពារជំងឺកូវីដ១៩ រស់នៅភូមិជីខ្មារ ឃុំជីខ្មារ ស្រុកទ្រាំង ។ អញ្ជើញចូលរួមអមដំណើរនាឱកាសនោះ មាន លោក អ៊ូច ភា អភិបាលខេត្តតាកែវ ព្រមទាំងមន្រ្តី ជំនាញ និងអាជ្ញាធរស្រុកទ្រាំងផងដែរ។
ថ្លែងក្នុងឱកាសនោះ លោកស្រី ឱ វណ្ណឌីន បាននាំនូវការផ្ដាំផ្ញើសាកសួរសុខទុក្ខពីសំណាក់សម្ដេចតេជោ ហ៊ុន សែន នាយករដ្ឋមន្ដ្រីនៃកម្ពុជា មកជម្រាបជូនលោកយាយ ផាត់ ញ៉ែម ព្រមទាំង កូន ចៅ ចៅទួត ព្រមទាំងបានជម្រាបសាកសួរអំពីស្ថានភាពសុខភាពរបស់ លោកយាយ ក្រោយពីចាក់វ៉ាក់សាំងបង្ការ ជំងឺកូវីដ១៩ផងដែរ។
ជាមួយគ្នានោះដែរ លោកយាយ ផាត់ ញ៉ែម ដែលមានអាយុ ១០០ឆ្នាំ រស់នៅភូមិជីខ្មារ ឃុំជីខ្មារ ស្រុកទ្រាំង បានសម្តែងនូវការត្រេកអរជាខ្លាំង និងថ្លែងអំណរគុណយ៉ាងជ្រាលជ្រៅ ជូនចំពោះ សម្ដេច តេជោនាយករដ្ឋមន្ដ្រី ដែលលោកបានខិតខំប្រឹងប្រែង ស្វែងរកវ៉ាក់សាំងចាក់ជូនប្រជាពលរដ្ឋ ដើម្បីបង្ការ ជំងឺកូវីដ១៩ ហើយលោកយាយផ្ទាល់ក៏បានទទួលនូវវ៉ាក់សាំងនេះ បូកទាំងអំណោយរបស់សម្ដេច ថែមទៀត ។
សូមបញ្ជាក់ថា លោកយាយដែលស្ម័គ្រចិត្តចាក់វ៉ាក់សាំង ហើយទទួលបានអំណោយពីសម្ដេចតេជោ ហ៊ុន សែន នាឱកាសនេះ លោកយាយឈ្មោះ ផាត់ ញ៉ែម អាយុជាង ១០០ឆ្នាំ រស់នៅភូមិជ្រែ ឃុំជីខ្មា ស្រុកទ្រាំង ខេត្តតាកែវ បានស្ម័គ្រចិត្តចាក់វ៉ាក់សាំង ការពារ និងបង្ការជំងឺកូវីដ១៩ កាលពីថ្ងៃទី២៨ ខែកក្ដដា ឆ្នាំ២០២១ ៕